沖繩自駕遊：建議 + 4天快閃行程、景點分享

沖繩是日本面積最小的縣，面積只有2,200多平方公里，比香港還少，只有香港面積的80%。不過沖繩本島地形狹長，從南部的那霸機場至北部的美麗海水族館距離接近100公里，開車需時1.5至2小時。基本上，在沖繩旅遊一般有5天至6天就可以，不過如果時間有限，來個4天快閃旅行也可以。這裡就跟大家分享一下我上次用4天時間，在沖繩自駕遊的路線和行程。

 

沖繩自駕遊：行程規劃建議

 

雖然沖繩面積不大，但如果時間充足，即使留8天也不怕沒有地方去，我最近帶女兒到沖繩親子遊就去了8天。

 

沖繩值得去的主要景點有：

• 那霸國際通
• 波上宮
• 泊港漁市場
• 首里城
• 美國村
• 殘波岬燈塔
• 琉球村
• 萬座毛
• 海中觀景塔
• 沖繩美麗海水族館
• Junglia Okinawa

 

Junglia Okinawa是在2025年新開的主題樂園，需要有一整天時間玩，如果打算去Junglia，建議在最好在名護市住宿兩晚。

 

如果以上景點都去，建議最好有8天，最少也應該安排7天。如果只有6天或5天，又或者好像我上次的4天快閃，就只能挑選當中幾個重要景點去玩。

 

 

沖繩自駕遊應該在那霸機場取車還是在那霸市取車？

 

那霸機場取車

 

那霸機場的地方不大，所以租車公司都不是設在機場裡面或旁邊，而且機場內也沒有櫃台。租車公司機場分店，都設在與機場有一段距離的周邊地區，下飛機後需要打電話聯絡租車公司到機場接你到店舖取車。

 

如果你打算一下飛機就直接開車到北部，最後才返回那霸市，那就一定要在機場取車。另外，如果是親子遊，同行有低齡小朋友或高齡長者，在機場取車也比較方便。

 

日本主要租車公司在那霸機場都設有分店，例如Toyota Rent a Car、Nissan Rent a Car、Times Car Rental、OTS Rent a Car、Budget Rent a Car、Orix Rent a Car、Sky Rent a Car、Nippon Rent a Car等，另外還有為數不少的小型地方性租車公司。

 

↓ 這些文章您可能也有興趣，看完本文後可以繼續閱讀 ↓ ► 日本自駕遊超完整攻略：租車、保險、行程規劃、費用預算、高速公路Pass詳細介紹 ◄ ► 日本租車公司：推薦、比較、選擇與租車教學 ◄ ► 日本租車保險：詳細說明、保障範圍與保費比較 ◄

 

那霸市區取車

 

如果你下飛機打算先到那霸市區遊玩，之後再到北部景點，那就可以在市區取車。另外，如果在旅遊旺季在那霸機場的租車店租不到車，也可以試試市區的租車店，市區分店比機場店較容易有車輛庫存。

 

那霸機場與市區的距離很近，而且有ゆいレール單軌電車連接機場與市區，所以從機場去市區的酒店，又或者從市區的酒店去機場，都很方便。

 

不過，有兩點經驗需要留意，第一是那霸機場的候機樓與單軌電車那霸站之間有一點遠，雖然有行人天橋連接，但對於行動不便的人士仍然有點辛苦。第二是ゆいレール單軌電車的行車速度很慢，從那霸機場站到國際通的牧志站需要20多分鐘。

 

那霸市區的租車地點，最方便又最集中的，是單軌電車おもろまち駅旁邊的T GALLERIA商場DFS沖繩那霸店，Toyota Rent a Car、Nissan Rent a Car、OTS Rent a Car、Orix Rent a Car、Sky Rent a Car等租車公司都在這裡設有分店。這些租車公司的櫃台都設在DFS沖繩那霸店二樓，在單軌電車おもろまち駅出站後同一層。

 

