日本中部自駕遊：名古屋、高山、白川鄉、金澤10天行程分享

文章發表日期：2026-03-06 | 文章分類：日本旅遊攻略 | 作者：Dilbert MO

旅遊教室» 旅遊攻略» 日本旅遊攻略» 日本中部自駕遊：名古屋、高山、白川鄉、金澤10天行程分享

日本中部自駕遊行程怎樣規劃？如果沒有頭緒，可以看看我第一次到名古屋自駕遊的行程，這次在中部北陸自駕遊10天，以名古屋為起點和終點，串連下呂溫泉、高山、白川鄉、富山、立山黑部、宇奈月溫泉、黑部峽谷、金澤等日本中部北陸地區的主要旅遊地點，很適合第一次到日本中部自駕遊的人士參考。

這次旅程時間在11月初，是日本中部地區的紅葉季節，所以行程設計主要以賞楓為主，不過這10天行程所到的地點，都是中部北陸的主要旅遊地點，即使是在春天賞櫻，還是夏天親子旅行，同樣適合，絕對是第一次日本中部自駕遊的標準行程。

文章目錄

日本中部自駕遊：10天行程規劃

中部國際機場是到名古屋以及中部北陸地區旅遊的最近的機場，我們這次旅程也是經中部國際空港進出。旅程第一天先在名古屋市留宿一晚，第二天才正式開始自駕，自駕日數是7天，旅程結束前再在名古屋停留兩晚。

以下是這10天行程的規劃：

【Day 1】：澳門經香港到名古屋，遊覽名古屋駅一帶，住宿名鉄イン名古屋桜通(Meitetsu Inn Nagoya Sakuradori)。[住宿介紹：住@名鉄イン名古屋桜通]
【Day 2】：開始自駕，先到土岐Premium Outlet購物，再到惠那峽坐船賞紅葉，然後前往下呂溫泉，住宿下呂溫泉湯あそびの宿下呂觀光ホテル本館，浸溫泉。[住宿介紹：住@下呂觀光ホテル本館]
【Day 3】：遊覽下呂溫泉合掌村，前往高山，遊覽高山飛騨の里、上三之町古街，住宿高山スパホテルアルピナ飛騨高山(Spa Hotel Alpina Hida Takayama)。[住宿介紹：住@スパホテルアルピナ飛騨高山]
【Day 4】：遊覽高山陣屋、宮川朝市、八幡宮、飛騨下川、白川鄉，前往富山市，住宿富山市コンフォートホテル富山駅前(Comfort Hotel Toyama)。
【Day 5】：遊覽立山黑部，前往宇奈月溫泉，住宿黒部峡谷・宇奈月温泉ホテル黒部，浸溫泉。[住宿介紹：住@宇奈月温泉ホテル黒部]
【Day 6】：乘坐黑部峽谷小火車賞紅葉，前往金澤，遊覽金沢21世紀美術館，住宿金沢天然温泉加賀の湧泉ドーミーイン金沢(Dormy Inn Kanazawa)。
【Day 7】：遊覽金沢兼六園、金沢城公園、近江町市場，繼續住金沢。
【Day 8】：自駕last day，由金沢返名古屋，途經長島三井Outlet購物，住宿名古屋。
【Day 9】：遊覽名古屋城、榮商業區、大須商店街Shopping。
【Day 10】：旅程結束，經香港返澳門。

這次旅程，基本上都按上述Planning走，但其中Day 4去白川鄉的行程，因為遇上壞天氣和一些問題，臨時改至Day 7去，而Day 5去立山黑部的行程，就因為大雪停駛而泡湯，臨時將第二天去坐黑部峽谷小火車的行程提前在Day 5，而Day 6就直接去金澤，完成原本分散在Day 6和Day 7的行程，騰出Day 7去白川鄉。

以下是這次行程的行車路線和主要景點在地圖上的位置：

在較大的地圖上查看日本中部自駕遊行車路線和景點位置

這個行程除了遊覽景點外，也安排了不少時間購物，除了在名古屋市有一整天購物行程外，也分別到了名古屋市郊的兩個Outlet，絕對可以滿足女士的Shopping要求。另外，旅程中分別去了兩處溫泉鄉，入住兩晚溫泉旅館浸溫泉。

