2011年沖繩快閃觀禮之旅(Day 3[下篇]–沖繩美麗海水族館)

係Nakamura Soba食完麵之後，我地繼續起程前往沖繩美麗海水族館，路程40公里左右，主要沿住國道58號線同449號線行駛，大約要行一個鐘左右。呢段路大部份都係沿住海邊黎行，風景都好靚架，不過因為太累，乘客們都訓晒覺。

在較大的地圖上查看2011年沖繩自駕之旅行車路線和景點位置

沖繩美麗海水族館(沖縄美ら海水族館)位於沖繩北部本部町嘅海洋博公園入面，園入面除左沖繩美麗海水族館以外，仲有海豚劇場、海龜館、海牛館、海洋文化館、沖繩鄉土村同埋植物園等等好多設施，地方好大，不過因為時間有限，我地只可以參觀最出名嘅水族館。

前往沖繩美麗海水族館如果坐巴士，需要先坐118號快速巴士到名護總站，再轉坐65、66或70號巴士去到「記念公園前」站落車。

如果自己開車，從恩納出發的話要行大約一個鐘，如果由那霸出發，大約就需要2個鐘左右。海洋博公園入面有多個停車場，最近沖繩美麗海水族館而且又最大嘅係北停車場，亦即係P7停車場，Mapcode係553 075 743。

自駕遊參考：

沖繩美麗海水族館Tel.: 098-048-3748 | 沖繩美麗海水族館Mapcode: 553 075 743

我地到達沖繩美麗海水族館嘅時候都已經接近4點，係出面影完一輪相就入去準備買飛入場啦。

去到大堂，見到大家都企晒係度，等乜呢？原來等緊夠鐘。

原來係下午4點後入場嘅入場券有七折優惠，時間仲有一兩個字，冇理由唔等埋先。入場券大人原價係,1800円，七折之後係1,260円，我地咁多人都慳左唔少。

沖繩美麗海水族館地方唔大，兩個鐘頭已經足夠，水族館冬天係下午6點半關門，4點入場仲有2個半鐘有足夠時間慢慢行同買埋手信啦。

除左參觀唔同海洋生物嘅各個展區之外，沖繩美麗海水族館嘅主要賣點，係佢嘅巨型魚缸同埋每日兩次嘅餵食鯨鯊表演，時間分別係下午15:00同17:00。

另外參觀魚缸頂部亦係唔應該錯過嘅節目，不過開放時間只限10:00至14:30同埋17:30至關門呢兩段時間，計劃行程之前記得夾好佢嘅時間表啊。

我地係水族館留到最後一刻，買埋手信先走人，原來等到關門先走沿路有成排工作人員排晒隊歡送架。

離開沖繩美麗海水族館我地返去恩納食dinner，今次去左一間叫海の家嘅居酒屋小店，呢間都係睇旅遊書介紹，真係冇介紹錯，味道超正，不過偏咸，而且份量好少，但價錢超貴。呢Part相唔知去左邊，冇相睇。

自駕遊參考：

海の家Tel.: 098-966-2180 | 海の家Mapcode: 206 314 394

– Day 3 完 –