《2009年初秋北海道自駕之旅》- 第五天(2) – 天然温泉 灯の湯 ドーミーインＰＲＥＭＩＵＭ小樽、小樽運河、堺町通

見到海代表就黎到小樽啦

今次北海道之旅嘅住宿都好滿意，而今晚係小樽住果間係最滿意嘅一間，呢間酒店叫天然温泉 灯の湯 ドーミーインＰＲＥＭＩＵＭ小樽，不過想叫得簡單D都唔知點叫，佢係日本其中一間集團式酒店dormy inn係小樽嘅分店，今年6月先啱啱開張，仲係做緊promote，7,200円，好抵。

可能間酒店太新，所以GPS唔識去，差D又俾佢點左去第二度，好彩一早睇左地圖，知間酒店就係小樽駅對面，所以改為去小樽駅，好易搵到。

天然温泉 灯の湯 ドーミーインＰＲＥＭＩＵＭ小樽就位於JR小樽駅對面中央通路口，好方便。

天然温泉 灯の湯 ドーミーインＰＲＥＭＩＵＭ大堂

入左門口先係洗手間，而廁所同浴室就係右手邊，睡房要推開前面個門先見到

睡房內嘅寫字枱同電視機

張床size比一般大

房入面個窗望出去就係小樽駅

灯の湯 ドーミーインＰＲＥＭＩＵＭ嘅其中一個賣點係係佢二樓有一個大浴場，雖然唔係真正嘅溫泉水，但係裝修好靚好有特色，浸落都好舒服架。

灯の湯 ドーミーインＰＲＥＭＩＵＭ嘅停車場，係自動泊車果種，即係駛架車入去，熄車之後人出返黎，然後部機會轉走架車果種，泊一晚要1000円。

天然温泉 灯の湯 ドーミーインＰＲＥＭＩＵＭ樣樣都好，但有一樣就有待改善，就係員工嘅英文水平，成間酒店似乎冇一個人識英文，連單字都唔多識，check-in時想問清楚點攞返架車，但攪左好耐都冇辦法溝通得到。最後唯有由得佢，等取車先算。原來係泊車時職員會用張卡紙寫低你車牌同名，然後自己將卡紙交俾reception，想出車時再向reception攞返張卡，咁就會有人去車場同你整返架車出黎架啦。

攪掂check-in之後都接近3點半啦，所以爭取時間即時出去玩。雖然由酒店行去小樽運河都好近，不過有架車係度冇理由唔好好利用。由酒店出車兩分鐘就到小樽運河。

小樽運河淺草橋傍嘅小樽運河食堂，係佢側邊有塊空地可以免費泊車架，如果自己開車過去，可以好好利用，不過地方唔係太大，可能旅遊旺季時好難有位

小樽運河淺草橋

小樽運河

其實小樽運河真係冇咩好睇，唔可以用靚字來形容。雖然對大街果邊都仲算企理，但係對碼頭果邊就好似工廠區，灰濛濛，冇咩生氣。

行完小樽運河，下一站就去堺町通行街街。堺町通係一條步行街，有好多賣紀念品嘅店鋪，以玻璃製品為主，另外亦有唔少食店同埋賣糕點嘅鋪頭。呢條街雖然細細條又唔長，不過係度行街感覺好舒服。堺町通係可以單向行車架，不過因為行人太多，所以車輛都行得好慢，如果開車黎附近有好多收費停車場。但係如果由小樽運河行過去堺町通都係好近，主要嘅商店集中係小樽浪漫館至童話十字路口一段，大多數店舖都係下午6點左右關門，所以要多D時間行就要趁早啦。

呢度就係堺町通

堺町通上唯一一間街邊即燒海鮮店

北菓樓係小樽好出名嘅糕點鋪

呢個就係北菓樓最出名嘅樹輪蛋糕 – 妖精之森

呢間係小樽另一間出名嘅糕點鋪LeTAO，其實係我地酒店樓下都有一間分店。

LeTAO最出名嘅係呢隻芝士蛋糕

小樽堺町郵便所

呢度就係童話十字路口

待續. . . . . .