如果你第一天到達那霸後入住國際通附近的酒店，當天餘下時間只會在國際通行街Shopping，建議在第二天才開始租車，這樣可以節省一天租車費和一晚酒店泊車費。從國際通的牧志站坐單軌電車到おもろまち駅只是兩個站，取車很方便。

 

↓ 這些文章您可能也有興趣，看完本文後可以繼續閱讀 ↓ ► 沖繩住宿推薦：15間鄰近那霸國際通的沖繩酒店與沖繩民宿推薦 ◄ ► 【那霸住宿推薦】沖繩那霸凱悅酒店 (Hyatt Regency Naha Okinawa) ◄ ► 沖繩住宿稅：實施時間、稅率、徵收方式 ◄

 

沖繩自駕遊三種方案建議

 

沖繩自駕遊的行程規劃，可以有以下三種方案：

• 方案一：到達那霸機場後取車，然後直奔那霸北面的沖繩市，一路向北遊覽美國村、殘波岬、琉球村、萬座毛、海中觀景塔、沖繩美麗海水族館、Junglia Okinawa等景點，然後返回那霸市，再遊覽市內的國際通、波上宮、泊港漁市場、首里城等景點。
• 方案二：到達那霸機場後取車，然後到那霸市，遊覽市內的國際通、波上宮、泊港漁市場、首里城等景點，之後往北一路遊覽美國村、殘波岬、琉球村、萬座毛、海中觀景塔、沖繩美麗海水族館、Junglia Okinawa等景點，最後從名護市直接返回那霸機場。
• 方案三：到達沖繩後到那霸住宿，在市區取車，遊覽市內的波上宮、泊港漁市場、首里城等景點，之後往北一路遊覽美國村、殘波岬、琉球村、萬座毛、海中觀景塔、沖繩美麗海水族館、Junglia Okinawa等景點，最後再次返回那霸市還車，在國際通Shopping，坐單軌電車到那霸機場。

 

過去幾年到過沖繩四次，大多數都採用方案三。

 

 

4天快閃沖繩自駕遊：行程分享

 

以下介紹的是我幾次去沖繩旅行中，時間最短的4天快閃之旅，這次4天快閃沖繩旅行，主要目的是參加婚禮，所以在婚禮以外我們只去了以下這些景點：

• 那霸國際通
• 波上宮
• 泊港漁市場
• 首里城
• 殘波岬燈塔
• 琉球村
• 萬座毛
• 沖繩美麗海水族館

 

以下是這四天的行程：

• Day 1 – 到達那霸空港，遊國際通、第一牧志公設市場；
• Day 2 – 遊那霸波上宮、泊いゆまち魚市場、首里城、殘波岬、琉球村；
• Day 3 – Aqualuce Chapel觀禮，遊萬座海灘、萬座毛、沖繩美麗海水族館；
• Day 4 – Outlet Mall Ashibinaa購物，旅程結束。

 

 

4天沖繩快閃之旅Day 1：那霸空港、國際通、第一牧志公設市場

 

點解叫做 “快閃之旅” ？因為旅程實在太短，只係去得果4日，如果扣除左頭尾各半日坐飛機時間，實際係沖繩嘅時間只得兩日full day加兩個半日時間，加埋頂晒隆都只可以話係三日。本黎都想留多幾日玩耐D，不過撞正聖誕節，回程機位日日都full晒，冇計。

 

呢次旅程嘅主要目的，係出席屋企人係沖繩舉行嘅婚禮。

 

沖繩那霸空港嘅規模其實都唔細，不過同國內線相比，國際線大樓就相當細啦，國際線大樓只係單層建築，入境同出境係同一個地方，而且候機室只有一個，即係話同一時間只可以處理一班出發航機的旅客。

 

呢度係國際線大樓出面，感覺有D似新加坡嘅Budget Airline Terminal。

註：因為掛住行冇時間影相，唯有係Google Map度截張實景圖片黎頂檔

 

