2008年秋季京阪神红叶＋白浜温泉之旅（第五天） – 海舟早餐、三段壁、千叠敷、ToreTore市场

2008年11月29日
海舟 > 三段壁 > 千叠敷 > ToreTore市场 > 梅田

 
第二朝起身之后，先浸个晨早温泉先，然后就系早餐时间啦。

早餐有日式和西式两款，日式好食好多，而且仲好大堆头

西式早餐，无日式咁多野食

食完早餐之后，又再浸多次温泉，玩到11点够钟先Check-out走人。临走时系佢个手信店买左一袋二袋手信走，其实同旅游点既手信店比，系海舟度买既仲平一D架。

 
其实白浜都唔系太多地方好行，离开左酒店之后我地分别去左三段壁和千叠敷两处景点。由于自己开车，所以都好方便，如果要等巴士就真系几麻烦囉。

 
三段壁，不断有团客阻住影相

下面个山洞就系三段壁洞窟，上面栏杆都冇支架，行埋去都好牙烟

下面就系千叠敷啦

由于千叠敷既石头冇咁坚硬，所以周围都见到好多到此一游既刻字

去完三段壁和千叠敷两处景点之后，顺路亦去左海中展望塔影返张相，不过冇入到去。

 
远处就系海中展望塔啦

海中展望塔就系梅樽酒店隔离，入去酒店停车场就系架啦

同日本其他旅游景点一样，白浜各个旅游点都有印章可以俾人盖章，记得周围揾下盖齐D印章做个留念。

 
游完几个景点之后时间都已经一点几，系时候食dinner啦。因为系白浜町内好似见唔到有合心水既食店，所以都系再次去返ToreTore市场。可能系星期六既关系，ToreTore市场明显比起昨日热闹，唔单止人多左好多，而且海产既数量和种类亦多好多。而且今日亦俾我地发现系市场出面有一个可以租炉BBQ既地方，按人头计每人俾300円就可以租佢个炉黎BBQ，食材当然要自己系市场入面买啦，不过就唔俾带饮品入去，要饮野就唯有同佢买囉。

 
生蠔150円一件，好新鲜

咁大只蟹都系2000円左右一只

烧左好多贝壳类海鲜

食完BBQ之后大约三点钟，我地就起程开车返大阪。今次行行下觉得路牌指示同个GPS导航指示有出入，所以跟左个路牌指示黎行，点知就出事，最后兜左几条路先行得返正途，下次都系信个GPS好D。

 
因为想赶系天黑前返到大阪，而且因为昨日行阪神高速好大风，所以决定回程时全程都行阪和自动车道。由田边至和歌山市之间既阪和自动车道大部分路段只系得一条线，而且路面又几窄，行得慢阻住后面既车又唔好意思，行得快又好危险，真系几大压力。而且因为系山区既关系，呢段路需要经过差唔多15条隧道，仲要系过完一条接住又一条，而且多数都系超过1千米 长既，最长果条有成3千几米，行完呢段路真系身心疲劳。

 
由田边至大阪行高速公路大约用左两个半小时，包括阪和自动车道同一段系大阪市内既阪神高速，路费加埋大约要4千几円。去到大阪出返一般路面时已经系六点半，因为租车时约左七点半还车，谂住仲有大把时间啦，点知…..
因为还车时要入满油，而系取车时工作人员俾左系梅田附近一间油站既地址同电话我地，所以输入GPS谂住佢会带我地去啦，点知我地用左半个钟都仲未揾到。唔知系大阪市既道路改得快定系架车个GPS资料好耐冇update，我地照住佢行但就成日俾佢点左去D冇既路，有次GPS叫我地转入一条路，但系果条路明明系一条火车轨，唔通叫我地追火车咩。之后当我地架车行走系大阪駅附近条大路时，个GPS只显示我地系一片空地上，真搅笑。

 
最俾佢激死既系当我地几经辛苦去到GPS指示既位置时，个GPS显示已经到左，但周围所见并冇油站既踪影。最后因为怕迟左交车，所以决定唔入油就咁返去还车。由于冇入满油，所以要由得租车公司黎计。其实佢都只系用目测既方法，睇一睇个油表支针去到边黎估你用左几多油。我地两日总共行左294公里 ，大约用左五分之三缸油。去到Counter计数要成4千1百几円，我估如果去油站入都唔洗3千。

 
因为系大阪会住返同一间酒店，所以还完车就去返格兰比亚酒店Check-in同攞返行李，然后就出去食dinner啦。而今晚既dinner系去位于梅田既堂山町本阵食和牛，由酒店行去都好近。呢间野上次去大阪时食过觉得好味又抵食，不过可能系自然规律，同鱼心寿司一样第二次食总系觉得冇咁好食。如果大家有兴趣去，记得print返张免费赠饮既coupon带埋去啊。

 
我地只系叫左呢个套餐，盛惠5200円

食完和牛之后仲有时间，于是入去Hep Five行下作为今日最后一项节目，因为时间已经几晏，其他店铺都已经关门，就只得最高果层既食店有开。

 
系Hep Five楼上一间甜品店食既人气雪糕，盛惠900円