2008年东京春季赏樱＋温泉之旅（第五天 [1]） – 小田急火车、箱根、箱根神社

2008年3月30日（天阴，下午有雨，气温7~13度）

行程：箱根汤本 _ 箱根神社 _ 芦之湖 _ 仙石原一之汤温泉旅馆

今日好兴奋啊，因为接住两日会离开东京去箱根游览，其实小弟对郊外地方比较有兴趣，反而大城市就麻麻地，所以对接住呢两日嘅行程好期待，可惜天公不造美，系东京嘅时候好地地，但系一去到箱根就落雨，仲系要落到我地上火车离开果阵就停，咁玩野，系唔系唔欢迎先？

去箱根一般都系坐小田急浪漫特快列车，大约需时一个半钟。而坐浪漫特快除左可以只买单张车飞外，亦可以用箱根Free Pass。因为用箱根Free Pass除左可以坐来回两程小田急浪漫特快之外，仲可以任坐箱根地区之内嘅所有交通工具，因为箱根D交通工具都几贵下，所以计落用Free Pass都好抵，不过抵几多就冇计过啦。

虽然攞住箱根Free Pass就可以上车，不过如果想有指定座位坐，就要用多870円买埋个指定席。其实唔买指定席一样都可以上到车，不过就唔一定有位坐，除非有D位冇人坐你先可以坐架，唔系就要企囉。

我地系2月底已经用e-mail订左呢日上午9:00去箱根嘅浪漫特快嘅指定席，虽然咁早订，但系都只系得第4卡车厢嘅位，坐唔到第一卡展望席，而全架车好似只有8卡车，即系我地坐中间。原来9点钟果班车真系所有座位都full晒，可能星期日关系，好多日本人会即日来回去玩一日。

其实用email订左位之后只需要系开车前45分钟去到小田急旅游服务中心攞飞就可以，不过我地之前几日好多时都会经过，所以系前一日趁住有时间就先去左小田急旅游服务中心攞飞同买定箱根Free Pass。

小田急旅游服务中心就系新宿駅西口小田急百货地下果层，系行人路小田急百货入口一入去就见架啦，好易揾，而JR站就系再落一层，所以如果由西口行去坐JR都会经过小田急旅游服务中心。

小田急旅游服务中心开8: 00a .m至5:00p.m，我地前日朝8点几去到好彩唔系太多人，去到只需要俾返张订位嘅email printout佢，就可以攞到所订嘅坐位嘅车飞架啦。用email订位嘅时候会要求你俾信用卡资料做确认，不过就唔会Charge你张卡，车飞嘅钱会等你去攞飞果阵先用现金俾架。

箱根Free Pass有分“两日Free Pass”同“三日Free Pass”两种，价钱分别系5,000円同5,500円。Plan行程果阵系佢网页睇到“两日Free Pass”只可以用系星期一至星期四出发，如果系星期六日就只可以用“三日Free Pass”，但去到小田急旅游服务中心，佢地话冇分架，“三日Free Pass”可以三日内任搭箱根交通工具，而“两日Free Pass”就可以两日内任搭，星期六日同假期都一样，所以我地买左“两日Free Pass”，比budget用少左500円。

从箱根返东京果程我地就冇买定指定席，因为回程时间未决定。由于小田急火车班次都唔少，而且我地又系星期一先由箱根返东京，所以可以等到到时回程先买都仲有位。

左边系箱根两日Free Pass，右边系指定席车飞

小田急浪漫特快月台就系小田急旅游服务中心右边（如果你面向服务中心个counter），直去入闸就系。

因为我地由箱根返东京之后都会住返系新宿太子，所以朝早Check-out后只须将行李寄存系酒店，等回来再攞返就得啦，而去箱根就只系带左好少野，同平时出街差不多，因为一来唔想系箱根游览时太多负担，二来由于只系住一晚冇必要带咁多野去啦。

因为一早已经摸清楚搭车地点，所以我地系酒店Check-out后亦好脂油咁系对面间M记享受返个早餐先，到差唔多时间先慢慢行去小田急月台等浪漫特快。

我地坐果班小田急浪漫特快列车

车厢之内

沿途风景

本来谂住坐小田急途中会有机会见到富士山，点知今日天气真系麻麻，天阴阴，冇办法见佢一面。10点半火车准时到达箱根汤本。

从车厢上影箱根汤本

箱根汤本附近，对面座Building系箱根汤本富士屋

箱根嘅行程点Plan一般要睇你住嘅酒店所在位置黎决定，箱根嘅主要景点（箱根汤本 >> 小涌谷 >> 强罗 >> 大涌谷 >> 芦之湖 >> 箱根町 >> 箱根神社）基本上顺住行系围成一个圆圈架，如果只系去一日可以顺时针或反时针走都得，行一圈可以坐晖晒包括登山电车、缆车、吊车、海贼船、巴士等交通工具，再回到箱根汤本坐小田急返东京。

