《2009年初秋北海道自駕之旅》- 第三天(2) – 函館、Comfort Hotel Hakodate

係北海道，國道以及道道嘅質量都非常之唔錯，雖然國道限速50公里，不過一般係郊外行80~ 90公里都唔係問題，不過係有民居嘅路段最好唔好超過 60公里，因為可能有測速，我地就俾警察叔叔捉左一次超速(詳情等第六日行程先慢慢講)。所以今次六日車程都好少行高速公路，除左由小樽去富良野以及返回札幌果兩程，因為果兩程所經過嘅路段太多城鎮，行國道太難超速，而且又多紅綠燈位。

係郊外嘅國道同道道上雖然都不時有紅綠燈位，不過呢D紅綠燈需要過馬路嘅人按掣先會轉燈，所以一般都係長綠。除左某D重要路段之外，國道同道道一般都係雙線雙向行車，即係有對頭車，中間用黃實線或者白色虛線隔開果種。係白色虛線嘅路段可以爬頭，不過最好等到有一段大直路，確定好遠之外嘅對面線冇來車，先好爬，同埋亦要留意你後面有冇車爬緊頭，爬頭時亦記得要打燈。

由登別至函館之間雖然有一段高速公路，但係高速公路只係去到八雲為止，所以行高速公路所減少嘅行車時間並唔係太多，而且道南嘅5號國道經過嘅城鎮並唔係太多，所以行國道同行高速公路嘅時間相差無幾。另外，從大沼公園至函館之間有一段叫函館新道嘅免費高速公路，都可以慳到一D行車時間。

由於係室蘭搵地球岬阻左D時間，再加上落雨關係，所以比原定預算遲左到達函館，下午4點半左右先到今晚入住嘅Comfort Hotel Hakodate。

Comfort Hotel Hakodate正門(第二朝影)

Comfort Hotel Hakodate房間

Comfort Hotel Hakodate洗手間

同札幌比較函館嘅酒店都平好多，今次住呢間叫Comfort Hotel Hakodate，7,500円，送函館朝市“きくよ食堂”早餐券每人1050円，即係淨房價只係5400円，好抵住。而泊車要另外俾錢，泊酒店停車場(室外，係離酒店100米外嘅一塊空地)一晚500円。

係酒店check-in完之後仍然不停落雨，根本冇辦法去景點遊覽，所以決定去室內嘅地方行下。

海鮮市場，位於金森倉庫隔離(海鮮市場側邊有個停車場，下午6點之後係免費架，如果去金森倉庫一帶可以泊係呢度。)

海鮮市場裡面，係購買手信嘅集中地。

金森倉庫，多數賣工藝品，冇咩特別嘢值得行。

雖然個天不停落雨明知上山都唔會有機會睇到夜景，但係一場來到而且係函館只會停留一晚時間，今晚唔去都唔知幾時先有下次機會，所以都係決定上函館山撞下機會。如果係日間，可以自己開車上去函館山，不過下午6點之後就唔得，只可以坐纜車上山。函館山纜車站外面有免費停車場，可以泊低架車。去函館山之前記得係酒店大堂攞返張割引券啊，又或者上佢網下載都得。

上到山上果然不出所料. . .，你睇，當晚著名嘅函館山百萬夜景就只得. . .

睇唔到函館山夜景係今次旅程嘅最大遺憾，不過個天要咁都冇法子啦，唯有去食返D好嘢補償返。係網上見過好多人推介函太廊壽司，今晚就決定食呢間。上函太郎個網頁並未發現佢有割引券之類，不過原來佢都有一個每人送一碗蟹湯嘅割引券架，呢張割引券我地係係函館山纜車站度發現架，應該其他地方都會有。

其實函館市區真係好細，函太郎雖然係海邊，但係由函館山纜車站出發唔洗10分鐘車程就到架啦，而且佢有自己停車場，泊車絕無問題。函太郎嘅壽司真係好正，用料好新鮮，我就最中意佢嘅帶子，真係好好味好有口感。而且佢嘅價錢好抵，可能係迴轉壽司站，價錢大眾化，絕對超值。可惜掛住食唔記得影相，走嘅時候又因為落雨睇唔到外面。

第三天行程結束。