那霸機場離那霸市中心並唔係好遠，而且有單軌電車連結機場同市區，所以由機場去市區相當方便。

 

單軌電車嘅那霸空港總站設係國內線大樓對開，出左國際線大樓之後，大約行3至5分鐘到隔離嘅國內線大樓，照路牌指示上二樓再行過天橋就到。

註：因為掛住行冇時間影相，唯有係Google Map度截張實景圖片黎頂檔

 

由於行程緊湊，我地只會係那霸住一晚，我地入住嘅酒店叫Okinawa Nahana Hotel and Spa，位置係正縣廳前駅同旭橋駅中間，由那霸空港駅坐單軌電車，5個站就到旭橋駅，出站之後行5分鐘左右就到酒店。

 

因為忙住攪手續，竟然望記影呢間酒店嘅相，唯有再向Google Map借張酒店外觀相黎用住先。

 

Okinawa Nahana Hotel and Spa其實並唔係我嘅首選，不過由於同行嘅部分人會順便去埋大阪，所以買左ANA嘅Package，而Package係那霸嘅酒店選擇唔多，比較理想嘅就只得Okinawa Nahana Hotel and Spa呢一間，所以其他人都唯有訂埋呢間酒店囉。

 

 

係酒店check-in完安頓好之後，都已經4點幾。因為今次停留那霸嘅時間唔多，所以要爭取時間，即刻出去國際通行街shopping。

 

由酒店行去國際通入口其實並唔遠，只係600米左右，不過今次一家大細有老有嫩，步速較慢，所以都要行10分鐘先到。

 

其實國際通主要都係一條手信街，如果打算買手信，最好係呢度買啦，因為根據夾價結果，同一件商品係其他地方賣嘅價錢唔會平得過係國際通嘅價格。

 

去國際通除左行街買手信之外，另一個重點就係去第一牧志公設市場。第一牧志公設市場就係國際通中段，係國際通同沖映大通嘅交界處，有一條叫市場本通嘅橫街，裡面係售賣沖繩特產、雜貨嘅地方，由呢度行入去就係第一牧志公設市場。

 

第一牧志公設市場其實只係一個好細嘅市場仔，感覺上同日本本土嘅市場好唔同，反而有D似台灣嘅街市，所以並冇乜嘢特別好睇。

 

市場分為兩層，下層主要賣海產，而上層係食店，可以係度食嘢，亦可以係下層買左D海產上黎叫食店幫你整。

 

雖然就到食晚餐嘅時間，不過我地都係下層海產店買左D海鮮黎試下，有帆立貝、甜蝦、海膽同海螺，不過唔知係唔係太晏，D刺身並唔係太新鮮。

 

食完刺身做點心，我地再係附近行下。

 

雖然係12月冬天，不過沖繩天氣都唔會好凍，氣溫大約都係15度左右，日頭只需要著一件薄薄地嘅長袖衫，甚至短袖都OK，入夜之後只要著多年薄褸就已經可以。而天黑嘅時間就同日本其他地方差唔多，大概5點半就開始天黑啦。

 

因為係那霸只留一晚，而且今晚又係係沖繩嘅第一餐，所以打算食好D。聽講沖繩嘅石垣牛同Aguu豬都出名，今晚兩樣都食。

 

– Day 1 完 –

 

 

4天沖繩快閃之旅Day 2：那霸波上宮、泊いゆまち魚市場、首里城、殘波岬、琉球村

 

呢次旅程雖然得果短短四日，不過除左第一日之外，其餘三日我地都會自駕。今次因為人多所以需要租用七人車先夠坐，我地總共有8個大人3個細路，所以租左兩部七人車。

 

因為遲左book車，所以我地只可以訂到一部R1 Class嘅Premacy，另一部唯有訂高級D嘅R2 Class嘅MPV。

 

呢架就係我地租嘅Mazda Premacy

 

呢架就係我地租嘅Mazda MPV

 

