2011年沖繩快閃觀禮之旅(Day 1[下篇] – 那霸國際通、第一牧志公設市場)

去國際通除左行街買手信之外，另一個重點就係去第一牧志公設市場。第一牧志公設市場就係國際通中段，係國際通同沖映大通嘅交界處，有一條叫市場本通嘅橫街，裡面係售賣沖繩特產、雜貨嘅地方，由呢度行入去就係第一牧志公設市場。

第一牧志公設市場其實只係一個好細嘅市場仔，感覺上同日本本土嘅市場好唔同，反而有D似台灣嘅街市，所以並冇乜嘢特別好睇。

市場分為兩層，下層主要賣海產，而上層係食店，可以係度食嘢，亦可以係下層買左D海產上黎叫食店幫你整。

雖然就到食晚餐嘅時間，不過我地都係下層海產店買左D海鮮黎試下，有帆立貝、甜蝦、海膽同海螺，不過唔知係唔係太晏，D刺身並唔係太新鮮。

食完刺身做點心，我地再係附近行下。每次去日本都習慣行下藥房，不過係沖繩就好少見到藥房嘅蹤影，行晒成條國際通，都只係係第一牧志公設市場附近呢條平和通商店街入面見到有一間。

雖然係12月冬天，不過沖繩天氣都唔會好凍，氣溫大約都係15度左右，日頭只需要著一件薄薄地嘅長袖衫，甚至短袖都OK，入夜之後只要著多年薄褸就已經可以。而天黑嘅時間就同日本其他地方差唔多，大概5點半就開始天黑啦。

因為係那霸只留一晚，而且今晚又係係沖繩嘅第一餐，所以打算食好D。聽講沖繩嘅石垣牛同Aguu豬都出名，而呢間叫"守禮"嘅食店，旅遊書介紹係那霸食石垣牛同Aguu豬最好嘅一間，見佢介紹得咁正，就試一試啦，雖然價錢幾貴下。不過，經驗又一次證明，信旅遊書有六成機會撞板嘅呢個定律係冇錯架，尤其係關於食方面。

"守禮"係國際通有兩間分店，一間係國際通入口附近，而我地食果間位於平和通商店街斜對面，即係旅遊書介紹果間。

"守禮"嘅餐牌有中文版，唔怕會點錯菜，因為主打係石垣牛同Aguu豬，所以我地點左一人一個set，總共8個set，一半係石垣牛烤肉套餐，另一半係Aguu豬涮涮鍋套餐。Set嘅份量其實唔多，一個set未必夠一個人食得飽，不過價錢就超貴，最平果種一個set都要4,200円。最大問題係食物嘅味道只係麻麻，石垣牛完全冇牛肉味，口感亦差，Aguu豬口感好D，不過味道亦唔好得去邊。總概黎講：唔值。

– Day 1 完 –