《2009年初秋北海道自駕之旅》- 第四天(3) – 洞爺湖湖畔亭溫泉酒店

我地訂嘅酒店套票係係房入面食Dinner架，所以check-in時要講好幾點食飯，時間一到就會有人黎準備晚餐架啦。行完有珠山身水身汗，返到酒店當然先浸返個溫泉先食晚飯啦。

 

湖畔亭嘅溫泉係酒店頂樓(九樓)，面向洞爺湖。但係溫泉嘅數量並唔係太多，男女只有各一個大浴場，而每日朝早男女浴場係會倒轉架，如果想兩個都浸晒，一定要夜晚同朝早各去一次。

 

今次住嘅房，和洋式，即係床係西式，起居室係和式，不過和式果度都可以訓得架，一間房足夠4個人訓有餘。

 

從房間裡面影出來。

 

其實湖畔亭都舊舊地，房間睇落都好耐冇翻新過，尤其是係個洗手間，雖然有個浴缸可以沖涼，不過睇落真係唔多想用囉，好彩有大浴場唔洗係房入面沖涼。

 

浸完溫泉終於到開餐時間啦，到左約定晚餐時間，個阿嬸職員會將所有食物一次過攞晒入房，set好晒等你慢慢食，食完只要打個電話佢就會返黎拾返D嘢走架啦。我覺得咁仲好，食飯嘅時間長短可以自己控制，唔洗好似之前係登別玉乃湯咁，食完一樣再慢慢等佢出一樣。

 

好豐富嘅晚餐啊，仲有飯後甜品–蜜瓜，放左係雪櫃度雪緊，所以冇出鏡。

 

仲係用緊呢款電話，唔知有冇人唔識用呢

 

洞爺湖每晚嘅煙花表演由8:45開始，我地間係湖畔房，本來可以坐係房度睇，不過為左感受深D，都係決定出去坐遊覽船，係湖上面睇。不過試過之後覺得唔係好值，一來太貴(1500円)；二來係湖上睇同岸邊睇冇咩大分別，其實佢D煙花會分別係幾間大溫泉酒店對出嘅湖面發放，坐船睇比係岸邊睇唯一好處係架遊覽船會跟住煙花走，全部煙花發放都睇晒，但其實每場煙花都係差唔多，冇必要睇晒囉；而最重要嘅係，D煙花真係唔係咁好睇，對於澳門人，每年都有十場八場煙花比賽匯演，世界各地嘅煙花係澳門都有得睇，而且一定靚過洞爺湖果D，所以應該唔會有咩驚喜囉。不過當係旅程中嘅其中一個節目亦算唔錯啦。

 

酒店房間對正洞爺湖架

 

夜晚嘅洞爺湖畔

 

洞爺湖遊覽船碼頭

 

洞爺湖遊覽船裡面

 

洞爺湖煙花. . .

 

第四天行程結束。