2012年巴黎、倫敦雙城之旅 – Day 6：坐歐洲之星巴黎到倫敦

係巴黎停留四日之後，今日要離開法國過海去英國倫敦啦。從巴黎到倫敦我地會坐歐洲之星火車，開車時間係上午11點幾，因為怕遲到上唔到車，所以我地9點就係酒店check-out出發去巴黎北站。

要同呢間住左四晚嘅Htel Cordelia Paris講拜拜啦。

歐洲之星巴黎嘅車站設係巴黎北站(Gare du Nord)，由我地住呢區去巴黎北站如果唔轉車只可以坐RER鐵路E線，從Haussmann – Saint-Lazare總站坐到巴黎北站旁邊嘅Magenta落車。因為拖住喼行樓梯好唔方便，所以之前已經探定路，知道係老佛爺百貨嘅Lafayette Gourmet有扶手電梯落去地鐵站，入左地鐵站就可以直接通到去RER E線嘅Haussmann – Saint-Lazare站，不過因為地鐵站同RER站之間相距都幾遠，所以路程唔短。巴黎地鐵同RER可以轉乘，所以係入地鐵站果陣插左地鐵飛之後，去到RER站唔需要另外再入飛。

RER鐵路站與站之間相距好遠，所以由Haussmann – Saint-Lazare站到Magenta站之間只係相隔一個站。落車之後只需要係室內沿指示行幾分鐘就可以去到巴黎北站，歐洲之星車站係地面果層，

再係呢度上去就係歐洲之星車站位置，地方唔大。

我地嘅歐洲之星車票出發之前已經自己print左出黎，所以唔需要再出票，如果選擇係車站出票，可以係車站內嘅服務櫃台或者自助機出票。有關購買歐洲之星車票嘅介紹可以參考呢篇《如何購買歐洲之星(EuroStar)車票》。

進入歐洲之星候車室之前需要先通過英國海關嘅入境檢查，同機場入境檢查一樣，填好一張入境表，每件行李上掛上一個歐洲之星嘅行李牌再過X光檢查就可以，過程好快，如果人少唔洗排隊10分鐘攪掂。

仲有時間入閘前先係車站食埋最後一餐法國早餐

歐洲之星嘅候車室，地方唔係好大。

候車室裡面都有間PAUL餅店，買定D餅車上食。

上車啦，車票有劃位唔洗急，不過如果想有位放行李，都係保險D早D上車啦。

車上放置大件行李嘅行李架。

歐洲之星車廂

車上有一卡係小賣部

沿途風景

經過兩個鐘多D嘅車程終於到達倫敦聖潘克拉斯火車站(St Pancras)‎，不過因為英國同法國相差一個時區，所以到達倫敦時只係當地中午12點半。

聖潘克拉斯火車站(St Pancras)‎同地鐵King’s Cross St. Pancras站相連，搭地鐵之前先係地鐵站嘅Travel Information and Tickets Center買兩張Oyster卡先。

呢兩張就係黎緊五日伴隨我地穿梭倫敦嘅Oyster卡啦，想了解多D關於Oyster嘅介紹可以參考呢篇《倫敦旅遊交通費慳錢攻略：應該購買 Oyster 還是 Travelcard？》。

今次係倫敦入住嘅酒店係白金漢宮附近，旁邊就係地鐵St. James’s Park站，由King’s Cross St. Pancras站坐Circle線唔駛轉車。

呢間就係我地今次旅程係倫敦入住四晚嘅酒店，叫St Ermin’s Hotel – MGallery Collection

，詳細嘅酒店介紹同住宿評價可以參考呢篇《住@倫敦St Ermin’s Hotel – MGallery Collection》。今次之所以會入住呢間咁高級嘅酒店，係因為用HotelsCombined搵酒店嘅時候，無意中發現呢間酒店做緊promo，價錢比正常平好多。