如果旅行日數只有8天，建議可以刪除金澤和長島三井Outlet的行程，第6天坐黑部峽谷小火車後，直接返回名古屋。另外，也可以刪除Day 9在名古屋市的行程，以及縮短在金澤停留的時間，第7天遊覽完金澤景點後，返回名古屋。

日本中部10天自駕遊：行程、景點分享

以下是我這10天日本中部北陸自駕遊每天的行程，不過內容是用廣東話撰寫。

10天日本中部自駕遊Day 1：名古屋車站周邊遊

由於澳門冇機去名古屋，只有選擇從香港出發，坐嘅係國泰航空，買左三日兩夜package，來回機票加兩晚名古屋酒店每人要HK$5,300幾，算係貴。

飛機從香港起飛嘅時間係上午10點半，啱啱好可以坐朝早7點半班船直接由澳門去香港機場，慳返機場稅之餘仲可以直接係機場碼頭check-in，方便快捷。

更新：而家澳門去香港坐飛機，可以坐機場巴士又或者自駕泊車轉機，比以前方便好多，而且即使先入境香港再到機場Check-in，都可以有得退稅。

國泰飛機餐

話咁快已經飛到日本中部國際空港，天氣唔錯喎。

中部國際機場去名古屋市區

中部國際空港嘅國際線入境大堂地方唔算大

名古屋鐵路車站就係入境大堂同一層，沿著指示行就到。

坐名鐵由機場到名古屋駅車票價錢係980yen，如果要指定席，需要再花450yen購買特別車輛券，不過由於坐嘅人唔多，冇必要購買。車票可以係車站閘口出面嘅自助售票機購買，同買地鐵車票一樣。

名古屋駅

第一晚只會係名古屋留宿一晚，第二日一早就會離開名古屋開始自駕，所以呢晚係book左呢間係名古屋駅附近嘅名鉄イン名古屋桜通，間酒店當時開業冇幾耐，位置方便質素唔錯，詳細介紹可以參考呢篇住@名鉄イン名古屋桜通。

第二朝影嘅酒店外觀

係酒店攪完check-in時間都唔早，所以今日剩餘嘅時間只係名古屋駅周圍行下。

今晚晚餐食壽司，用電腦落order，仲有英文menu，不過反而唔習慣。

除左今次住嘅名鉄イン名古屋桜通之外，之後幾次再到名古屋都分別住過幾間唔同嘅酒店，其中最鍾意嘅一間係名古屋Nagoya JR Gate Tower Hotel，就係正名古駅上面，除咗位置方便之外，質素都超正，只係貴D，如果預算夠，係名古屋建議住呢間。

– Day 1 完 –

10天日本中部自駕遊Day 2：土岐Premium Outlet血拼、惠那峽看紅葉、下呂浸溫泉

名古屋唔係今次中部之旅嘅重點，不過last兩晚會返黎住多兩晚，所以名古屋市內嘅景點留待行程結尾返黎之後再行，而旅程第二日就開始自駕向北出發。今日會先去名古屋附近嘅土岐Premium Outlet Shopping，之後再去紅葉勝地惠那峽，最後到下呂浸溫泉。

取車開始自駕遊

今次架車係經樂天旅行向Orix Car Rental租嘅S Class車，七日租車費41,000幾円，另外再加7,350円免責補償保費，合共係48,000幾円，因為唔係淡季，所以租車費都唔係平。

