2007年大阪、京都五天自由行（Day 2–游览京都岚山 [Part 1]）

行程：（10月1日，天晴，气温26度）

[6:00]起身梳洗 >> [6:45]从酒店出发坐地铁去梅田阪急车站 >> [7:51]从梅田阪急车站坐电车去京都岚山 >> [8:41]到达岚山，游览岚山公园、渡月桥、天龙寺、竹林之道 >> [10:55]坐嵯峨岚山小火车欣赏嵯峨野风景 >> [11:15]小火车到达龟冈车站，步行至JR马堀车站 >> [11:52]马堀站乘坐JR火车去京都站 >> [12:19]到达京都站，食lunch，游览京都伊势丹空中走廊 >> [13:30]坐巴士去清水寺 >> [13:45]游览清水寺、地主神社、三年坂、二年坂、八坂神社、祇园、花见小路通、河原町 >> [19:30]食dinner >> [20:38]坐阪急电车去梅田 >> [21:22]到达梅田 >> [21:30]坐地铁回酒店 >> [22:00]返回酒店休息

——————–

由于今日行程比较紧密，所以6点就起身，跟住连酒店嘅早餐buffet都唔食就系6点9出发去京都啦。

第一次去日本搭地铁，真系唔系咁识点买飞 ，搅左一轮先至明白，开头仲以为要好似香港咁选择去边个站先，原来系唔洗架。买飞嘅步骤系：(1)先系自动售票机头顶个好大嘅路线图度揾出你要去个站，然后睇下个票价（系大银码果个啊，另一个半价果个系小童票）；(2)入钱（纸币或者coin）落去部自动售票机，跟住有几个按钮会著左灯（每个按钮代表不同嘅票价）；(3)按下显示你要买嘅票价嘅按钮；(4)攞飞同攞返找返嘅钱。其他电车同JR火车嘅买飞步骤都系一样。

因为唔识买飞，所以原来只需约20分钟嘅路程搅左成大半个钟，7点半左右先去到梅田阪急车站，跟住又揾左一轮买飞嘅地方，终于入到车站等坐7点51分开出嘅特急列车，途中仲买左d面包同三文治做早餐添。

阪急电车，其实同地铁、JR火车差唔多样

同搭地铁一样，坐阪急电车或者JR火车唔洗指定买边班车，买左飞入到月台有车就可以上。不过要留意，有d车系站站停，叫普通车，而有d车只停大站，系快车，有好多种，例如通勤特急、快速急行、准急行等等。普通车比快车慢好多，例如由梅田去桂站，普通车要1个钟，而快车只需要36分钟，差唔多快一倍，所以上车前记得睇清楚，揾架快车黎坐。

由梅田去岚山冇直通车，要先坐阪急京都本线去桂站，然后转岚山线去岚山，全程大约45分钟（坐快车，唔计等车时间）。其实去岚山仲可以选择坐JR火车去京都站，然后由京都站坐JR火车去岚山，时间加埋都系大约45分钟，不过票价比坐阪急电车贵一倍有多（470円）。

阪急电车桂站月台，趁未有车黎系呢度食埋个三文治早餐

大约8点8左右终于到达岚山车站，一落车感觉空气好清新，好正！

阪急电车岚山站

出左岚山站直行大约10分钟就到岚山公园，周围风景好靓，唔识点形容，大家睇相啦。

岚山公园两傍嘅樱花树，可惜唔系樱花季节

岚山公园内山村小溪

大堰川

大堰川，前面系渡月桥

岚山公园，前面系渡月桥

渡月桥，原来行得车架

渡月桥近镜

岚山街头

京都人力车

人力车夫，个个都好有型靓仔架，女士一定好冧
穿过岚山公园再过埋渡月桥，向前行就系世界文化遗产之一嘅天龙寺。入面风景同建筑好靓，特别系中间个水池，好优雅，大家继续睇相啦。

天龙寺入口

天龙寺入面

天龙寺法堂，入去要除鞋换拖鞋

天龙寺法堂入面

天龙寺法堂傍边水池

天龙寺法堂傍边水池，如果系红叶季节坐系度欣赏红叶一定好正

天龙寺内堂

穿过天龙寺内堂，好快就到左北门出口。出左北门，左手边就系有名嘅竹林之道。再走过竹林，行5分钟就到嵯峨小火车嘅岚山站。

竹林之道

常寂光寺，系小火车岚山站附近，因时间关系只系门口影两张相就走

常寂光寺

嵯峨小火车岚山站

游览岚山公园、渡月桥、天龙寺、竹林加埋大约要用2个钟时间，去到嵯峨小火车嘅岚山站啱啱好系10点9左右，去埋洗手间等车就啱啱好。嵯峨小火车行走嵯峨站至龟冈站之间，全程要25分钟，你可以由嵯峨站坐到龟冈站落车，亦可以倒转由龟冈站坐去嵯峨站，视乎你嘅行程安排同买到边班车车飞。岚山站系小火车从嵯峨站出发后嘅第二个站，因为游览完天龙寺同竹林之后可以顺路黎到呢度，所以系呢度上车就最啱，而且嵯峨站至岚山站之间冇咩风景睇。