2008年秋季京阪神红叶＋白浜温泉之旅（第四天）I – 白浜自驾、ToreTore市场

2008年11月28日
梅田 > 白浜 > ToreTore市场 > 圆月岛 > 海舟

 
今次关西之旅既重头戏出场啦…..，就系自己由大阪开车去140公里外既和歌山县白浜町浸温泉囉。

 
今次计划系白浜停留两日一夜，原本个计划系打算由大阪坐明光巴士去白浜，并冇自驾车既计划。最后决定自己开车，系系出发前一个星期作出既决定，事缘系出发前睇左好多人既Blog，发觉好多人都系日本自驾车，有D仲系第一次去日本就自己开车添，睇左人地介绍，感觉系日本开车并唔因难，最紧要既系日本同澳门一样都系右钛，完全冇适应上既困难。不过因为自己一直揸开棍波车，而日本出租既车全部都系自动波，都有D担心适应上会唔会有问题，好彩揸落又真系完全冇问题㖞。

 
另一个决定自驾车既原因，系因为系租车代理ToCoo既网页见到日产租车咁啱做紧promote，只需要7,980円就可以租日产March两日一夜，个价仲系包埋保险添，比正常起码平左2至3千円。

 
其实同坐其他交通工具去白浜相比，自驾车都唔算系贵，下面系三种交通工具费用既比较。

 
自驾车：租车7,980円+油费3,000円+高速公路费8,000円 = 大约19,000円
坐JR：（JR来回车票10,000円+白浜巴士乘车券1,300円）x2人 = 大约22,600円
坐明光巴士：（明光巴士来回车票5,000円+白浜巴士乘车券1,300円）x2人 = 大约12,600円

 
如果两个人去，自驾车费用仲平过坐JR，虽然同坐巴士比贵左6千几円，但系因为系白浜町内巴士班次唔系咁密，坐车比较困难，自己开车会方便好多，贵D都值得架，而且对于澳门人黎讲，冇咩机会可以揸长途车，而且仲系郊外添，所以可以试下系日本开车都算系一项好好既节目黎架。

 
系日本租车，通过ToCoo真系又方便又抵，ToCoo系一间租车代理，通过佢租车，比起直接向租车公司租一般都有一定折扣架，而且ToCoo既网页系英文，操作好方便。租车步骤大致如下：
1. 进入ToCoo主页，Click入你租车的城市；
2. Click入你打算取车的租车公司分店；
3. 选择要租的车辆型号，Click右边红色的“Rental charge & Reservation”按钮；
4. 选择租车Season，输入取车和还车日期和时间；
5. 按下“Simulate”按钮计算租车费用【系统会计算出三个费用，分别是Calendar System（按日租计算）、Time System（按时租计算）和Normal Rental Price（没有折扣的费用）】；
6. 比较Calendar System和Time System的费用，然后按下费用较低的按钮（通常按Calendar System计算的会较低）；
7. 输入各项资料【取车和还车地点、日期和时间，人数，是否需要GPS（一定需要）、CD Player，是否要非吸烟车（日本租车no smoking车好似比somoking少好多），其他设备要求，姓名，电话，日本酒店名称和电话，通信电邮（不能是hotmail或yahoo），国际车牌编号，信用卡资料，日语程度，其他特别要求等等】；
8. 确定资料无误后，按“Send”按钮寄出租车Booking。

 
通常第二个工作日就可以收到电邮，回复是否有车，如果confirm你有车，租车过程就算完成。填写租车Booking时可以唔填国际车牌先，我今次都系等佢覆左有车先去交通事务局申请国际车牌，一个工作日就有架啦。不过出左国际车牌之后，记得用电邮通知ToCoo你个国际车牌Number啊。

 
一切完成之后，就要将ToCoo Confirm你租车Booking既电邮Print出来带去日本，到取车时需要出示张电邮Print-out、护照、本地车牌、国际车牌。租车费用需要在取车时一次过俾晒，可以用cash或信用卡。另外，如果系取车日的一个星期内取消租车，系需要按规定charge一定费用架。

 
讲左咁耐租车手续，都系时间讲返今日行程啦。

 
今次计划系白浜玩两日一夜，即系今晚会系白浜住一晚，所以需要先系格兰比亚酒店Check-out先。而且约左今朝8点半去租车公司取车，所以要一早起身，Check-out后将大件行李寄存系酒店之后，就行去日产租车公司取车。因为寻晚已经揾定位置，所以由梅田地下街行过去好快就到。

 
位于大阪第一酒店既日产租车公司Counter

 
去到俾张租车Booking既e-mail Print-out佢，跟住佢地系电脑度Check完就会问你要埋护照、国际车牌同澳门车牌去影印。搅掂之后就会Print张单出来收租车费用，两日一夜租车盛惠7,980円。

 
然后个职员会同你解释几样重要事项，包括还车前要入满油，入D咩油，附近油站地址，同埋遇到交通意外要点做等等，其实都唔洗点听，因为佢讲既野都有张用英文写既资料单张俾你，你可以之后慢慢睇都得。OK左之后个职员就带我地落去停车场取车。

 
租车公司既车场位于大阪第一酒店地库停车场，有好多架日产March

 
将会陪住我地两日既March，不过对于黑色车身唔系太钟意囉，问佢可唔可以换其他Colorful一D既车，佢话可以不过其他颜色既都系吸烟车，最后冇法子都系要呢部。部车虽然只得1000cc，不过行咁长途都绝冇问题，但系上斜路就冇乜力囉。