本黎預約左9點半取車，不過因為早左起身，冇咩做提早去攞車先。租車店係名古屋駅西面嘅太閣通口不遠，由我地住嘅名鉄イン名古屋桜通步行10分鐘左右就到。

開始行去攞車，名鉄イン名古屋桜通附近街道上仲係好靜，冇咩行人。

係日本比較少見有街邊入硬幣嘅泊車位，但係酒店附近就見到有幾個。

從櫻通口進入名古屋駅

名古屋駅內嘅手信店咁早已經開左門

再從太閣通口行出名古屋駅

太早到租車店仲未開門，原來租車店開8點半，唯有係附近行下，轉頭再返去。

終於等到8點半可以去攞車，原先仲以為今次會係Honda Fit，但原來又係Toyota Vitz。

土岐Premium Outlet

攞左車之後先泊返酒店，食完早餐正式出發，第一站係距離名古屋駅50公里外嘅土岐Premium Outlet。

土岐Premium Outlet

地址：岐阜県土岐市土岐ヶ丘1-2

電話：0572-53-3160

網址：https://www.premiumoutlets.co.jp/toki/

呢日撞啱有開催，所以都執左D平貨。

惠那峽遊船河

離開Outlet，下一站係惠那峽，呢度係岐阜縣著名嘅紅葉名所，位於木曾川上，可以坐船睇紅葉。

惠那峽遊覽船碼頭

地址：岐阜県恵那市大井町奥戸

電話：0573-25-4800

網址：http://www.tohsyoh.jp/

架車泊好之後行一陣就到坐遊覽船嘅碼頭

先係碼頭售票處買船飛

遊覽船嘅船飛大人1,250日元(而家係1,500日元)，可以先係官網列印張割引券平150日元，買飛嘅時候出示就有折扣。

Tips: 遊覽船嘅船飛亦可以係Klook購買，價格係1,350日元，即係用割引券折咗之後嘅價錢，而且仲可以用Klook優惠碼，比現場買抵D。

碼頭睇落好簡陋

遊覽船嘅外型

遊覽船嘅裡面

可能因為已經過左盛開時間，呢度嘅紅葉並唔係太靚。

下呂溫泉

遊覽完惠那峽時間已經唔早，係時候起程去我地今晚嘅住宿地點下呂溫泉啦。從惠那峽到下呂溫泉距離大約50公里，行257號國道大約1個鐘多D就到。沿257號國道行經嘅係岐阜縣境內嘅鄉下地方。

今晚係下呂溫泉入住嘅溫泉旅館係呢間下呂温泉湯あそびの宿下呂観光ホテル本館，質素好好，有興趣可以睇下呢篇詳細嘅住宿介紹《住@下呂觀光ホテル本館》。

– Day 2 完 –

10天日本中部自駕遊Day 3：遊下呂溫泉合掌村、高山飛騨の里、高山老街

今日係下呂觀光ホテル本館食完早餐之後，就會Check-out去高山，沿途會先去下呂溫泉合掌村，再到高山市近郊嘅飛騨の里，之後係高山嘅酒店Check-in完再行高山市內景點。

一早起來先欣賞下房外嘅下呂市景色，山區嘅晨早空氣真係好清爽，忍唔住吸多幾啖。

我地嘅住宿計劃包括埋40分鐘免費貸切風呂，可以從旅館幾個貸切風呂選擇一個，因為前一日check-in時時間已經唔早，所以預約左今朝先黎享用。

浸完溫泉又係早餐時間啦，早餐清清地，味道唔錯。

食完早餐hea一陣要check-out啦，今日嘅景點主要安排係高山，所以下呂呢度只會去下呂溫泉合掌村。

下呂溫泉合掌村

開車離開下呂觀光ホテル本館

下呂市街

下呂溫泉合掌村門口出面嘅地圖，要正式地圖，可以下載下面張官方網站提供嘅地圖。

下呂溫泉合掌村分為上面嘅「歳時記の森」同下面嘅「合掌の里」兩部份，中間俾一條馬路分開，不過有條行人隧道連接。

呢度係「歳時記の森」嘅入口，出面有個好大嘅免費停車場。本黎已經泊好車打算從呢個入口入去，但睇真D門口張地圖，原來下面嘅「合掌の里」先係主要景點同正門，於是上車落返去正門入口。

