2011年冲绳快闪观礼之旅(Day 4 –Outlet Mall Ashibinaa)

终于去到旅程last day啦，今日会坐下午3点嘅飞机经香港返澳门，仲有半日可以利用，呢半日去边好，当然系上机前最后冲刺啦，就系去那霸机场附近嘅Outlet Mall Ashibinaa囉。

由恩纳去Outlet Mall Ashibinaa行高速公路45分钟就可以到，不过因为我地心大心细，仲想去一去国际通买第一日冇买到嘅一样嘢，所以搅到系那霸遇着塞车，最后国际通去唔成不特止，仲令到系Outlet shopping嘅时间少左成个钟。

Outlet Mall Ashibinaa系那霸空港南面嘅一个岛仔上面，去那霸空港只需要15分钟时间，不过附近都几塞车，所以最好预松D时间。Outlet Mall Ashibinaa亦设有免费穿梭巴士来往那霸空港。

自驾游参考：

Outlet Mall Ashibinaa Tel.: 098-891-6000 | Mapcode: 232 544 486

在较大的地图上查看2011年冲绳自驾之旅行车路线和景点位置

Outlet对于我黎讲吸引唔大，所以趁住大家shopping之际我就去左揾油站入定油准备还车。最近Outlet Mall Ashibinaa嘅油站，系距离600米左右嘅一间ENEOS油站。我地行左两日半，两架七人车加埋都只系用左8,800円油。

自驾游参考：

Outlet Mall Ashibinaa附近的ENEOS加油站Mapcode: 232 543 502

系Outlet Mall Ashibinaa扫完货之后，今次短短4日嘅旅程真系要结束啦。我地先将乘客同行李车去那霸机场国际线大楼。

自驾游参考：

那霸机场国际线大楼Mapcode: 33 123 518

落完客之后由司机负责开去机场附近嘅万士得租车店那霸第二空港前店还车，租车站距离机场大约2.5公里。除左万士得之外，Toyoto、日产呢几间大厂嘅租车店都集中系呢条街上。

不过系冲绳最大嘅租车公司返而唔系呢几间大公司，而系OTS同ORIX，佢地最近机场嘅租车店系位于Outlet Mall Ashibinaa附近果间ENEOS油站隔离，可能因为佢地嘅店舖面积实际太大，只有果区先可以容纳得到。

还车之后租车店用佢地嘅车载我地返去机场，不过就算冇车，都可以坐单轨火车，一个站就到那霸空港架啦。

完结前再讲下那霸空港嘅国际线大楼，第一日都讲过，呢度真系超细，只得一个离境候机室，同一时间只可以处理一个航班，所以可以唔洗提早两个钟咁早到，提前一个钟至个半钟都已经足够。如果早到，check-in完都唔好咁早入闸，因为入面只得个候机室，冇地方行亦冇嘢买，所以check-in完可以行过去国内线大楼果边食嘢或者再买D手信。

– Day 4 完，旅程完结 –