----------

----------

《2009年初秋北海道自驾之旅》- 第六天(1) – 小樽三角市场、富良野

2009101(星期四)天晴,气温12~20

 

小樽入住嘅酒店并冇book到早餐,原因系酒店对面就系三角市场,想再试下早餐食鱼生饭嘅滋味。 

 

三角市场有两个出入口,呢个系系小樽駅侧边嘅出入口,另一个系系大路果边。

小樽三角市场1

 

一眼睇晒,三角市场就系咁大。

小樽三角市场2

 

呢间武田鲜鱼店直营食事处算系三角市场入面唯一食店

小樽三角市场3

 

墙身贴满晒食客嘅相,好似好多游客去过,唔知真定假,如果有兴趣你都可以俾佢影返张黎贴墙。

小樽三角市场4

 

一入去个老板娘就问我地边树黎,一知系中国人就俾左份中文报纸旅游版我地睇,入面介绍呢间食店,仲大赞呢碗蟹汤大件夹抵食,唉,D蟹又霉又冇味。

小樽三角市场5

 

 

呢碗鱼生饭都算唔错,蟹肉鲜甜,带子好新鲜,食完好满足。

小樽三角市场6

 

食完早餐又系时候离开小樽,今日会去富良野,为左争取时间同埋避开札幌附近繁忙嘅市区街道,所以选择由小樽至三笠嘅路段行高速公路。

 

今日嘅行车路线图,行车距离约180公里行车时间大约3小时(连中途休息)

Day 6行车路线图

 

北海道嘅高速公路真系好好行,道央高速公路全部都系有两条行车线,上下行车道之间又完全分隔,行起车黎完全冇压力,同上次和歌山嘅高速公路相比真系好好多。因为高速公路太好行,所以人人都会不自觉地超速,我地由小樽至札幌平均都系行紧时速120公里,话咁快就到札幌。

 

正当我地以时速120公里行驶嘅时间,突然系隔离线出现左呢位. . . . . . 交通警察

高速公路上的交通警察

 

第一次系高速公路遇见交通警察,佢仲示意我地行埋左边线,唔通佢想告我超速。系告都冇办法啦,唯有听佢指示转入左边线,跟系佢后面行. . .. . .行左一大段佢都冇咩表示。而因为有交通警察出现,其他车亦唔敢超速,大家都以80 -90公里嘅上限行驶。行左一大段我估佢应该唔系话我超速而叫我转入左边线,要我行左线嘅原因应该系因为我当时一直行紧右线,而右线系用作爬头,唔可以长期行住右线。果然,过左冇耐个交通警察终于从前面一个出口离开,而大家亦即时行返正常嘅超速速度( 110公里 +)

 

高速公路上. . .

高速公路

 

未出高速公路之前先系岩见沢休息站抖抖

岩见沢休息站

 

经过差唔多一小时车程之后,我地系三笠出口离开高速公路改行国道,点不知,行返国道冇几耐就出事啦。出左咩事,咪又系超速囉,估唔到系高速公路冇俾人捉,落到国道就走唔甩

 

日本嘅国道好多都系又直又阔,尤其是系郊区,但系唔知点解日本人将个速度限制系50公里,太唔合理啦,试想系咁嘅路面情况点控制得住对脚,好易就超速。

 

当我地离开高速公路之后,系国道上行左冇几耐前面就出现左个人举起红旗,原来红旗上写住警察,之后佢示意我地驶架车入去路边一块空地,之后有个警察用日文讲好似要求出示证件之类,我都听唔明,就用英文同佢讲我唔识日文,原来佢嘅英文都唔差,见我地系游客就好客气咁问我地边度来,之后睇下本passport,又问我地之后去边,跟住行开同另一个好似高级D嘅讲左两句,返转头就好有礼貌咁同我地解释条路限速50公里(我地当时系行紧90公里),叫我地行慢一D,而最重要果句系“just caution, no penalty”,哗,听完呢句个人当堂定晒。本来谂住今次好麻烦,因为日本超速好似罚成3~5万円,而且仲要亲自去警察局搅手续交罚款,如果真系罚咁唔单止破财,仲会影响行程,而家唔洗罚真系谢天谢地。趁佢未反口拿拿淋走人(当然系用50公里龟速啦),哈. . . . . .

 

虽然俾人捉左超速,不过离开市镇去到郊区之后,仍然冇办法控制得住唔超速,而且其他车辆都系行80公里以上。所以决定跟住人地人,人地快我就快人地慢我又慢(其实之前果几日都系用呢个原则),咁就算捉都捉前面架车先啦,而且相信捉超速主要系系市镇范围,郊外地区应该机会小好多。

 

从三笠IC去富良野会经过三笠市同籚别市,主要系山路,不过风景都几靓,尤其系位于三笠市嘅桂沢湖。

 

位于452号国道旁边嘅三段泷系由三笠至富良野途中嘅一处景点

三段泷1

 

三段泷同日本其他好多瀑布一样,都只系好细规模

三段泷2

 

中午12点半终于到达富良野,呢个系富良野駅出面嘅公仔。

富良野駅

 

系富良野駅影相嘅时候偷听到有几个香港人讲呢间池田屋几好食,于是近近地就去呢度医左肚先。

富良野池田屋1

 

池田屋餐牌上嘅选择唔多,只系点左呢一set寿司,千几円。

富良野池田屋2

 

待续. . . . . .

如果喜欢这篇文章,请点个“赞”吧!

发布留言

发布留言必须填写的电子邮件地址不会公开。

收到您的留言后,小弟会尽快回复,您可以Bookmark本篇文章,方便之后回来查看回复。回答您留言所查询的问题有时候需要一些时间研究,请耐心等待。另外,如果您还未赞好过本Blog Facebook专页,可以请给我一个讃吗?!就当作是我花时间和精神解答您问题的一点支持吧。谢谢!

如果喜欢这篇文章,请点个“赞”吧!