呢度先係下呂溫泉合掌村正門，出面有幾個駐車場，都係免費。

呢兩張下呂溫泉合掌村嘅入場券係係溫泉旅館買架，因為有折扣。

入口

下呂溫泉合掌村嘅「合掌の里」佔地並唔係好大

呢間舊大戶家住宅係合掌の里裡面最主要嘅合掌屋

舊大戶家住宅入面展示嘅係以前屋內嘅生活情況

合掌の里裡面都有一個足湯

另一間細D嘅合掌屋舊遠山家住宅

呢棵大杉樹叫夫婦杉

穿過呢條行人隧道就可以過到馬路對面嘅「歳時記の森」

「歳時記の森」展示嘅係合掌村外嘅樹林地區，所以冇咩住宅，主要有小型神社同水車。

下呂溫泉合掌村地方唔大，一個鐘已經行晒，而係合掌の里入口旁邊，仲有一個小型市集，順便亦係度行一行買D小食。

下呂去高山41號國道

遊覽完下呂溫泉合掌村我地係時間離開下呂向高山出發啦。下呂溫泉同高山市嘅距離只有50公里，沿住同高山本線並行嘅41號國道開車大約1個鐘就到。

雖然岐阜縣境內大部份地方都係高山，不過41號國道並唔難行，路面都算寬闊，唔怕有窄路，亦唔會有Z形山路，而且一邊行一邊仲有好靚嘅山景睇。

沿途嘅道之駅，停車休息下順便睇下風景

高山飛騨の里

到達高山市，第一站先去距離高山駅2公里嘅飛騨の里。先係飛騨の里外面個停車場泊低架車，免費架。

未入飛騨の里已經見到呢棵越牆而出嘅巨樹好靚嘅紅葉

售票處設係入口旁邊

飛騨の里入場費700日元，用下面呢張割引券可以平100，不家而家唔知仲有冇效。

入到飛騨の里首先見到嘅就係呢個影相位

飛騨の里中間有一個小湖，湖邊分佈住幾間合掌屋，再加上紅葉點綴，景色好美。

高山老街

遊覽完飛騨の里先去今晚入住嘅酒店check-in，間酒店叫スパホテルアルピナ飛騨高山(Spa Hotel Alpina Hida Takayama)，係高山駅附近，距離高山市主要景點都好近。想睇呢間酒店嘅介紹同我嘅住宿評價，可以參考呢篇住@スパホテルアルピナ飛騨高山 (Spa Hotel Alpina Hida Takayama)。

酒店距離高山市嘅主要景點都好近，到上三之町只有400米左右，行過去只需要大約5分鐘。Check-in完之後，就過去逛逛。

高山街道

過左橋就係上三之町嘅古町並老街

今晚晚餐就係酒店附近嘅呢間食飛騨牛嘅丸明，位置就係國分寺通嘅國分去東十字路口，從我地間酒店前嘅高山郵便局前十字路口向國分寺通行200米就到。

– Day 3 完 –

10天日本中部自駕遊Day 4：遊宮川朝市、櫻山八幡宮、飛騨古川

今日嘅行程會先係高山遊覽宮川朝市同陣屋朝市，然後再到櫻山八幡宮，之後離開高山到飛騨古川，再經白川鄉到富山市過一夜。而係今日嘅旅程中，我地仲遇到一件驚險嘅事：誤闖雪山。想知有幾驚險，睇埋落去。

尋日日間嘅天氣本來好地地，但夜晚就落起雨黎，好彩到天光雨勢停左，不過氣溫就下降左幾度，可能就係呢個氣溫驟降嘅原因，令到我地今日有落雪嘅遭遇。

宮川朝市

朝市當然係要一朝早去啦，先去宮川朝市，從酒店行過去並唔係好遠，6分鐘左右就到。

顧名思義宮川朝市就係宮川旁邊，清早時間並唔係太多人。

行到咁上下先入去呢間食店食個早飯

陣屋朝市

行完宮川朝市，再去埋陣屋朝市，呢度規模唔大，只有幾個攤販。

顧名思義陣屋朝市旁邊就係高山陣屋

櫻山八幡宮

行完兩個朝市，先返去酒店check-out，跟住再去埋櫻山八幡宮。

櫻山八幡宮出面咁啱有個菊花展，順便參觀下。

櫻山八幡宮附近仲有高山屋台會館、櫻山日光館、獅子會館呢D展館，不過吸引力唔大，而且時間有限，所以冇入去參觀，睇完菊花展就開車離開高山去飛騨古川。

飛騨古川

飛騨古川離高山市唔夠20公里，開車20分鐘就到。飛騨古川係一個小鎮仔，冇咩遊客，街上好寧靜。

飛騨古川最主要景點就係呢條養左好多金魚嘅小溪

溪入面養左好多魚

如果有興趣喂下魚，可以用100日元自助買包魚糧玩下。

附近有個小寺院

買返串牛內串頂下肚先

中午果餐唔可以只係食串牛肉就算，係附近搵左間小店食碗牛肉飯。

360號國道

去完飛騨古川我地下一站係計劃順路去埋白川鄉，然後再到富山市。如果要行高速公路，要先行返去高山市，再經高山清見道路同東海北陸自動車道到白川鄉。不過，我地一時貪近唔想行回頭路，選擇左行一條直接連接飛騨古川同白川鄉嘅360號國道。

