2014年復活節高雄、台南之旅 – Day 1：六合夜市、新堀江

今個復活節趁住有四日連假，去左台灣高雄同台南短遊。雖然話就話有四日，但係晚機去早機返，查實只得中間兩日可以玩。

由澳門飛高雄嘅航班最早嘅都要到下午四點後先起飛，而我地今次坐嘅復興航空，係下午四點四十分起飛。

澳門去高雄只需要個半鐘，食完個簡單飛機餐，都黎唔切填好入境表就已經要收嘢準備降落。

高雄係六年幾前去過一次，不過當時從台北坐高鐵過去，從澳門直飛今次係第一次。落機之後人唔多，好快過左海關，亦好快攞到行李，效率唔錯。

國際線入境大堂

入境大堂有個旅客服務中心，如果要開個iTaiwan WiFi帳號可以係呢度辦理。

高雄機場距離市區好近，而且有捷運連接，比台北方便好多，不過我地都係選擇直接坐的士去酒店。的士站就係入境大堂出面，不過係呢度坐的士要加收$50新台幣服務費，開車尾箱又要再收$10新台幣費用，由機場去到我地入住嘅高雄御宿商旅-中央公園館車費合共$220新台幣。

呢間就係我地今次旅程三晚入住嘅酒店高雄御宿商旅-中央公園館，酒店嘅詳細介紹可以參考呢篇《住@高雄御宿商旅-中央公園館》。

係酒店休息一陣之後，先去六合夜市逛逛。可能本地人都去晒新開嘅金鑽觀光夜市同凱旋觀光夜市，六合夜市只剩返遊客會去，而且絕大多數係大陸遊客。

去完六合夜市再去埋係我地住嘅酒店附近嘅新堀江，雖然話新堀江係高雄西門町，但兩者相差真係太遠啦，今日係星期六，但呢度都係冇咩人。

從新堀江行返酒店只需要3、4分鐘

途經中央公園嘅城市光廊，可惜仲係度重建緊。

附近亦有呢間叫大立精品嘅商場

– Day 1 完 –

相關文章：

• 2014年復活節高雄、台南之旅 – Day 2：台南一日遊+高雄金鑽、凱旋夜市
• 2014年復活節高雄、台南之旅 – Day 3：高雄打狗英國領事館、旗津、駁二藝術特區、夢時代
• 住@高雄御宿商旅-中央公園館
• 高雄酒店推介