2014年复活节高雄、台南之旅 – Day 1：六合夜市、新堀江

今个复活节趁住有四日连假，去左台湾高雄同台南短游。虽然话就话有四日，但系晚机去早机返，查实只得中间两日可以玩。

由澳门飞高雄嘅航班最早嘅都要到下午四点后先起飞，而我地今次坐嘅复兴航空，系下午四点四十分起飞。

澳门去高雄只需要个半钟，食完个简单飞机餐，都黎唔切填好入境表就已经要收嘢准备降落。

高雄系六年几前去过一次，不过当时从台北坐高铁过去，从澳门直飞今次系第一次。落机之后人唔多，好快过左海关，亦好快攞到行李，效率唔错。

国际线入境大堂

入境大堂有个旅客服务中心，如果要开个iTaiwan WiFi帐号可以系呢度办理。

高雄机场距离市区好近，而且有捷运连接，比台北方便好多，不过我地都系选择直接坐的士去酒店。的士站就系入境大堂出面，不过系呢度坐的士要加收$50新台币服务费，开车尾箱又要再收$10新台币费用，由机场去到我地入住嘅高雄御宿商旅-中央公园馆车费合共$220新台币。

呢间就系我地今次旅程三晚入住嘅酒店高雄御宿商旅-中央公园馆，酒店嘅详细介绍可以参考呢篇《住@高雄御宿商旅-中央公园馆》。

系酒店休息一阵之后，先去六合夜市逛逛。可能本地人都去晒新开嘅金钻观光夜市同凯旋观光夜市，六合夜市只剩返游客会去，而且绝大多数系大陆游客。

去完六合夜市再去埋系我地住嘅酒店附近嘅新堀江，虽然话新堀江系高雄西门町，但两者相差真系太远啦，今日系星期六，但呢度都系冇咩人。

从新堀江行返酒店只需要3、4分钟

途经中央公园嘅城市光廊，可惜仲系度重建紧。

附近亦有呢间叫大立精品嘅商场

– Day 1 完 –

相关文章：

• 2014年复活节高雄、台南之旅 – Day 2：台南一日游+高雄金钻、凯旋夜市
• 2014年复活节高雄、台南之旅 – Day 3：高雄打狗英国领事馆、旗津、驳二艺术特区、梦时代
• 住@高雄御宿商旅-中央公园馆
• 高雄酒店推介