在較大的地圖上查看360號國道

原來360號國道係一條係高山上嘅小路，條路彎彎曲曲一直爬到上山頂，雖然話係國道，但係條路只夠一架車通過，路嘅一邊係悬崖峭壁，另一邊就係萬丈深淵，旁邊嘅圍欄睇落又唔多穩陣。咁嘅路就算係風和日麗嘅時候都好危險，呢日仲撞正山上落左場初雪，係毫無準備又冇雪地開車經驗嘅情況下，只有硬住頭皮以龜速前進，因為條路實際太窄，想掉頭行返落山都唔得。

最後我地用左個半小時總算行完呢條魔鬼山路落到山下，執返條命。雖然呢程路好驚險，但係山上嘅景色又真係超靚，係呢個半鐘內窗外嘅景色由綠變黃，再變紅，跟住變白，再變返紅，然後再變黃，最後變返綠，一年四季濃縮左係呢個半小時之內，一次過睇晒，超正，只可惜太過驚唔識得影多幾張相。

因為太驚而且山上又凍，落到山下可謂饑寒交迫，第一時間入左間便利店，食左呢世人覺得最好味嘅關東煮。

五箇山合掌之里

雖然山下就係白川鄉，但係因為經歷左一程驚險旅程，又耽誤左唔少時間，再加上山下落緊雨，所以決定改一改行程唔去白川鄉住，先去冇咁多嘢睇嘅五箇山合掌之里睇一睇，跟住就去富山投宿。

我地住係富山駅附近嘅コンフォートホテル富山駅前(Comfort Hotel Toyama)，間酒店房間雖然細D，但質素唔錯，而且位置好方便，不過富山市都幾鄉下地方，就算火車站附近入夜之後都冇咩地方好行，食店亦唔多，今晚只係食呢D。

– Day 4 完 –

10天日本中部自駕遊Day 5：遊立山黑部、坐黑部峽谷小火車看紅葉

按計劃今日會上立山黑部，係今次旅程嘅重頭戲。不過因為尋日氣溫突降，係立山山上落左場大雪，今日去到山腳嘅立山駅先知道山上嘅立山高原巴士停駛，食左閉門羹。

立山黑部

尋晚見天氣轉差已經心知不妙，今朝一早上去立山黑部官方網站睇下有咩新消息，但係網站冇發佈任何消息，所以決定按原定計劃前往立山駅睇睇。

富山市內嘅主要交通工具係電車，可惜未有機會試坐。

從富山市前往立山駅嘅路上，雖然天陰陰，但好在已經停左雨。

接近山腳可以見到滿山紅葉

無論係唔係自駕，立山黑部嘅行程都令人好頭痛，因為立山黑部路線由西至東貫穿立山，如果想要有充足時間遊覽，最好係由其中一邊上山，再由另一邊落山，咁樣就唔洗行返轉頭，唔洗趕時間。

不過如果自已開車去，因為架車泊左係山腳，所以冇辦法一定要係上山嘅同一邊落下攞返架車。其實就算唔係自駕，帶住大件行李上山亦都唔係咁方便。

立山黑部西邊嘅出入口係立山駅，東邊係扇澤，兩地之間相距170公里，開車要3個半鐘。如果自駕又想係一邊上山，另一邊落山，可以幫襯車輛回送服務，幫你將架車由一邊開去另一邊，不過服務費要2萬幾日元。如果唔係自駕，亦可以幫襯行李回送服務，每件4千日元。