MPV比Premacy高級D，座位係皮做，感覺上亦比Premacy有力，但係就比Premacy食油，我地行左三日，最後入油時Premacy唔洗4,000円，而MPV就要5,000円。車廂空間兩架車差別唔大，不過MPV中間果排座位係兩張有獨立扶手嘅座椅，雖然高級D，但係就只可以坐到2個人，而Premacy就係一排過，坐3個大人都冇問題，如果有5個人，租Premacy啱D。

 

係租車店取車之後，我地就將兩部車駛返酒店門口停低，上埋行李同乘客之後就開始三日兩夜嘅沖繩自駕之旅喇。

 

那霸除左國際通之外，仲有幾個景點值得遊覽，所以今日上午我地會先去呢幾個景點，包括波上宮、泊いゆまち魚市場(泊Iyumachi魚市場)同埋世界遺產首里城。上面張圖就係我地今日上午行程嘅路線，詳細D可以睇下面呢個Google Map。

在較大的地圖上查看4天快閃沖繩自駕之旅行車路線和景點位置

 

 

好啦，第一站我地先去波上宮。波上宮係一個位於那霸北邊海傍嘅神社，距離國際通只有大約1.5公里，由酒店開車過去只需要5分鐘就到，如果行路應該15分鐘都可以到達。

 

波上宮只係一個好細嘅神社，神社前面有個細細地嘅室內停車場，可以泊到幾部車，我地去果陣冇咩人，所以兩架車求其泊都可以。

 

自駕遊參考：

波上宮Tel.: 098-868-3697 | 波上宮Mapcode: 33 155 863

 

由呢度上去就係波上宮，私家車可以駛上去架

 

呢個先係神社門口，左手邊係停車場仔。

 

神社內淨手嘅地方，參拜前洗乾淨隻手先。

 

神社主殿，準備定5円大餅喇

 

都有好多人黎許願喎

 

每間神社都總有一個賣神符嘅地方，今次買左兩個交通安全平安符掛係兩架車度，點知還車果陣唔記得攞走

 

波上宮隔離仲有一間護國寺，不過冇時間，所以唔入去囉。

 

波上宮出面街道

 

離開波上宮下一站係去那霸泊いゆまち魚市場，魚市場係市區北邊嘅那霸港海邊嘅漁船碼頭隔離，由波上宮開車過去大約12分鐘左右，如果行路都幾遠，起碼要行半粒鐘。

 

那霸港景色

 

那霸港內嘅漁船碼頭

 

漁船碼頭旁邊係一個魚獲拍賣市場，不過去到果陣太晏已經拍賣完啦。

 

呢度就係泊いゆまち魚市場嘅正門，出面有好多車位免費任泊，如果full左可以泊去後面。

 

自駕遊參考：

泊いゆまち魚市場Tel.: 098-868-1096 | 泊いゆまち魚市場Mapcode: 33 216 117

 

同第一牧志公設市場相比，泊いゆまち魚市場大好多，而且呢度賣嘅魚生好新鮮，價錢亦都平好多。不過我地去果陣有一半檔販冇開，唔知係太晏已經收檔定係太早未開檔

 

呢度賣嘅刺身正好多，睇到流晒口水

 

雖然食左早餐冇幾耐，但係一場黎到D刺身又咁吸引，點都有食返夠本。魚市場入面有枱椅可以買左之後坐係度食，筷子、wasabi同豉油碟可以問檔販攞，支豉油就要另買，不過都只係200円。

 

 

係泊いゆまち魚市場刷完餐刺身之後，又係去下一個景點嘅時間喇，呢個景點就係沖繩必到嘅景點：世界遺產 – 首里城。

 

首里城位於那霸市東邊，距離市中心嘅縣廳前大約4.5公里，開車需時約15分鐘，不過那霸市內汽車較多，又多交通燈，塞車情況比較嚴重，要有心理準備。如果唔開車，亦可以乘坐單軌電車係儀保駅或者首里駅落車，再步行大約15分鐘就可以到。

 

