《2009年初秋北海道自駕之旅》- 第二天(1) – 定山溪、豐平峽、支笏湖

最近更新日期：2015-03-07 | 文章分類：2009年初秋北海道自駕之旅

旅遊教室» 遊記» 2009年初秋北海道自駕之旅» 《2009年初秋北海道自駕之旅》- 第二天(1) – 定山溪、豐平峽、支笏湖

2009年9月27日(星期日)，天晴，氣溫12~20度

今日係連續六天自駕遊嘅開始。好多人去日本旅遊喜歡自駕，除左自駕有佢嘅樂趣之外，我覺得一定程度上都係迫不得意。其實係日本，除左大阪同東京兩地旅遊點比較集中之外，其他地方嘅旅遊點都相當分散，北海道就係其中最突出嘅地方，如果唔自己開車，每日要攞住大件行李搭火車巴士，一定會辛苦死人。

其實今次都只係我第二次係日本自己開車，上次由大阪去白浜只係租左兩日車，今次要一連開六日，都係一次挑戰。

今次租車都係透過ToCoo租車網租，因為萬士得有promote，所有今次租左Mazda Demio ( 1300c c)，6日5夜合共28000円（包第三者保險）。而係取車時個職員問買唔買埋免責保險，每日1040円。因為第一次係外地開咁多日車，所以決定買埋，就算發生意外都唔洗怕要自己再賠錢俾租車公司。不過好彩到還車時都冇出過任何意外。

今次租車連保險合共用左大約34000円，另外六日入左約10000円油，行兩程高速公路洗左大約6000円路費，停車場費用大約3000円，total用係自駕上嘅直接開支大約係53000円。

係網上租車時選擇左係Mazda Rent a Car嘅札幌站北口分店取車，仲租埋最近嘅酒店Hotel Fino，諗住行兩步就到架啦。點知. . . . . .搵極都搵唔到間舖，最後周圍問人，轉來轉去用左差唔多45分鐘先搵到間舖。原來間舖真係好近，由酒店行去唔洗100米，過一個街口就係。因為間舖個招牌好唔明顯，Mazda個字只係貼係個門上細細個，又冇突出來嘅招牌，所以自己行經都唔知道，好慘，早知前一晚去搵定啦。

因為有上次租車經驗，所以搵到間舖之後第一時間俾齊晒證件同email copy俾佢，好快咁俾埋錢就可以去取車，之後例牌check下車身有冇花，OK晒個職員交低條匙自己就走人，佢好似冇問我識唔識用個GPS喎. . .好彩上次用過姐。

呢架就係我地嘅戰車Mazda Demio，陪左我地六日，行左超過1200公里，不過因為只得1300cc，上斜唔係咁夠力。

車上嘅GPS，原來呢個model係冇得入map code架，死啦，之前搵左咁多景點嘅map code都用唔到，點去果D冇電話嘅景點啊？

原來唔係隻隻GPS都有以map code定位嘅功能架，我睇晒佢成本manual都冇講到，所以大家準備資料時記得除左搜集景點map code之外，一定要搵埋電話number，以防萬一。

對於用GPS，有以下幾點經驗可以分享：

1. 如果入電話number，一定要係系統顯示地點之後用肉眼睇清楚個地圖係唔係真係你想去嘅地方，因為有時電話number可能係公司office，唔一定就係你想去嘅目的地，所以對你想去嘅目的地係地圖上邊度附近一定要預先有認識；

2. 如果GPS唔support用map code同時又冇景點電話number，咁就要利用地圖功能，先去到景點附近，再將地圖比例放大，然後用手指點擊地圖，一般有名嘅景點係地圖上都有標示，我地今次都係用呢個方法去一D之前搵左map code但係又冇電話number嘅地方；

3. GPS只可以帶你去到你想去嘅地方附近，差唔多到達目的地時，最好慢車，用自己對眼搵你要去嘅地點；

4. 轉彎時一定要慢車，唔係好易miss左街口；

5. 有時GPS按照最短距離或者最短時間計算出嘅結果，會指示你行一D小路，呢個時候如果你相信行小路危險，就應該keep住行大路；

6. GPS計算嘅行車時間似乎唔係按法定限制時速黎計算，例如行100公里高速公路，GPS估計行車時間會係大約1小時，而高速公路限制時速係80公里，所以個GPS系統應該係按大家正常超速，即係時速100公里黎估計，同樣行國道限制時速係50公里，不過GPS系統會以70-80公里黎估計，可能大家都習慣超速。

以下係今日嘅行車路線圖，總行車距離大約200公里，由札幌經定山溪、豐平峽、支笏湖、苫小牧到登別溫泉。