立山駅出面有多個停車場，免費任泊，今山上唔到山所以停車場空空如也。

如果唔係自駕，可以由富山駅坐富山電鐵到山立駅。

因為封山，立山駅周圍都好冷清。

立山駅

售票處就係車站右邊，可以係呢度買飛，如果旺季怕買唔到，亦可以先係網上預約。

由於山上落雪，立山駅呢邊只可以去到美女平。雖然美女平冇乜嘢睇，但係一場黎到冇理由唔上一上去。立山駅至美女平嘅登山纜車來回車票。

立山駅

車站內設有幾個Locker

立山駅到美女平坐嘅登山纜車

纜車車道

窗外美景

到左美女平，車站顯示室堂附近 “吹雪” ，高原巴士停駛。

GPS顯示我地身處美女平

因為停駛，美女平駅出面嘅巴士都停晒係度。

美女平本身冇乜嘢睇，係度影下相返落山。

從登山纜車望落立山駅

黑部峽谷觀光火車

冇得上立山黑部，唯有提早入去字奈月溫泉。本黎係計劃聽朝先去坐黑部峽谷觀光火車，而家改變行程，今日先坐小火車遊覽黑部峽谷啦。

黑部鐵路字奈月駅出面有個大停車場，不過係要收費架。

車站裡面亦有Locker可以放行李

雖然車票都可以網上預約，但手續好麻煩，都係去到車站大堂先買車票好D。

黑部峽谷觀光火車分為普通客車、特別客車同逍遥客車三種不同的車種，普通客車係開放式車廂，冇遮冇擋，由於峽谷裡面好大風，而且天氣又凍，坐普通客車可能會凍僵，所以我地選擇坐特別客車，雖然要另外俾多300幾Yen買多張特別客車車票，但係都值得。而逍遥客車就比特別客車高級一D，但係要俾多500幾Yen。(註：而家特別客車同逍遥客車已經統一改為休閒客車，車票比普通客車貴600日元。)

呢種就係普通客車，如果唔係夏天坐起黎風涼水冷都幾辛苦。

我地坐呢種特別客車

黑部峽谷觀光火車月台

黑部峽谷係今個旅程見到最靚紅葉嘅地方，風景一流。

黑部峽谷觀光火車分別設有宇奈月、黒薙、鐘釣同欅平四個車站，買車票時一定要指定去邊個站，唔可以買一張車票個個站都落車，因為車票係落車之後就會冇效，所以就算你買左張由宇奈月到最後一個站欅平嘅車票，如果你中途係黒薙或鐘釣落左車，想再去返欅平都要重新買過車票。

如果想個個站都去，可以分別到各個站嘅單程車票，例先買由宇奈月到黒薙嘅單程車票，再買由黒薙到鐘釣嘅單程車票，然後買由鐘釣到欅平嘅嘅單程車票，最後買由欅平返宇奈月嘅單程車票。

更新：受能登半島地震影響，鐘釣同欅平呢兩個車站現在暫停使用中，未知幾時恢復。現時最遠只可以去到猫又站。

我地只係由宇奈月直接去欅平，冇去黒薙同鐘釣。

欅平駅

車站內有食事處，中午就係呢度食。

欅平駅外嘅觀景台

從宇奈月坐觀光火車到欅平單程差唔多要80分鐘，唔計遊覽時間淨係坐觀光火車來回都要接近三個鐘。遊覽完黑部峽谷，今日嘅旅程又結束啦，今晚入住宇奈月溫泉呢間叫宇奈月温泉ホテル黒部嘅溫泉旅館，詳細介紹可以睇呢篇住@宇奈月温泉ホテル黒部。

今晚間房

今晚晚餐

【宇奈月溫泉旅館•推薦】住@宇奈月温泉ホテル黒部 (Hotel Kurobe)

– Day 5 完 –

10天日本中部自駕遊Day 6：遊金澤兼六園、近江町市場、金沢21世紀美術館

金沢係北陸地區最大嘅城市，市內同周邊都有唔少景點。金沢係我地係北陸嘅最後一站，我地會係呢度住宿兩日。由於原本plan左今日會去嘅黑部峽谷係尋日已經提前去左，所以今日係溫泉旅館食完早餐之後就check-out前往金沢。