首里城係舊琉球國嘅皇城，而家只係剩低正殿同埋一D城牆遺跡。遊覽首里城一般由首里城公園西面嘅首里杜館開始，呢度有個市營地下停車場可以泊車，附近亦有唔少露天停車場可以用。

 

自駕遊參考：

首里城Tel.: 098-886-2020 | 首里城(首里杜館)Mapcode: 33 161 663

 

在較大的地圖上查看4天怏閃沖繩自駕之旅行車路線和景點位置

 

從首里杜館向前行少少就係首里城嘅入口守禮門

 

進入首里城嘅城牆正門-歓会門

 

冊封七碑

 

瑞泉門

 

漏刻門

 

從首里城上可以睇晒成個那霸市

 

広福門

 

入去首里城是免費既，不過如果要入正殿就需要買入場券。我地去果陣正殿維修緊，所以冇入去。

 

係首里城逗留左一半鐘多D，因為時間有限，附近嘅次要景點就唔去囉，跟住要離開那霸向沖繩中部進發啦。

 

離開那霸市區之後，路上嘅汽車並唔係太多，而且道路質素好好，所以原本計劃係唔行高速公路，只行國道，不過因為前車司機set錯GPS，竟然上左高速公路。之後仲要miss左個出口，攪到兜左個圈先去到第一個目的地。

 

我地係沖繩中部嘅第一個目的地係位於沖繩市，旅遊書介紹話可以望美軍基地嘅汽車休息站：道の駅かでな。

 

自駕遊參考：

道の駅かでなTel.: 098-957-5678 | 道の駅かでなMapcode: 33 708 633

 

道の駅かでな其實只有三層樓高，係頂樓天台設左個展望台，對面係美軍係沖繩嘅軍事基地，因為基地內主要係平地，所以即使係三樓都可以望到入面嘅環境。不過其實又冇咩好睇，只係空地一片，好彩D可能有機會見到一兩架飛機停係度囉。其實美軍係沖繩嘅軍事基地有好多幾處，呢度只係其中一個，係Google Map上灰色一片冇任何標記嘅範圍都係美軍基地黎架。

 

 

係道の駅かでな只係停留左一陣，休息完就再次上路，向下一站殘波岬進發啦。由於沿途見唔到有合心水嘅食店，所以今日中午果餐只係求其係Lawson買左D關東煮同飯團黎食，不過都好好味架。

 

在較大的地圖上查看4天快閃沖繩自駕之旅行車路線和景點位置

 

岬係指向海洋突出嘅陸地尖端，係沖繩島有好多處岬，而殘波岬就係島上突出海洋最入嘅一個海岬，可以睇到壯麗嘅太平洋景色，而且殘波岬周圍有壯觀嘅斷崖景觀，所以係沖繩一個重要嘅旅遊景點，不過由於位置偏僻，冇公共交通工具可以直接到達，如果唔係自駕，想去呢度就比較麻煩啦。

 

由道の駅かでな去殘波岬大約距離13公里，開車需時約半個鐘。

 

係殘波岬附近嘅路邊有一間叫Aquagrace Chapel嘅教堂，呢間都係沖繩舉行婚禮嘅熱門教堂之一，不過地點就偏僻左D。

 

總於到左殘波岬啦，呢度有個好大嘅停車場，免費任泊，其實係那霸之外其他地方，基本上泊車都係免費架。

 

自駕遊參考：

殘波岬Tel.: 098-982-9216 | 殘波岬Mapcode: 1005 685 317

 

殘波岬周圍其實都好荒蕪下，基本上乜都冇，只係得座燈塔。

 

燈塔近照

 

如果想睇靚景，就要用D腳力爬上燈塔上面啦，上燈塔需要俾150円嘅入場費。

 

由燈塔上影落黎嘅風景

 

殘波岬度仲有呢部用舊巴士改裝而成嘅小賣店

 