因為未到check-in時間，我地將行李放低係酒店之後，先出去玩。酒店旁邊就係Victoria Street，街對面有個小市集，先過去睇睇。

沿Victoria Street向維多利亞火車站行冇幾遠，係就到火車站之前有一間威斯敏斯特主教座堂(Westminster Cathedral)，唔洗入場費可以免費入去參觀。

再向前行就係維多利亞火車站

英國嘅物價好高，旅遊景點嘅入場費亦絕對唔平，所以我地係出發之前已經上網買左兩張兩日嘅London Pass，而且選擇係倫敦攞卡。係維多利亞火車站附近行左一陣之後，我地就坐地鐵去攞London Pass。想了解多D有關London Pass同購買方法嘅介紹，可以參考呢篇《倫敦通行證(London Pass)： 倫敦自由行必買！》。

攞London Pass嘅地點係Leicester Square地鐵站附近，出左地鐵站向特拉法加廣場方向行冇幾遠就到。

攞London Pass嘅地方就係呢個圓頂亭裡面。

攞完London Pass我地順路行過去特拉法加廣場(Trafalgar Square)。

廣場後面係國家美術館(National Gallery)，入去睇左一陣覺得冇咩興趣。

從特拉法加廣場右邊嘅大街向北行10分鐘可以去到Piccadilly Circus。

Piccadilly Circus係個好易認嘅地標，好多人坐係度休息。

Piccadilly Circus向東到Charing Cross Road嘅Leicester Square地鐵站之間係倫敦唐人街，呢區特別熱鬧，雖然感覺有D雜，但係對於中國人呢度點都會俾到你一種熟識嘅親切感。

Piccadilly Circus西北邊嘅攝政街(Regent St)係倫敦高級購物區，從Piccadilly Circus沿攝政街至牛津街(Oxford St)一帶特別熱鬧，不過呢區酒店超貴，如果唔係都會住係呢頭。

放工時間牛津街上嘅Oxford Circus地鐵站超多人，都係行夜D先返酒店。

返到酒店佢地已經幫我地安排好間房，不過入到房發現間房唔係我地book果種，雖然呢間房比我地book果間高級D又大間D，但係呢間係一間兩張床嘅Twin Room，所以都係堅持要求佢地換房。

最後終於換左間房俾我地，可以好好休息啦。

– Day 6 完 –

Related posts:

• 倫敦通行證(London Pass)： 倫敦自由行必買！ – 如何購買倫敦通行證 (內附最新折扣代碼)
• 倫敦旅遊交通費慳錢攻略：應該購買 Oyster 還是 Travelcard？
• 倫敦景點門票“兩人同行一人價錢” (London Travelcard 2FOR1 Offers)
• 巴黎旅遊交通費慳錢攻略：如何使用自助售票機購買地鐵Ticket t+車票？
• 遊巴黎，Paris Pass與Museum Pass哪種更省錢？
• 如何購買歐洲之星(EuroStar)車票
• 住@巴黎Hotel Cordelia Paris
• 住@倫敦St Ermin’s Hotel – MGallery Collection
• 倫敦酒店推介
• 倫敦免費WiFi網絡
• 2012年巴黎、倫敦雙城之旅 – Day 1：飛向巴黎
• 2012年巴黎、倫敦雙城之旅 – Day 2：遊覽巴黎聖心堂
• 2012年巴黎、倫敦雙城之旅 – Day 3：巴黎聖母院、羅浮宮、凱旋門
• 2012年巴黎、倫敦雙城之旅 – Day 4：凡爾賽宮、艾菲爾鐵塔、塞納河遊船河
• 2012年巴黎、倫敦雙城之旅 – Day 5：巴黎老佛爺百貨掃貨
• 2012年巴黎、倫敦雙城之旅 – Day 7：盡用London Pass，一天遊覽西敏寺、泰晤士河、倫敦塔
• 2012年巴黎、倫敦雙城之旅 – Day 8：聖保羅大教堂、Covent Garden
• 2012年巴黎、倫敦雙城之旅 – Day 9：白金漢宮看禁衛軍換更
• 2012年巴黎、倫敦雙城之旅 – Day 10：大英博物館