《2009年初秋北海道自驾之旅》- 第四天(3) – 洞爷湖湖畔亭温泉酒店

我地订嘅酒店套票系系房入面食Dinner架，所以check-in时要讲好几点食饭，时间一到就会有人黎准备晚餐架啦。行完有珠山身水身汗，返到酒店当然先浸返个温泉先食晚饭啦。

湖畔亭嘅温泉系酒店顶楼(九楼)，面向洞爷湖。但系温泉嘅数量并唔系太多，男女只有各一个大浴场，而每日朝早男女浴场系会倒转架，如果想两个都浸晒，一定要夜晚同朝早各去一次。

今次住嘅房，和洋式，即系床系西式，起居室系和式，不过和式果度都可以训得架，一间房足够4个人训有余。

从房间里面影出来。

其实湖畔亭都旧旧地，房间睇落都好耐冇翻新过，尤其是系个洗手间，虽然有个浴缸可以冲凉，不过睇落真系唔多想用囉，好彩有大浴场唔洗系房入面冲凉。

浸完温泉终于到开餐时间啦，到左约定晚餐时间，个阿婶职员会将所有食物一次过攞晒入房，set好晒等你慢慢食，食完只要打个电话佢就会返黎拾返D嘢走架啦。我觉得咁仲好，食饭嘅时间长短可以自己控制，唔洗好似之前系登别玉乃汤咁，食完一样再慢慢等佢出一样。

好丰富嘅晚餐啊，仲有饭后甜品–蜜瓜，放左系雪柜度雪紧，所以冇出镜。

仲系用紧呢款电话，唔知有冇人唔识用呢

洞爷湖每晚嘅烟花表演由8:45开始，我地间系湖畔房，本来可以坐系房度睇，不过为左感受深D，都系决定出去坐游览船，系湖上面睇。不过试过之后觉得唔系好值，一来太贵(1500円)；二来系湖上睇同岸边睇冇咩大分别，其实佢D烟花会分别系几间大温泉酒店对出嘅湖面发放，坐船睇比系岸边睇唯一好处系架游览船会跟住烟花走，全部烟花发放都睇晒，但其实每场烟花都系差唔多，冇必要睇晒囉；而最重要嘅系，D烟花真系唔系咁好睇，对于澳门人，每年都有十场八场烟花比赛汇演，世界各地嘅烟花系澳门都有得睇，而且一定靓过洞爷湖果D，所以应该唔会有咩惊喜囉。不过当系旅程中嘅其中一个节目亦算唔错啦。

酒店房间对正洞爷湖架

夜晚嘅洞爷湖畔

洞爷湖游览船码头

洞爷湖游览船里面

洞爷湖烟花. . .

第四天行程结束。