《2009年初秋北海道自駕之旅》- 第六天(1) – 小樽三角市場、富良野

2009年10月1日(星期四)，天晴，氣溫12~20度

小樽入住嘅酒店並冇book到早餐，原因係酒店對面就係三角市場，想再試下早餐食魚生飯嘅滋味。 

三角市場有兩個出入口，呢個係係小樽駅側邊嘅出入口，另一個係係大路果邊。

一眼睇晒，三角市場就係咁大。

呢間“武田鮮魚店直營食事處”算係三角市場入面唯一食店

牆身貼滿晒食客嘅相，好似好多遊客去過，唔知真定假，如果有興趣你都可以俾佢影返張黎貼牆。

一入去個老板娘就問我地邊樹黎，一知係中國人就俾左份中文報紙旅遊版我地睇，入面介紹呢間食店，仲大讚呢碗蟹湯大件夾抵食，唉，D蟹又霉又冇味。

呢碗魚生飯都算唔錯，蟹肉鮮甜，帶子好新鮮，食完好滿足。

食完早餐又係時候離開小樽，今日會去富良野，為左爭取時間同埋避開札幌附近繁忙嘅市區街道，所以選擇由小樽至三笠嘅路段行高速公路。

今日嘅行車路線圖，行車距離約180公里，行車時間大約3小時(連中途休息)。

北海道嘅高速公路真係好好行，道央高速公路全部都係有兩條行車線，上下行車道之間又完全分隔，行起車黎完全冇壓力，同上次和歌山嘅高速公路相比真係好好多。因為高速公路太好行，所以人人都會不自覺地超速，我地由小樽至札幌平均都係行緊時速120公里，話咁快就到札幌。

正當我地以時速120公里行駛嘅時間，突然係隔離線出現左呢位. . . . . . 交通警察

第一次係高速公路遇見交通警察，佢仲示意我地行埋左邊線，唔通佢想告我超速。係告都冇辦法啦，唯有聽佢指示轉入左邊線，跟係佢後面行. . .行. . .行左一大段佢都冇咩表示。而因為有交通警察出現，其他車亦唔敢超速，大家都以80 -90公里嘅上限行駛。行左一大段我估佢應該唔係話我超速而叫我轉入左邊線，要我行左線嘅原因應該係因為我當時一直行緊右線，而右線係用作爬頭，唔可以長期行住右線。果然，過左冇耐個交通警察終於從前面一個出口離開，而大家亦即時行返正常嘅超速速度( 110公里 +)。

高速公路上. . .

未出高速公路之前先係岩見沢休息站抖抖

經過差唔多一小時車程之後，我地係三笠出口離開高速公路改行國道，點不知，行返國道冇幾耐就出事啦。出左咩事，咪又係超速囉，估唔到係高速公路冇俾人捉，落到國道就走唔甩。

日本嘅國道好多都係又直又闊，尤其是係郊區，但係唔知點解日本人將個速度限制係50公里，太唔合理啦，試想係咁嘅路面情況點控制得住對腳，好易就超速。

當我地離開高速公路之後，係國道上行左冇幾耐前面就出現左個人舉起紅旗，原來紅旗上寫住“警察”，之後佢示意我地駛架車入去路邊一塊空地，之後有個警察用日文講好似要求出示證件之類，我都聽唔明，就用英文同佢講我唔識日文，原來佢嘅英文都唔差，見我地係遊客就好客氣咁問我地邊度來，之後睇下本passport，又問我地之後去邊，跟住行開同另一個好似高級D嘅講左兩句，返轉頭就好有禮貌咁同我地解釋條路限速50公里(我地當時係行緊90公里)，叫我地行慢一D，而最重要果句係“just caution, no penalty”，嘩，聽完呢句個人當堂定晒。本來諗住今次好麻煩，因為日本超速好似罰成3~5萬円，而且仲要親自去警察局攪手續交罰款，如果真係罰咁唔單止破財，仲會影響行程，而家唔洗罰真係謝天謝地。趁佢未反口拿拿淋走人(當然係用50公里龜速啦)，哈. . . . . .。

雖然俾人捉左超速，不過離開市鎮去到郊區之後，仍然冇辦法控制得住唔超速，而且其他車輛都係行80公里以上。所以決定跟住人地人，人地快我就快人地慢我又慢(其實之前果幾日都係用呢個原則)，咁就算捉都捉前面架車先啦，而且相信捉超速主要係係市鎮範圍，郊外地區應該機會小好多。

從三笠IC去富良野會經過三笠市同籚別市，主要係山路，不過風景都幾靚，尤其係位於三笠市嘅桂沢湖。

位於452號國道旁邊嘅三段瀧係由三笠至富良野途中嘅一處景點

三段瀧同日本其他好多瀑布一樣，都只係好細規模

中午12點半終於到達富良野，呢個係富良野駅出面嘅公仔。

係富良野駅影相嘅時候偷聽到有幾個香港人講呢間池田屋幾好食，於是近近地就去呢度醫左肚先。

池田屋餐牌上嘅選擇唔多，只係點左呢一set壽司，千幾円。

待續. . . . . .