《2009年初秋北海道自驾之旅》计划篇

不知不觉已经有成半年冇update过blog里面嘅资料啦，冇去update嘅原因咪就系最近冇去旅行囉。自从旧年11月去完关西之后，都有大半年时间，虽然年头去过台湾玩左几日，年中又因公事去左新加坡走左一转，但系由于冇咩特别野值得写，所以冇系blog度post游记。

2009年旅游大计出场

等左大半年，今年嘅重点旅行计划终于可以实现啦，今次嘅目的地就系. . . . . .北海道。其实系年初嘅时候已经计划以北海道作为今年嘅重点旅游目的地，而最初系计划系暑假7月尾嘅时候去睇花架，连大假都已经mark左，只可惜年中时由于工作关系行唔开，最后只有取消计划。到左今个月头，由于工作可以暂时放低，所以即时决定实施埋今年未完成嘅旅游计划先。

由月头决定至出发日期之间只有20几日时间，所以一拍板就即刻拿拿淋去旅行社睇下有冇机位。本来想买蓝天假期个札幌旅游套票，因为计落真系好抵，而且仲可以住新开冇几耐嘅Cross Hotel。点不知原来个个都谂住趁月尾有长假期去旅行，所以计划出发嘅日期ANA、日航、国泰、香港快运等主要航空公司去北海道嘅班机，无论直航定转机通通都full晒，唔通又系去唔成???

揾机位

第一次计划要取消，冇可能再俾佢发生第二次架，所以即时系ANA、日航同香港快运落晒waiting list，不过国泰就连waiting都冇。

虽然几间航空公司都落左waiting list，不过都仲系唔放心，所以自己再系网上周围揾下，幸运地俾我揾到大韩航空仲有位㖞，不过网上book超贵，于是又拿拿声走去旅行社度book，初时旅行社嘅职员系订票系统度都揾唔到有位，之后打电话去香港问先知原来真系仲有4至5个位剩，真好彩，当然第一时间hold左位先啦。

因为ANA同埋日航嘅航班时间比较好，连酒店嘅package计落又真系抵少少，所以未有即时决定买大韩航空，横掂hold左位仲可以等多几日先落实俾钱，所以决定再等几日睇下ANA同日航有冇机会。不过去到最后期限，ANA同日航甚至香港快运嘅waiting都冇下文，所以最终买左大韩航空嘅机票。

大韩航空嘅航班都系需要转机架，先由香港飞首尔，再飞北海道新千岁机场。同ANA或者日航相比，大韩嘅时间系差左d，虽然系香港起飞嘅时间早人地成个钟，不过因为需要系首尔等成5个钟转机，所以到北海道嘅时间就迟过ANA同日航3个钟时间。

而系价钱方面，大韩航空净机票（因为冇做package）连燃油附加费同机场税每人系HK$4,130，机票系17日有效期。因为ANA蓝天假期套票嘅机票只系7日有效期，所以唔用黎比较。如果攞日航北海道3天特选游嘅price黎比较，扣除酒店再加返燃油附加费同机场税之后，大约平1至2百蚊左右。

订酒店

因为今次只系净买机票，而且系北海道将会去唔同地方，所以需要自己book酒店。book酒店之前要先计划好初步行程，起码确定边一日住边个地方先。

揾酒店其实都系一件需要好多时间同耐性嘅工作，除非你对住宿冇咩要求啦。上次去关西第一次用日本嘅订房网站乐天订房，觉得操作好方便又有折扣，所以今次北海道订酒店大部份系透乐天订。不过系富良野同美瑛嘅大部份民宿都冇join到呢d网站，所以如果要订民宿，基本上只可以用email订。

我嘅习惯系先系乐天网度搜寻某个住宿地点嘅酒店list，例如搜寻小樽嘅酒店，就会列出所有系设定嘅入住日期有房嘅酒店名单，然后可以再按需要设定其他条件，例如价钱上下限。跟住click入去每间有兴趣嘅酒店，先睇下佢嘅房间照片，睇下系唔系啱心水，之后再睇埋住客评分，系乐天网大部份酒店都有住客评分，分为房间、设施、食物、温泉同服务，再计算整体得分，如果只系住宿最重要当然系睇房间嘅评分啦。评分最高系5分，我就只会揾一d房间评分4分以上嘅。

揾到候选心水酒店之后，下一步会做嘅系上返yahoo blog搜寻一下有冇网友住过呢间酒店，睇下佢地嘅评语同房间嘅真实照片，如果都觉得OK，先确定入住。

决定入住边间酒店之后，再下一步就系要决定系边度book房啦。因为透过旅行社book一定系最贵，所以唔洗考虑。但系用乐天网亦未必系最平，因为有时酒店自己网页嘅promote价会仲平过乐天。所以一定要同时上埋酒店网页睇睇，边个平就book边个，而好多时候会发现酒店网页同乐天嘅价系相同，呢个时候两边book都一样，不过系酒店网页book就需要重新打一大堆个人资料，而用乐天网因为做会员登记时已经入左个人资料，所以唔洗咁麻烦再入多次。不过有样野要留意，就系去酒店网页要去日文版，因为如果酒店网页有中文或英文版，佢地好多时都唔会放一d有promote嘅房系中文或英文版，promote只系可以系日文版揾到。

