2015年韩国首尔+釜山赏樱之旅(Day 5) – 釜山南川洞樱花路、札嘎其市场
短短三日嘅釜山行程今日就要结果啦,今日返首尔嘅KTX买咗下午四点半车飞,所以仲有六、七个钟可以用,而今日嘅行程主要会去釜山另一个赏樱热点南川洞樱花路。
嚟釜山三日落咗两日雨,今日要走,釜山终于好天啦。望出窗外天气好好,仲可以见到远处山上嘅樱花添。
喺酒店先Check-out再寄存好行李,出到街果然冇落雨,路面亦都好干爽。
出发囉,不过唔系直接去南川洞,而系先去中途站地铁大渊站附近嘅双胞贻猪肉汤饭食早餐。喺大渊站3号出口行出路面之后,行返转头系大马路转左,直行三个街口大约150米就到。
下面系双胞贻猪肉汤饭嘅位置地图
餐牌有英文,不过睇咗都唔知有D乜,我哋点左最贵嘅Boiled pork with rice,一人7,500won,要咗两人份量,盛惠15,000won,现场所见似乎大家都系点呢款。
呢个set,猪肉、汤、饭三样嘢系分开嘅,要食猪肉汤饭就自己捞埋佢,又可以分开净食猪肉,当系𩠌咁食饭再饮汤,又可以用生菜包住猪肉食。
双胞贻猪肉汤饭就喺南川洞附近,坐地铁只系两三个站。南川洞樱花路喺南川站同金莲山站呢两个地铁站中间,喺事旦一个站落车行过去都得,我哋选择喺金莲山站落车行过去。由金莲山站过去南川洞樱花路嘅优点最少有两个,第一个系由金莲山站去南川洞樱花路嘅路比较好行,亦容易认路,唔怕行错路。第二个优点系由金莲山站去南川洞樱花路会经过广安里海水浴场,可以顺便睇一睇呢个都算系旅游景点嘅沙滩,亦可以见到沙滩对开嘅广安大桥。
从金莲山站3号出口出去地面,呢个出口有升降机。
出到地面会见到呢条向海边倾斜嘅石仔路,沿住呢条路一直行就系广安里海水浴场。
呢个沙滩就系广安里海水浴场,范围都好大,对出海面上嘅条桥就系广安大桥。
面向海右手边近海果几座民居大厦就系南川洞樱花路所在嘅地方啦
沿住沙滩行到路口再转左
呢条就系南川洞樱花路啦,又系一条迷人嘅樱花隧道。呢条马路虽然唔系交通要道,但不时都有车辆行驶,影相嘅时候要留心,确保自己安全之余都要唔好阻住人哋啊。
南川洞樱花路附近有南川站同金莲山站两个地铁站,所以可以行去其中一个站坐地铁。如果要去返金莲山站,可以有两条路行,一条系沿嚟嘅路行返去金莲山站,另一条系喺樱花路中段向西行,再沿斜路转右行出大路。
如果要去南川站,亦有两条路可以行,第一条系沿住樱花路向南走到尽头,再沿住海边条大路行到Mega超市,然后过马路喺Mega超市旁边条小路一直行出去就会去到南川站嘅3号出口。呢条路嘅优点系可以行晒成条樱花路,而且系平路唔使上斜,但需要嘅时间就耐少少,如果唔赶时间可以行呢条。另一条路系喺樱花路中段向西行,再沿斜路转左行出大路,呢条系我哋选择嘅路线。
下面张地图系南川洞樱花路嘅位置同埋我哋嘅步行路线
由樱花路向西行到呢度,转右上斜条路可以行返去金莲山站。
转左呢斜条路就可以行去南川站,亦即系我哋行嘅路线。
返到南浦洞仲有时间,可以去埋札嘎其市场兼食埋午餐。札嘎其市场就系BIFF广场对面,行过马路对就系。
游客到札嘎其市场主要都系去呢座市场大楼二楼嘅食店食海鲜
两个人食唔到太多,只系点咗三样嘢,不过除咗只蟹算系OK之外,其余两味嘅整法好唔掂,尤其系鳗鱼,呢个韩式整法完全入唔到口,最后成碟原封不动放喺度。三样嘢食咗130,000won,感觉唔系太值。
市场后面可以睇到釜山港,影返张相留下念。
要离开釜山啦,三日嘅行程实在太短,仲有好多地方都未去,下次再嚟。
要坐三个钟火车,买定D小食车上食。
今日喺釜山天气已经由雨转晴,点知旧雨云跟咗我哋返首尔,到首尔嘅时候倾盘大雨,几乎出唔到去食dinner。
最后又系喺明洞食返第一晚食嘅安东酱油粉丝鸡,不过系喺另一间分店。
饭后甜品系买返牛奶条雪返酒店食
Day 5 完,返回2015年韩国首尔+釜山赏樱之旅目录。
相关文章:
- 住@首尔明洞Loisir Hotel Seoul Myeongdong
- 住@首尔明洞天空花园酒店
- 住@首尔明洞王子酒店
- 住@釜山Hotel Aventree Busan(亚云树酒店)
- 首尔明洞酒店推介
- 韩国外国人专用火车通行证KR Pass
- 韩国MobilePOP Pocket WiFi Router使用分享
- 如何网上预约首尔昌德宫秘苑导赏团门票
人气文章:
Klook / Kkday最新优惠码
Agoda最新10%折扣代码
Hotels.com最新折扣代码
Trip.com最新优惠码
永安旅游最新推广码
乐天旅行最新住宿折扣券
乐天旅行最新租车折扣券
日本乐天市场最新优惠券
Klook.com
如果喜欢这篇文章,请点个“赞”吧!