如果会住一晚，就要睇你住边度黎安排行程啦，我地今次Book左呢间叫“仙石原一之汤”，位于仙石高原，我估叫得高原都应该系箱根最高嘅地方挂。一之汤系一间连锁温泉旅馆，系箱根有几间一之汤，而每间都唔系好大，只有10至20间房左右，不过口碑都唔错架。

因为旅馆要等到3点先可以Check-in，所以去到箱根第一日会先行左一D景点再返旅馆Check-in同浸温泉。我地计划第一日先去箱根神社同箱根町，再坐芦之湖海贼船游览芦之湖，然后就返旅馆浸温泉。

箱根神社系芦之湖傍边，附近系元箱根，由箱根汤本去箱根神社可以直接系火车站外坐登山巴士去，车程大约要45分钟时间。但系我地选择先坐登山电车去小涌谷站，再系果度转坐巴士去箱根神社，车程加埋大约都系差唔多。选择先坐登山电车系谂住会沿途见到樱花架，因为睇过书同网页嘅相真系好靓，点不知今次真系好失望。可能天气冻嘅关系，系箱根山上一朵樱花都未见过，可能要到4月中先有樱花睇。

小田急浪漫特快落车之后，对面月台就系登山电车月台，唔洗走出车站架。

箱根登山电车，呢张系系小涌谷车站影架

登山电车车厢内，唔好以为咁少人啊，呢张相系第二日由强罗坐返箱根汤本影架，所以先咁少人，由汤本开出嘅真系超多人架，车厢入面好似沙丁鱼咁迫实晒架

由窗口影出去登山电车转弯个样

登山电车行走箱根汤本至强罗嘅山路，不过条路轨唔系一条过架，要斩开几段黎行，好似之字型咁行走，行完一段就要系转轨处等信号，然后再反方向由另一边继续行，所以行下停下咁都用左好耐时间先到小涌谷，呢度系中途站，我地就系呢度落车转搭登山巴士。

登山电车小涌谷站附近都几静下，只得我地三个人系度落车，可能已经系山上，一落车真系比山下冻左好多。系车站行出路口就见到有巴士站，不过上车前要搅清楚方向，唔好等错车啊。其实只要睇下车站个牌上面写住嘅下一站嘅站名，再同路线图对照下就好清楚架啦。

小涌谷駅巴士站

我地等左一阵已经有架巴士黎左，架巴士系由箱根汤本开出，途经小涌谷再去箱根町总站，睇佢车头写住箱根町就知架车啱啦。箱根嘅巴士上落都系前门，落车先俾钱，有箱根Free Pass当然唔洗俾啦，只需要落车时Show俾司机睇就可以架啦，不过上车前要等落车嘅人落晒车先。好彩呢个站有几个人落，啱啱好有几个位俾我地坐。

之前坐登山电车只系见到车两边嘅树林，而家坐巴士先可以欣赏到箱根嘅景色，其实箱根主要系山地，D公路都系山路，其实同台北嘅阳明山差唔多。

巴士途经一间酒店，好似几靓

巴士上每到一个站之前都有显示站名，不过有D站相隔好近，所以一路行一路睇住张路线图就唔怕会坐过站啦。同澳门巴士一样，到站想落车只需要按钟就可以。

去箱根神社最近系元箱根落车，再行10分钟就到神社入口架啦。

由元箱根行去箱根神社途中嘅鸟居

箱根神社入口

从入口行到箱根神社都仲有一段路程

想去到箱根神社就要行埋呢段石级先啦

终于到左箱根神社

其实日本D神社都大同小异，箱根神社都冇咩特别野睇。唔知点解，虽然系箱根汤本见到好多游客，但当去到其他景点时游人就只得小猫三几只，唔知D人走晒去边？

箱根神社对开嘅芦之湖傍边嘅鸟居

从海贼船上影到嘅鸟居，因为果日落雨，好有烟雨濛浓嘅感觉

大约1点钟左右我地行完箱根神社，原先计划系会顺路去杉木并林同埋箱根恩赐公园，但系因为箱根嘅樱花未开，所以取消去箱根公园，而至于杉木并林，因为坐巴士时见到箱根山上好多地方都系好高大整齐嘅杉木林，所以睇过觉得一般冇乜好睇，而且个天开始有D想落雨咁，所以亦都决定取消。

于是我地去返元箱根，系返落车个巴士站坐车直接去箱根町，准备坐海贼船啦。

好彩冇按原先计划行，因为坐巴士由元箱根去到箱根町都唔系近，如果行路都几辛苦架。巴士去到箱根町时个天真系开始落雨，MY GOD！