3天玩轉高雄、台南：行程、景點全分享

今個復活節趁住有四日連假，去左台灣高雄同台南短遊。雖然話就話有四日，但係晚機去早機返，查實只得中間兩日可以玩。不過，高雄景點唔多，雖然只得兩日，但主要景點都去咗，而且仲可以抽到大半日去埋隔離嘅台南。

 

以下是4日3夜高雄、台南嘅行程：

• Day 1：六合夜市、新堀江
• Day 2：台南一日遊+高雄金鑽、凱旋夜市
• Day 3：高雄打狗英國領事館、旗津、駁二藝術特區、夢時代
• Day 4：回程

 

↓ 這些文章您可能也有興趣，看完本文後可以繼續閱讀 ↓ ► 香港、澳門入台證申請！港澳居民網路申請入臺證教學 ◄ ► 台灣購物也可以退稅：台灣退稅手續流程全攻略 ◄ ► 台灣電子入境卡（Taiwan Arrival Card, TWAC）：什麼人需要提交？如何填寫？ ◄ ► 台灣武陵農場櫻花季：國光客運賞櫻專車購票攻略與賞櫻分享 ◄

 

高雄、台南之旅 – Day 1：六合夜市、新堀江

 

由澳門飛高雄嘅航班最早嘅都要到下午四點後先起飛，而我地今次坐嘅復興航空，係下午四點四十分起飛。

 

澳門去高雄只需要個半鐘，食完個簡單飛機餐，就已經要收嘢準備降落。

 

高雄機場

 

高雄係六年幾前去過一次，不過當時從台北坐高鐵過去，從澳門直飛今次係第一次。落機之後人唔多，好快過左海關，亦好快攞到行李，效率唔錯。

 

國際線入境大堂

 

入境大堂有個旅客服務中心。

 

高雄機場距離市區好近，而且有捷運連接，不過我地都係選擇直接坐的士去酒店。的士站就係入境大堂出面，不過係呢度坐的士要加收$50新台幣服務費，開車尾箱又要再收$10新台幣費用，由機場去到我地入住嘅高雄御宿商旅-中央公園館車費合共$220新台幣。

 

呢間就係我地今次旅程三晚入住嘅酒店高雄御宿商旅-中央公園館，酒店嘅詳細介紹可以參考呢篇《住@高雄御宿商旅-中央公園館》。

 

 

六合夜市

 

係酒店休息一陣之後，先去六合夜市逛逛。

 

 

新堀江

 

去完六合夜市再去埋係我地住嘅酒店附近嘅新堀江，雖然話新堀江係高雄西門町，但兩者相差真係太遠啦，今日係星期六，但呢度都係冇咩人。

 

從新堀江行返酒店只需要3、4分鐘

 

途經中央公園嘅城市光廊。

 

附近亦有呢間叫大立精品嘅商場

 

– Day 1 完 –

 

 

高雄、台南之旅 – Day 2：台南一日遊+高雄金鑽、凱旋夜市

 

今日主要行程係到台南玩一日，夜晚返高雄之後去左金鑽觀光夜市同凱旋觀光夜市行下。

 

高雄御宿商旅-中央公園館有包早餐，出發前落去餐廳食左早餐先。

 

係高雄市內，去大部份地方坐的士車費都係80-100蚊新台幣之內，就算去遠少少嘅打狗英國領事館、夢時代、或者金鑽夜市同凱旋夜市都係150樓下，而坐捷運每人最少都要20蚊新台幣，我地四個人坐的士同坐捷運費用唔差得好多，所以今次旅程主要都以的士代步，不過今日試一次坐下高雄捷運去高雄車站。

 

高雄捷運

 

捷運站就係酒店對面嘅中央公園旁邊，先過馬路，再穿過公園就到車站入口。

 

先係自助售票機買車票，操作同度度嘅地鐵售票機都係一樣，選擇目的地、人數，再放錢入去就出飛俾你，不過佢嘅車票唔係紙質，而係塑膠圓形嘅Coin，同曼谷、廣州地鐵用嘅係同一類。

 

中央公園呢個站好似冇乜人

 

由中央公園去高雄車站只係兩個站，不過捷運站同火車站唔係相連，要先從捷運站行出地面。

 

行出捷運站旁邊就係高雄火車站

 

先到售票處買火車票

 

真係好彩，黎到啱啱有班快車就開，不過仲有10幾分鐘，買完要行快步去月台。

 

 

台南一日遊

 

高雄至台南單程車票106蚊新台幣

 

閘口設係售票處行上去嘅二樓

 

原來月台離閘口仲有一段距離，要急步行啦。

 

落到月台，發現我地嘅車卡係最後，仲要行一大段先到，就開車，唯有先上車，再係車廂裡面慢慢行過去。

 

高雄去台南嘅火車有快車同較慢嘅區間車，坐快車只停大站，從高雄到台南中間冇停站，一個站就到，需時只係30分鐘，如果坐區間車就要站站停，需要用多一倍時間。快車有指定座位，而區間車就係自由席，同坐地鐵一樣，而且車廂同座位設計都同地鐵差唔多。

