《2009年初秋北海道自駕之旅》- 第六天(2) – 富良野：彩香之里、北星山町營薰衣草園、富田農場、日之出公園、Flower Land

食完壽司頂左肚，開始係富良野嘅遊覽旅程。富良野市本身並冇咩景點太值得去，所以第一站就去中富良野嘅彩香之里。去到彩香之里初頭仲以為去錯地方，因為成個場一個人影都冇，唔好話遊客，就連工作人員都冇。

呢樹就係彩香之里，除左上面幾排之外，其餘嘅薰衣草同花花草草都已經剷晒。

淨係影上面幾排花田，感覺都好似幾好咁。

另一個角度，仲有成片向日葵。

包場遊完彩香之里之後，再去下一個景點 – 北星山町營薰衣草園，今次好少少，除左我地仲有另外4個遊客。

呢度本來成片山丘都係花田，而家只剩前面幾排。

呢個角度都唔錯，唔講仲以為好大片花田。

前面應該係係十勝岳

過左暑假花季之後，富良野大部份景點都幾乎遊客絕跡，唯一有D人氣嘅係富田農場，可能同旅行社有掛鉤，即使唔係花季，仍然有一車車旅行團到來。

富田農場Farm Tomita

其實富田農場都只係剩返呢一塊花田

從另一個角度影上去

好難食嘅薰衣草雪糕

富田農場另一個賣點係溫室裡嘅薰衣草，不過一眼睇晒，只係咁。

農場入面仲有一D其他花，前面間屋就係溫室。

富田農場隔離有呢間哈密瓜專門店，可以堂食。

呢間係有書旅遊書介紹過食哈密瓜雪糕嘅鋪頭，不過並唔係係富田農場附近，而係係中富良野町至上富野町之間嘅375號國道旁。一定要自己開車先去到，一係就坐的士(如果咁好彩見到有的士得話)。

食完哈密瓜雪糕(其實味道麻麻)之後，開始向上富野町進發，目的地係日之出公園。

從觀景台望出去嘅日之出公園全景，只可惜D花花草草已經冇晒，唔係一定好靚

日之出公園內嘅鐘鐘

下一站. . . . . .上富良野町Flower Land。

Flower Land嘅花田仲比較完整，未有好似其他地方咁已經剷左，所有遊客亦較多

Flower Land嘅展望台

Flower Land嘅觀光拖拉車

遊完Flower Land雖然只係4點半，但太陽已經準備收工，我地亦係時候起程去今晚住宿嘅民宿Woody Life啦。

Woody Life係路邊嘅招牌

待續. . . . . .