參觀完殘波岬時間已經係下午4點半，跟住我地又向下一站，沖繩嘅民俗文化村-琉球村進發啦。由殘波岬去琉球村路程大約10公里，開車需時約20分鐘，去到果陣都已經接近5點，而琉球村嘅關門時間係5點半，只得半個鐘時間應該都睇唔晒，所以決定費事買飛入村，淨係係外面嘅商店掃下手信。

 

自駕遊參考：

琉球村Tel.: 098-965-1234 | 琉球村Mapcode: 206 033 098

 

 

離開琉球村嘅時候天色都開始入黑，係時候返酒店Check-in啦。

 

今次旅程只得4日3夜，除左第一晚住那霸之外，之後兩晚都會住係恩納村嘅Sheraton Okinawa Sunmarina Resort。選擇呢間酒店嘅原因，係由於佢符合左我地要求嘅以下3個條件：

第一，近舉行婚禮嘅教堂 – Aqualuce Chapel，距離大約8公里，開車15分鐘就到；

第二，質素好；

第三，價格合理。

仲有一個原因，就係航空公司嘅3日2夜package入面有呢間酒店可以選擇，而且計落都幾抵。

 

呢間酒店嘅介紹我已經寫左另一篇文章：住@沖繩Sheraton Okinawa Sunmarina Resort詳細介紹左，有需要可以去參考下。

 

在較大的地圖上查看4天快閃沖繩自駕之旅行車路線和景點位置

 

係酒店check-in完，休息下又參觀左一輪酒店之後，係時候出去食Dinner啦。由於酒店附近冇乜舖頭，所以一定要開車出去搵嘢食。因為自己冇咩心水，最後去左呢間距離酒店10分鐘車程叫 “浜の家” 嘅食店。

 

自駕遊參考：

浜の家Tel.: 098-965-0870 | 浜の家Mapcode: 206 035 758

 

因為人多，可以點幾款唔同嘅set，不過味道只屬一般至麻麻，尤其係個蟹煲，最好味算係年豬手。

 

– Day 2 完 –

 

 

4天沖繩快閃之旅Day 3：Aqualuce Chapel、萬座海灘、萬座毛、沖繩美麗海水族館

 

今日係呢次沖繩旅程最主要嘅一日，因為係沖繩舉行嘅婚禮，會係今日上午進行。舉行婚禮嘅教堂係座落係ANA InterContinental Manza Beach Resort裡面嘅Aqualuce Chapel。

 

呢度嘅環境真係一流，難怪Aqualuce Chapel係沖繩舉行婚禮嘅人氣No.1教堂。教堂就係海邊，對住個無敵大海景，超浪漫。

 

從教堂裡面望向出面

 

自駕遊參考：

Aqualuce Chapel Tel.: 098-966-1211 | Aqualuce Chapel Mapcode: 206 313 518

 

教堂嘅面積並唔係好大，入面只有六排座位，可以容納大約50名賓客。

 

婚禮會係上午9點半開始，不過新人要一早係7點鐘就去到裝身彩排，我地作為賓客果D當然可以他他條咁係酒店食埋早餐先出發去。

 

早到左先係隔離嘅ANA InterContinental Manza Beach Resort 大堂抖抖，順便參觀下。其實係Aqualuce Chapel行禮最方便當然係住呢間ANA InterContinental Manza Beach Resort啦，不過佢嘅房租太貴，住唔起。

 

ANA InterContinental Manza Beach Resort外觀

 

ANA InterContinental Manza Beach Resort大堂

 

婚禮係9:30開始，由一位外籍牧師主持，進行期間唔可以拍攝，大約半小時就禮成，之後就係影相時間，不過係教堂唔可以留太耐，因為之後11點又有另一對新人行禮。

 

成個婚禮除左牧師之外，仲有一個攝影師同六、七個工作人員貼身服侍。係教堂同教堂出面影完一輪相之後，仲會再去附近ANA InterContinental Manza Beach Resort嘅私家海灘萬座海灘影相，之後再換衫去埋萬座毛又影，成個過程要去到中午一點先完成架。

 

