《2009年初秋北海道自駕之旅》- 第一天(1) – 到著

2009年9月26日(星期六)，天晴，氣溫12~20度

 

快樂嘅時間過得特別快，九日北海道之旅話咁快就結束，真係好唔捨得。

 

今次因為要就假期，所以選擇左係中秋+國慶嘅長假期到北海道，既非夏天花季，亦未到滿山紅葉嘅時候，對於旅程的確打左一D折扣，不過可以離開澳門，放低工作無憂無慮咁遊山玩水，即使景色冇預期咁靚，亦已經好開心啦。

 

由於要坐26號零晨飛機，所以25號晚就要由澳門出發去香港機場。由澳門碼頭去香港機場碼頭嘅最後一班船係8:15pm開出，去到攪完登機手續都要再等兩個幾鐘先上得機。

 

今次係第一次坐大韓航空，亦係第一次要轉機，試過之後發覺原來坐零晨機+轉機真係好辛苦，下次都係咪攪啦。

 

第一次坐有上層嘅飛機

 

Dinner食韓國泡飯

 

當地時間上午5點到達韓國仁川機場，人影都唔見多個。

 

候機大樓四樓有轉機乘客嘅休息室

 

休息室有電腦可免費上網(每30分鐘會重新boot機)

 

係仁川機場食嘅韓國早飯，好難食。

 

終於等到10: 10a .m.轉機去北海道啦

 

飛機比原定時間早左D到達新千歲機場，不過排隊入境就比預期時間長左好多。原來新千歲機場嘅國際航線出入境地方好細，只得兩個登機閘口，入境櫃位又好少，一有機到就打晒蛇餅。而且行李輸送帶亦只得一條，等行李都等左幾個字時間。而最激氣嘅係海關對行李檢查得好嚴，全部喼要打開攞晒D嘢出黎check，差D仲想照埋X光，唔通覺得我地似毒品帶家?

 

幾經辛苦終於出左機場大堂，發現原來新千歲機場係好大架，ANA同JAL有專用嘅counter同登機閘口，而且數量仲好多添。

 

大堂中間位置係租車公司櫃位，如果係機場攞車就係呢度辦手續。

 

從入境大堂搭扶手電梯落一層就係JR火車站

 

坐JR去札幌只需要35分鐘，自由席車票1040円，買票方法同地鐵一樣。

 

係札幌嘅第一晚book左入住札幌車站北口嘅Hotel Fino Sapporo (而家叫Best Western Hotel Fino Sapporo)，由札幌車站行去只需要2~3分鐘。選擇呢間酒店嘅主要原因係因為佢好近第二朝取車嘅Mazda Rent a Car嘅札幌站北口分店，只係1分鐘路程(不過我地第二朝用左45分鐘先搵到，想知點解留意第二天行程介紹啦)。

 

Hotel Fino Sapporo外面

 

酒店房間好企理，裝修都好摩登，不過就細左D，打開一個喼之後都行唔到人。

 

由於坐零晨機再加上轉機，所以去到札幌酒店時已經好眼訓架啦，所以要先沖返個涼提下神先出得去玩。

 

札幌車站南口地標，左手邊間ESTA好大好多嘢買架。

 

第一站到左呢間雪印

 

係雪印入面食左呢杯嘢，雖然幾好味，不過要3千幾円，實在太貴啦。

 

途經札幌時計台

 

到達大通公園

 

5點半已經天黑啦

 

燈光影照下嘅札幌電視塔. . . . . . . . . . .

 

其實札幌市中心地帶並唔係太大，除左郊區之外，主要觀光點同購物中心都係札幌車站至簿野一帶，中間就係大通公園。札幌車站至大通公園之間主要有北海道舊道廳、時計台兩處古蹟值得去睇，而大通公園亦係主要景點，不過其實並冇咩特別，只係普通公園一個，可能要等冬天有雪祭時先有返D睇頭。主要嘅百貨公司都集中係札幌車站南口，不過同東京、大阪比就差好多囉。

 

而簿野係另一處購物中心，遊客主要係去狸小路商店街，就好似大阪嘅心齋橋一帶，不過狸小路嘅規模就細好多，基本上冇咩值得行。

 

交通方面，由札幌站至薄野之間雖然有兩個地鐵站，一個係大通站，另一個係薄野站，但係由札幌站至薄野之間嘅距離其實好近，冇必要坐地鐵。由札幌站行去大通公園大約10分鐘左右，再行去簿野都係10分鐘，所以坐地鐵又上又落仲麻煩。

 

待續. . . . . .