 

快車車廂嘅樣

 

區間車就係咁嘅樣

 

開車啦

 

話咁快就到左台南

 

先係旅遊服務中心攞張地圖

 

如果要坐的士，一出火車站就係的士站，不過我地第一站會去赤崁樓，步行15-20分鐘就到，所以打算行路過去，沿途順便掃下街。

 

先影下台南火車站嘅白色建築

 

赤崁樓係民族路二段，可以沿對正火車站嘅成功路直行，去到忠義路二段，或者赤崁街再轉返過去民族路二段，另外亦可以係出左火車站之後先沿中山路向左行，直到民族路二段之後轉右向西直行。我地選擇行中山路，因為呢段路比較熱鬧。

 

沿中山路行冇幾耐，係新光三越對面有個廣場，好多嘢食。

 

先食返碗安平豆花

 

食完豆腐花繼續向前行一陣就到左民族路二段路口，按照路牌指示轉入民族路二段直行就會去到赤崁樓架啦。

 

呢段民族路二段冇咩睇，開頭仲以為行錯路。

 

不過行行下就見到呢間係南台好出名嘅赤崁擔仔麵，呢間麵店門面唔係好起眼，招牌又係街外，行騎樓底嘅行人路好易Miss。

 

赤崁擔仔麵對面馬路有間比較起眼嘅建築物，叫劍橋大飯店。

 

赤崁擔仔麵係座舊唐樓，除左出面舊，裡面同樣古舊，幾有特色，食嘢前先周圍影下相。

 

嘢到，有得食。食物味道OK，但並唔係好好食果隻，可能係台北食慣度小月，所以都係鐘意度小月擔仔麵嘅味道多D。

 

由赤崁擔仔麵向前行少少就係赤崁樓，係台南主要歷史建築，不過地方唔大，冇咩特別嘢睇，好快睇完，入去要收50蚊新台幣入場費好似唔係好值。

 

赤崁樓對面係武廟同天后宮

 

武廟主要供奉關帝，不過內堂仲有供奉觀音、太歲等等。

 

從武廟旁邊小巷入去就係天后宮，小巷裡面有好多睇相算命同睇日子嘅館子。

 

天后宮呢日好似有法事做緊

 

五月未到台灣嘅天氣已經好熱，咁嘅天氣最好飲返杯冬瓜茶消下暑，呢間係武廟旁邊賣冬瓜茶嘅店好多人排隊，買杯飲下先。

 

行完赤崁樓呢區，下一個要去嘅係安平古堡附近嘅延平老街，因為距離比較遠，所以要坐的士過去，如果唔趕時間，亦可以坐行走各個景點之間嘅觀光公車。

 

落左的士，司機教我地行安平路去安平古堡。

 

不過我地嘅目的係要去同安平路平衡嘅一條叫延平街嘅老街，不過條街一D都唔老，冇咩特色，只係同氹仔官也街咁，兩邊都係售賣手信、特產嘅店舖同攤販。

 

延平街上最旺人氣嘅係呢間售賣口立濕嘅蜜餞老店，排滿人龍，趁熱鬧唔好蝕底都跟住買返D啦。

 

買嘅方式係先入店內攞左你要買嘅嘢，再出去排隊俾錢，想慳D時間可以先搵個人排定隊。

 

繼續行

 

延平街盡頭就係安平古堡，不過我地冇入去參觀。

 

回程本來想坐的士，但係等等下見有架88安平線觀光公車，問司機係唔係去台南火車站，佢話係，於是上車啦，點知架車係景點之間周圍兜，用左好長時間先返到去火車站。原來除左88線之外，仲有架99線嘅觀光公車係直去火車站架。

 

回程都係坐快車，不過今次仲有5個字先開車，買完飛慢慢入去月台等車。

 

行完一日台南身水身汗，緊係要返酒店抖抖先。休息到咁上下，夜晚就去三多商圈。不過點解冇乜人嘅，唔通高雄人唔出夜街。

 

三多商圈有個興中夜市，雖然今日係星期日，但係仍然係水靜河飛。

 

呢間水餃店D水餃同麵都幾好味

 

 

高雄金鑽夜市

 

係三多商圈冇嘢行，決定打的去高雄金鑽夜市同凱旋夜市。嘩，超多人，原來D人黎晒呢度，唔怪得其他地方人影都唔多啦。

 

雖然係兩個夜市，但其實金鑽夜市同凱旋夜市就係正隔離，兩個加埋佔地真係好大。

 

兩個夜市周邊都有好多街頭表演

 

– Day 2 完 –

 

 

高雄、台南之旅 – Day 3：高雄打狗英國領事館、旗津、駁二藝術特區、夢時代

 

尋日去完台南，今日就留返係高雄玩，主要去左打狗英國領事館、旗津、駁二藝術特區以及夢時代購物商場。

 

高雄打狗英國領事館

 

打狗英國領事館位於高雄西子灣，坐的士去會先經過高雄港。

 

今日天氣仲曬過尋日，好熱~~~

 

打狗英國領事館就係小山上面

 

上去要爬好多級樓梯

 