确定左要部车之后，就先睇下车身有冇花，睇左一阵都发现有两处小小花，跟住佢会系本簿度记低佢，果部簿之后会放系部车度架。不过其实还车时佢地都唔会Check部车有冇花，所以如果冇发生交易意外，我估即使有整花小小佢地都唔会点理架啦。

 
之后佢会教你点用个GPS，其实都好易，一学就识，而且车上仲有张用英文写既使用说明，可以慢慢参考。有左个GPS，基本上都唔洗再用地图架啦，不过Plan行程既时候最好睇下地图先，咁起码可以对之后既行车路线可以心中有数先。下面个地图网几详细架，系Plan行车路线既好帮手：http://www.mapion.co.jp/。

 
由去到Counter到搅掂开车走人大约用左半小时。

 
开车啦！第一次系外地开车，真系有D紧张。我地第一站系白浜ToreTore市场，系GPS输入电话号码之后，好快就有条行车路线出黎，跟住行就OK架啦。不过啱啱开始时真系唔系太顺利，一来唔系咁习惯睇个GPS，二来唔知系唔系返工时间，大阪市内D车都开得几快下，搅到有几个街口都转唔切线，最后兜左好多路先揾到个上阪神高速既入口。系入口度又搅左一轮，同两个阿伯鸡同鸭讲左一轮之后，先知原来上阪神高速系要系入口俾左钱先，我地上呢段路收费700円。

 
第一次行高速公路，本来谂住行阪神高速沿住海岸行可以睇下海景，点知原来海边真系好大风，几惊我地架车仔会被吹走。

 
阪神高速，好惊前面架货车D车跌落黎，好彩最后佢转左去神户方向

 
想试下系阪神高速行车既感觉，可以上佢网站玩下。

 
头先俾既700円路费，只系去到泉大津为止，由泉大津去到泉佐野仲要再俾多500円架。去到泉佐野要出返一般公路，再转上阪和自动车道。阪和自动车道既俾钱方法，系先系入口既闸口（一定要行一般闸口）按一张飞，就好似入停车场咁，再系出口俾张飞职员，然后俾钱就得架啦。想知道高速公路收费，可以用下面两个网页黎Check下。只需要系地图上选择出发地同目的地，就可以计算行车时间同埋路费架啦。
日本高速公路：http://www.driveplaza.com/dp/SearchTop
西日本NEXCO：http://search.w-nexco.co.jp/

 
阪和自动车道，沿途山上既红叶好靓

 
纪川SA，阪和自动车道上有几个停车休息站（叫SA），其中纪川SA算系较大既一个，佢位于和歌山市附近，可能因为位于大阪与田边既中间位置，所以好多人都选择系呢度停车休息架

过左和歌山市之后，南纪地区基本上都系山地，所以阪和自动车道由和歌山市至南纪田边之间，有大大小小10几座隧道，最长既有3千几米架，而且隧道每边只得一条行车线，路面又窄，两条行车线中间又使用铁柱隔开，以时速80至100公里行驶都咪话唔惊……
 

因为一来想体验下行国道既滋味，二来一直行高速公路精神太紧张，三来想俾少D高速公路费，所以我地系去到有田就离开阪和自动车道，改行42号国道去白浜。国道一般车速限制为60公里，部分多人既地区会限制40公里，不过系郊外由于车唔多，又冇咩人，所以好多时行80公里都冇问题。虽然行国道路程会远D，再加上车速慢D既关系会用多左时间，但个人觉得行国道比行高速公路舒服好多，压力都少D。

 
40号国道上

接近白浜既40号国道上大部分路段都沿海边行驶，风景好靓架。

 
进入田边市区，好快就到白浜啦。

 
终于到达白浜ToreTore市场啦，呢度有大片停车场免费任泊。

 
由于系大阪行错路，用左差唔多20分钟先上到高速公路，再加上中间改行国道，同埋系田边又行错路，所以最后用左4个小时先到达白浜第一站ToreTore市场，比预计慢左成1个钟。

 
ToreTore市场正门

 
ToreTore市场并唔算大，入到去一眼睇晒，大致可分为三部分，包括海鲜市场、手信、食店。

 
ToreTore市场海鲜档

 
ToreTore市场吞食鱼档，好似11点钟有㓥吞食鱼表演架。

 
ToreTore市场内既食店

 
今日午餐，系海鲜档买左之后可以坐系食店度食

 
系白浜各个景点卖既手信基本上都差唔多，只系包装花纸唔同，不过价钱最平既应该都算系ToreTore市场入面既手信店。我地系ToreTore市场已经买左一袋二袋手信，好彩有车，如果要坐巴士都真系唔知点算，所以自驾车真系好正啊。

 
食完野又买左手信，系时间起程去温泉酒店啦。我地今晚会住既酒店叫海舟，不过可能间酒店只系开左一年太新，输入电话号码之后个GPS都揾唔到佢既位置，好彩佢只系梅樽酒店附近，所以输入梅樽既电话之后跟住GPS去左梅樽先，再向前行冇几耐就揾到海舟啦。
未去白浜之前以为白浜系海边既平地，点知去到发现同想像好唔同，原来白浜主要系山地，而且都几偏僻下，市镇之内真系唔系太多店铺。