今之去北海道9日8夜，分别系六个唔同地方，住七间不同酒店/民宿，所以揾酒店book房都用左好长时间。

租车

今次9日8日夜北海道之旅以自驾为主，有六日时间自己开车，所以准备阶段另一件重要工作就系预约租车。同上次关西一样，今次亦系ToCoo租车网度租车，经过夹价之后，发现系Mazda最平，Mazda Demio ( 1300c c) 6日5夜合共28,000円（包保险），平均一日4,667円，虽然贵过上次系关西租日产March，不过以北海道黎讲都算系平架啦。

旅游资料

确定晒机票、酒店同租车呢几样主要野之后，就要plan下详细行程啦。因为年头已经计划今年去北海道，所以买买埋埋都有好几本旅游书，再加上同事朋友借嘅，真系睇晒都要用好多时间。

虽然之前去其他地方都系用开长空系列，不过觉得佢呢本北海道好似太过简单，而最详细嘅一定系正文社果本，但系佢嘅缺点亦都系太过详细（冇心机睇），而且有好多篇幅都系介绍交通，对于自驾人士冇咩用，另外佢亦冇介绍定山溪、丰平峡同支笏湖呢几处计划会去嘅地方，不过佢仍然会系今次旅程带去嘅唯一一本天书。

另外，之前亦买左两本日本出版嘅北海亲自驾游旅游书，有介绍各条热门驾车路线，不过觉得用处并唔系太大。北海道自驾游嘅参考资料，其实从网上下载嘅小册子更加有用，以下呢两本都好唔错：

Fly & Active Drive Hokkaido(中文版)

开车游览北海道掌握开车完全手册(中文版)

计划自驾游最紧要系要掌握行车路线、距离同行车时间，以下几个网页都系好帮手：

Google Map http://maps.google.com/

Mapion地图 http://www.mapion.co.jp/

Yahoo日本路线图制作 http://drive.yahoo.co.jp/map/edit

NEXCO东日本高速公路收费查询 http://www.driveplaza.com/dp/SearchTop

北海道驾驶导航 http://northern-road.jp/navi/cht/index.htm

(可查询主要城市、景点或国道休息站之间的行车路线和行车时间)

NAVITIME http://www.navitime.co.jp/

(可查询任何两点之间的行车路线和行车时间，停车场等资讯)

另外，由于行车主要依靠GPS导航，所以主要景点、目的地嘅电话号码或者map code一定要收集好。以下系今次筹备行程时收集的主要市区以外景点嘅电话号码或者map code。我发现同一景点有时会揾到几个唔同map code，不过主要系最后三个位number有出入，应该系差几步咁多。

因为今次去北海道只会去道央同道南，所以冇收集到道东、道北嘅资料，其他地方嘅map code资料，可以click入呢个网睇下。

割引券

计划行程中另一个要做嘅重要工作，就系收集景点同食店嘅折扣券，虽然到时可以去到当地案内所索取，不过预先print定出黎可以唔洗到时再去揾。以下系今次收集到嘅各类折扣券：

羊之丘展望台 http://www.hitsujigaoka.jp/

五棱郭公园 http://www.goryokaku-tower.co.jp/price/

函馆山 http://www.334.co.jp/jp/others/coupon/index.html

洞爷湖游览船 http://www.toyakokisen.com/price/

有珠山口 http://wakasaresort.com/usuzan/pdf/discount_ticket.pdf

登别熊牧场/伊达时代村 https://bearpark.jp/information/#price

札幌蟹将军(9折) http://r.gnavi.co.jp/fl/tw/h001801/coupon.htm

函馆朝市惠比寿屋食堂优待券 http://r.gnavi.co.jp/h024200/map1.htm

函馆朝市きくよ食堂 本店(95折) http://r.gnavi.co.jp/h023800/map1.htm

成吉思汗札幌本店(送一碟唔知咩) http://r.gnavi.co.jp/h080200/map1.htm

小樽政寿司 http://www.masazushi.co.jp/

JTB北海道割引券 https://opt.jtb.co.jp/kokunai_opt/

行程概要

经过多日努力，《2009年初秋北海道自驾之旅》嘅行程计划终于完成啦。以下系概括行程，详细留待回来之后再同大家分享啦。

[Day 1] – 游览札幌，住宿札幌【Hotel Fino Sapporo – 10,000円(含早餐)】。

[Day 2] – (租车) 札幌 ~ 登别，住宿登别【滝乃家别馆玉乃汤 – 25,200円(一泊二食)】。

[Day 3] – 登别 ~ 函馆，住宿函馆【Comfort Hotel Hakodate – 7,500円(送函馆朝市“きくよ食堂”食事券1,050円)。

[Day 4] – 函馆 ~ 洞爷湖，住宿洞爷湖【洞爷湖畔亭 – 21,700円(一泊二食，湖景房，送有珠山登山览车票)】。

[Day 5] – 洞爷湖 ~ 小樽，住宿小樽【天然温泉 灯の汤 ドーミーインＰＲＥＭＩＵＭ小樽 – 7,200円(不含早餐)】。

[Day 6] – 小樽 ~ 富良野/美英，住宿美瑛【Lodge Woody Life – 17,500円(一泊二食)】。（订房电邮woodylif@d9.dion.ne.jp）

[Day 7] – 美瑛/富良野 ~ 札幌，住宿札幌 (还车) 【Cross Hotel Sapporo – 9,000円(不含早餐)】。

[Day 8] – 游览札幌，住宿札幌【Cross Hotel Sapporo – 10,000円(不含早餐)】。

[Day 9] – 上午游览札幌，下午启程回澳。