新人座架

 

我地自己開車跟尾

 

萬座海灘係ANA InterContinental Manza Beach Resort嘅私家海灘，不過係人都可以入得黎，呢度水清沙幼，景色優美，不過因為係冬天，除左我地係度影相之外，並冇其他人係度，可以包晒成個沙灘任影。

 

萬座海灘對面就係萬座毛

 

係萬座海灘影完之後，就過去萬座毛啦，開車過去只需要5分鐘就到。

 

自駕遊參考：

萬座毛Mapcode: 206 312 097

 

萬座毛係沖繩主要旅遊景點，所以都有唔少的士係度等客。

 

萬座毛其實只係崖邊一塊好大嘅草地

 

從萬座毛望返去ANA InterContinental Manza Beach Resort

 

 

係萬座毛影埋相，成個婚禮過程終於完成，跟住再返去教堂換返衫，就開始我地自己嘅行程啦。因為只係剩返半日時間，所以只係安排一個景點，就係去沖繩美麗海水族館。水族館離恩納村大約有40幾公里，開車去要一個小鐘左右。

 

因為時間都成一點，先醫左個肚先。今次去左呢間係去沖繩美麗海水族館途中離ANA InterContinental Manza Beach Resort冇幾遠嘅Nakamura Soba麵店食麵，呢間麵店嘅麵真係超好味。

 

自駕遊參考：

Nakamura Soba Tel.: 098-966-8005 | Nakamura Soba Mapcode: 206 314 302

 

係Nakamura Soba食完麵之後，我地繼續起程前往沖繩美麗海水族館，路程40公里左右，主要沿住國道58號線同449號線行駛，大約要行一個鐘左右。呢段路大部份都係沿住海邊黎行，風景都好靚架，不過因為太累，乘客們都訓晒覺。

 

在較大的地圖上查看4天快閃沖繩自駕之旅行車路線和景點位置

 

沖繩美麗海水族館(沖縄美ら海水族館)位於沖繩北部本部町嘅海洋博公園入面，園入面除左沖繩美麗海水族館以外，仲有海豚劇場、海龜館、海牛館、海洋文化館、沖繩鄉土村同埋植物園等等好多設施，地方好大，不過因為時間有限，我地只可以參觀最出名嘅水族館。

 

前往沖繩美麗海水族館如果坐巴士，需要先坐118號快速巴士到名護總站，再轉坐65、66或70號巴士去到「記念公園前」站落車。

 

如果自己開車，從恩納出發的話要行大約一個鐘，如果由那霸出發，大約就需要2個鐘左右。海洋博公園入面有多個停車場，最近沖繩美麗海水族館而且又最大嘅係北停車場，亦即係P7停車場，Mapcode係553 075 743。

 

自駕遊參考：

沖繩美麗海水族館Tel.: 098-048-3748 | 沖繩美麗海水族館Mapcode: 553 075 743

 

我地到達沖繩美麗海水族館嘅時候都已經接近4點，係出面影完一輪相就入去準備買飛入場啦。

 

去到大堂，見到大家都企晒係度，等乜呢？原來等緊夠鐘。

 

原來係下午4點後入場嘅入場券有七折優惠，時間仲有一兩個字，冇理由唔等埋先。

 

沖繩美麗海水族館地方唔大，兩個鐘頭已經足夠，水族館冬天係下午6點半關門，4點入場仲有2個半鐘有足夠時間慢慢行同買埋手信啦。

 

除左參觀唔同海洋生物嘅各個展區之外，沖繩美麗海水族館嘅主要賣點，係佢嘅巨型魚缸同埋每日兩次嘅餵食鯨鯊表演，時間分別係下午15:00同17:00。

 

另外參觀魚缸頂部亦係唔應該錯過嘅節目，不過開放時間只限10:00至14:30同埋17:30至關門呢兩段時間，計劃行程之前記得夾好佢嘅時間表啊。

 