係溫泉旅館例牌會係朝早浸多次溫泉，跟住舒舒服服食埋個早餐先check-out起程。

一邊食早餐一邊欣賞窗外美景

宇奈月溫泉距離金沢大約110公里，行高速公路個半鐘就到，

兼六園

去到金沢第一站先去兼六園。兼六園附近有個叫石川県兼六駐車場嘅室內停車場，係離兼六園最近嘅停車場，我地將架車泊係呢度，行過對面馬路再行上呢條斜路就係兼六園。

兼六園對面係金沢城，不過今次冇入去參觀。

兼六園出面有一排商店

兼六園入口

兼六園景色好標緻，不過冇咩紅葉。

近江町市場

行完兼六園下一站去近江町市場。近江町市場附近橫街有唔少小型停車場，搵車位泊唔難。

黎到近江町市場當然要食海鮮丼，呢間近江町海鮮丼家ひら井係呢度出名食海鮮丼嘅食店，有本店同いちば館店，兩間都係近江町市場，我地去呢間係本店。

好豐富足料嘅海鮮丼

金沢21世紀美術館

今日最後一站去金沢21世紀美術館，美術館有個大型地下停車場，泊車好方便。

金沢21世紀美術館裡面好多展品我地呢D冇乜藝術細胞嘅人睇唔明

金沢21世紀美術館裡面最出名嘅展品係呢個泳池，其實只係係池底開左個地下室，透過透明玻璃望落去就好似人係水底。

金沢駅

今次係金沢住嘅酒店係天然温泉加賀の湧泉ドーミーイン金沢(Dormy Inn Kanazawa)，間酒店位於金沢駅前面，交通好方便，質素亦保持左Dormy Inn一貫嘅特色，可惜係酒店內影相唔多，所以唔能夠單獨寫篇住宿評價。

金沢周圍仲有唔少質素同樣好好嘅酒店，呢間位於Dormy Inn旁邊嘅ダイワロイネットホテル金沢(Daiwa Roynet Hotel Kanazawa)亦係唔錯嘅選擇。

Check-in之後先去酒店對面間商場逛下

金沢駅

香林坊

金沢駅附近並唔係太多地方可以行，所以轉到金沢購物中心香林坊。

最後係香林坊食晚餐

– Day 6 完 –

10天日本中部自駕遊Day 7：白川鄉一日遊

今日嘅行程主要係去白川鄉。按原定計劃白川鄉應該係旅程第四日從飛騨古川去富山嘅時候順道遊覽，不過當日因為發生誤闖雪山嘅事件，所以白川鄉行程改係今日。

我地住嘅天然温泉加賀の湧泉ドーミーイン金沢唔包早餐，所以今朝出發去白川鄉之前，先到近江町市場食早餐。

我地就係呢間小店食

今日早餐，饅魚飯+燒鮑魚+燒螺

出發前，再買杯熱咖啡係路上飲。

白川鄉

金沢距離白川鄉只有60幾公里，開車一個鐘多D就到。

白川街道係白川鄉大街

白川街道上嘅白川鄉觀光案內所

觀光案內所旁邊係個公營收費停車場，我地先將架車泊好係呢度，不過之後因為保護環境，係白川街道嘅公營停車場已經關閉，自駕車輛可以泊係河對面嘅大型停車場。

先係白川街道周圍行下

跟住過河到對岸

河對岸有個民家園合掌造，不過我地冇入去。

先係呢度食個午餐

食完飯返過去白川街道，最後去埋山上嘅白川鄉展望台。

上去展望台，有穿梭巴士可以坐，不過班次唔多，如果自己開車，可以直接開車上去，不過今次黎唔識路，只係跟住指示牌沿呢條斜路行上去。

展望台可以望晒成條白川街道全景，係必到影相位。

上完白川鄉展望台，今日嘅行程完成啦，我地開車返去金沢。

返到金沢，又去返香林坊一帶行街，

今晚食迥轉壽司

– Day 7 完 –

10天日本中部自駕遊Day 8：長島三井Outlet購物

今日係自駕最後一日，要離開北陸返名古屋啦。金沢同名古屋相距差唔多250公里，直踩要三個鐘先到，超辛苦。

由金沢去名古屋有兩條路可以行，一條係行東海北陸自動車道，呢條路經過富山同岐阜縣嘅山地，好多路段每個方向只有一條車道，如果前面有車行得慢會拖慢速度，而且沿路超多隧道，行起上黎比較辛苦；所以我地選擇另一條，行北陸自動車道經福井縣同滋賀縣到名古屋，呢條路全程係平地，車道較闊，每個方向都有兩、三條行車線，好行好多。

係福井縣嘅休息站休息嘅時候，食返個牛肉包先。