上到去睇住個一望無際嘅藍海，景色一流，辛苦D都值得。

 

領事館旁邊仲有間廟

 

入場券每人66蚊新台幣

 

打狗英國領事館主要係呢座紅磚建築

 

有部份地方用左黎做餐廳，唔幫襯冇得入去。

 

室內仲有個展覽室，展出舊時附近嘅地形同船隻。

 

領事館裡面仲有導遊講解建築物嘅歷史

 

打狗英國領事館可以遠眺高雄港景色

 

打狗英國領事館所在的西子灣同對岸嘅旗津島之間嘅狹窄水道係船隻進出高雄港嘅航道，不斷有大型貨輪進出，感覺就好似係身邊駛過一樣。

 

想更近距離感受大船係身邊駛過嘅情景，可以到山上海邊。

 

呢度有自助租單車機

 

遊覽完打狗英國領事館下一站係去鼓山輪渡站坐渡船過去旗津島，打狗英國領事館同鼓山輪渡站被一條水道分隔，以前要坐車先去到，但係而家係水道上面起左條行人天橋，可以行過去。由打狗英國領事館行去鼓山輪渡站路程大約600幾米，行10分鐘就到，不過開頭一段冇行人路，行嘅時候要小心來車啊。

 

原來打狗英國領事館除左山上，山下都仲有一part，用同一張入場券可以入去。

 

山上同山下之間有樓梯連接

 

 

鼓山輪渡

 

繼續向鼓山輪渡站前進

 

對岸就係鼓山輪渡站

 

新嘅行人天橋

 

今日係星期日，有唔少人坐渡輪去旗津喎。

 

渡輪費用係每人15蚊新台幣，搭船前記得準備好硬幣，因為冇得找錢，如果有悠遊卡呢度亦可以用得。

 

船嘅第一層係俾電單車嘅，不過乘客都可以企係呢層。

 

如果想坐可以上樓上果層

 

船程只係短短幾分鐘，欣賞下高雄港景色好快就到對岸。

 

到旗津輪渡站啦，兩個站之間有旗鼓一號同旗鼓二號兩隻船不斷對開。

 

旗津

 

到旗津主要都係去旗津輪渡站對出的廟前路行下，買下手信同食下嘢。

 

旗津係食海鮮嘅地方，廟前街上有唔少海鮮食店，我地食呢間。

 

食完海鮮再坐渡輪返去鼓山

 

係鼓山輛渡站附近冇幾遠有呢間叫大碗公嘅冰室，食綿冰、豆腐花。

 

西子灣

 

鼓山輛渡站距離捷運西子灣站唔遠，步行行6-7分鐘左右。

 

係捷運西子灣站旁邊有一個打狗鐵道故事館，展出同舊火車有關嘅資料，免費入場。

 

館外係已經廢棄嘅火車場，仲展出多部舊火車，不過只可以睇冇得上去，做影相背景都唔錯。

 

係呢個廢棄火車場仲種左好多花花草草，唔少本地人黎呢度玩。

 

駁二藝術特區

 

從廢棄火車場再行過去就係新興嘅駁二藝術特區

 

係西子灣有觀光公車行走各個景點之間

 

 

夢時代購物商場

 

黎到今次旅程最後一個行程，就係到夢時代購物商場Shopping啦。

 

今日呢度有呢隊組合黎表演

 

夢時代裡面都開左間麻布茶房，上次係台北西門町食左覺得D甜品超好味，所以今晚晚餐就係呢度食啦。

 

今次食嘅主食味道麻麻，不過跟套餐上嘅甜味就同樣好好味。

 

最後去埋商場嘅顧客服務中心退稅

 

– Day 3 完 –

 

 

高雄、台南之旅 – Day 4：回程

 

旅程第四日朝早9點幾就要坐飛機返澳門，呢日冇行程。因為要坐9點幾機，所以晨早未夠7點就要係酒店check-out坐車去機場，不過因為係朝早返工時間，路面都有少少塞車，所以呢D時間去機場最好都係坐捷運。

 

 

高雄機場嘅候機室裝修設計得幾靚，每個登機閘口都有唔同主題同特色。

 

亦有電腦可以上網

 

仲有多個手機充電器

 

上機前食D嘢先，候機室裡面只得一間食店，冇得選擇，不過呢碗魚蛋味道都唔錯。

 

– 高雄、台南之旅 完結 –

 

相關文章：

• 香港、澳門入台證申請！港澳居民網路申請入臺證教學
• 台灣購物也可以退稅：台灣退稅手續流程全攻略
• 台灣電子入境卡（Taiwan Arrival Card, TWAC）：什麼人需要提交？如何填寫？
• 台灣武陵農場櫻花季：國光客運賞櫻專車購票攻略與賞櫻分享
• 台中、清境農場3日2夜自由行：行程、交通和住宿分享
• 日月潭+台中+台北6天自由行：旅行規劃與行程分享
• 台北烏來兩日一夜浸溫泉、遊老街、睇櫻花

________
本文網址：https://www.travelclassroom.net/2026/03/kaohsiung-tainan-trip.html