我地係水族館留到最後一刻，買埋手信先走人，原來等到關門先走沿路有成排工作人員排晒隊歡送架。

 

離開沖繩美麗海水族館我地返去恩納食dinner，今次去左一間叫海の家嘅居酒屋小店，味道超正，不過偏咸，而且份量好少，但價錢超貴。呢Part相唔知去左邊，冇相睇。

 

自駕遊參考：

海の家Tel.: 098-966-2180 | 海の家Mapcode: 206 314 394

 

– Day 3 完 –

 

 

4天沖繩快閃之旅Day 4：Outlet Mall Ashibinaa購物

 

終於去到旅程last day啦，今日會坐下午3點嘅飛機經香港返澳門，仲有半日可以利用，呢半日去邊好，當然係上機前最後沖刺啦，就係去那霸機場附近嘅Outlet Mall Ashibinaa囉。

 

由恩納去Outlet Mall Ashibinaa行高速公路45分鐘就可以到，不過因為我地心大心細，仲想去一去國際通買第一日冇買到嘅一樣嘢，所以攪到係那霸遇著塞車，最後國際通去唔成不特止，仲令到係Outlet shopping嘅時間少左成個鐘。

 

Outlet Mall Ashibinaa係那霸空港南面嘅一個島仔上面，去那霸空港只需要15分鐘時間，不過附近都幾塞車，所以最好預鬆D時間。Outlet Mall Ashibinaa亦設有免費穿梭巴士來往那霸空港。

 

自駕遊參考：

Outlet Mall Ashibinaa Tel.: 098-891-6000 | Mapcode: 232 544 486

 

在較大的地圖上查看4天快閃沖繩自駕之旅行車路線和景點位置

 

 

 

Outlet對於我黎講吸引唔大，所以趁住大家shopping之際我就去左搵油站入定油準備還車。最近Outlet Mall Ashibinaa嘅油站，係距離600米左右嘅一間ENEOS油站。我地行左兩日半，兩架七人車加埋都只係用左8,800円油。

 

自駕遊參考：

Outlet Mall Ashibinaa附近的ENEOS加油站Mapcode: 232 543 502

 

係Outlet Mall Ashibinaa掃完貨之後，今次短短4日嘅旅程真係要結束啦。我地先將乘客同行李車去那霸機場國際線大樓。

 

自駕遊參考：

那霸機場國際線大樓Mapcode: 33 123 518

 

落完客之後由司機負責開去機場附近嘅租車店還車，租車店距離機場大約2.5公里。Toyoto、日產、Times呢幾間大租車公司都集中係呢條街上。

 

不過係沖繩最大嘅租車公司返而唔係呢幾間大公司，而係OTS同ORIX，佢地最近機場嘅租車店係位於Outlet Mall Ashibinaa附近果間ENEOS油站隔離，可能因為佢地嘅店舖面積實在太大，只有果區先可以容納得到。

 

還車之後租車公司用佢地嘅車載我地返去機場，不過就算冇車，都可以坐單軌電車，一個站就到那霸空港架啦。

 

– Day 4 完，旅程完結 –

 

相關文章：

• 沖繩住宿推薦：15間鄰近那霸國際通的沖繩酒店與沖繩民宿推薦
• 【那霸住宿推薦】沖繩那霸凱悅酒店 (Hyatt Regency Naha Okinawa)
• 住@沖繩Sheraton Okinawa Sunmarina Resort (喜來登沖繩聖瑪莉娜海濱度假村)
• 日本自駕遊超完整攻略：租車、保險、行程規劃、費用預算、高速公路Pass詳細介紹
• 日本租車公司：推薦、比較、選擇與租車教學
• 日本租車保險：詳細說明、保障範圍與保費比較
• 沖繩縣住宿稅
• 使用Visit Japan Web進行日本入境申報、海關申報和免稅購物詳解
• 日本上網卡(SIM卡)使用情況分享與購買攻略

________
本文網址：https://www.travelclassroom.net/2026/03/okinawa-roadtrip.html