《2009年初秋北海道自駕之旅》- 第七天(3) – 札幌Cross Hotel、狸小路、北海道前浜料理

札幌嘅Cross Hotel係大阪以外日本第二間分店，因為住過大阪Cross Hotel印象好好，所以今次係札幌最後兩晚選擇入住Cross Hotel。札幌Cross Hotel同之前係小樽住嘅天然温泉 灯の湯 ドーミーインＰＲＥＭＩＵＭ一樣有一個室內嘅假溫泉，位於酒店頂樓。不過兩間相比，我覺得天然温泉 灯の湯 ドーミーインＰＲＥＭＩＵＭ靚過Cross Hotel。

Cross Hotel正面，另一邊係停車場入口。同其他酒店唔同，Cross Hotel係地下冇大堂入口，大堂係位於二樓。

Cross Hotel正面大街

係酒店check-in之後，我地先去還車。因為個天仲係不停落雨，所以決定去狸小路行下，睇下有冇咩買。狸小路係一條有上蓋嘅步行街，位於地鐵簿野駅同大通駅之間，由札幌駅坐兩個站就到。不過同大阪東京相比，呢度真係冇咩值得行囉。

落雨濕濕又冇咩地方好行，決定搵個地方食D好嘢。最後誤打誤撞竟然係俾我地搵到一間好好食嘅日本料理店，叫做“北海道前浜料理”(Click入去呢個網頁有佢嘅位置同coupon)，呢間嘢賣嘅海鮮直接來自一個叫枝幸港嘅漁港，好新鮮。

響螺刺身同北寄貝刺身，好鮮甜，正. . .正. . .正，食完忍唔住再要多一客。

壽司都好正. . . . .

燒蟹腳，不過冇刺身咁好食。

北海道前浜料理咁啱做緊開業周年紀念，有抽獎玩，抽中左送自家製牛奶軟糖。我地抽中左一份，不過招呼我地果個中國留學生侍應俾左兩份我地，一份有五粒，好經貴。D牛奶軟糖真係好好味，不過要雪住，係雪櫃攞出黎之後好快就會溶架啦。雖然之後係拉面共和國見到有一間賣類似嘅牛奶軟糖，不過味道就差好遠。

食完嘢落樓下見到仲係落緊雨，唯有返酒店休息。

薄野夜景. . . . .

第七天行程結束。