2008年东京春季赏樱+温泉之旅(第一天) – 新宿太子酒店
2008年3月26日(早上有雨,下午天晴,气温9~16度)
行程:澳门 _ 香港机场 _ 成田空港 _ 新宿 _ 六本木山
计划左成个几月,今日终于出发,心情当然兴奋啦。晨早4点零就起左身,因为要坐朝早6点船过香港,5点零就出门口坐的士囉。原来咁早call电召的士都有好多车,话咁快就到左码头。第一次咁早去到码头,有好多香港人坐系楼梯度恰紧,可能赌完等紧6点第一班船返香港。
船公司同海关都仲未开门
三个人三件行李,最大果个喼系我架,返黎果阵有成30.5公斤重,好彩上到飞机,不过就拉到死死吓
6点船等到5点9船公司先有人黎,由于咁早行李部仲未开工,所以件行李唔洗托运,咁大件自己攞上船都几系野,好彩去果阵冇野好轻,回程果时就惨好多啦。
7点过D已经到左香港上环,之后行过对面维德广场楼下个巴士站等A11号机场巴士去机场,去到啱啱有架车走左,唯有企系当等多20分钟,等到7:50终于有车到,第一次坐机场巴士都总算顺利,太约40分钟就到机场。
上环机场巴士站,果朝落雨,上车时都几狠贝下
今次旅行社出嘅机票系e-ticket,两日前已经系网上check-in左,仲mark左左手边窗口位,谂住可以系上空一睹富士山景色啦,点不知当然太多云,乜都睇唔到,唉。
飞机途经九州时见到鹿儿岛樱岛火山
架机例牌迟左大约30分钟起飞,10:40起飞,飞左唔洗3个半钟,当地时间下午3点过D就到步啦。今次过海关都几快,半个钟多D就出到去,因为佢地好似trainD新人,所以已经慢左,如果系用D熟人嘅应该仲会快好多添。
成田空港Terminal 2入境大堂,一出黎左手边落一层扶手电梯,再转右直出就会去到JR Travel Service Center同埋Narita Express车站架啦
成田空港Terminal 2 嘅JR Travel Service Center,对面就系Narita Express车站
4点多D我地已经到左JR Travel Service Center,系呢度买左Narita Express车票同埋迪士尼换票劵。由机场去市区坐Narita Express真系几抵,因为3,500円嘅票价除左可以坐一程Narita Express出市区之后,仲有一张价值2,000円叫Suica卡嘅储值票,其中有1,500円可以用黎坐地铁或者JR,另外500円可以系走果日退返钱,所以实际上车费只需要1,500円。
而呢张Suica卡同香港八达通卡一样,除左可以用黎坐JR火车之外,坐地铁都可以,不过坐私铁好似就唔用得,另外亦可以用黎买野,真系几方便,所以之后都有再增值,唔洗次次坐车都去买飞咁麻烦。
至于迪士尼入场劵,其实唔洗买定,因为去到通常有即日嘅一日劵买,如果买定反而限死左果日去,就算之后想更改行程都唔得。
由成田坐火车去新宿大约一个半钟,5:45就到左新宿駅啦。我地系东京住嘅6晚全部都book左新宿太子,之前睇左网上介绍点行,所以落车之后就由新宿駅东口出,拖住行李行去酒店。不过后来行左几日发现,其实由新宿駅行去新宿太子,选择由西口嘅小田急百货出比起由东口会近一D,同埋好行好多,因为东口出要过三次马路,而且行人路好窄,人又多,行得好辛苦。相反西口出黎嘅行人路就阔好多,人又少D,而且只系一条直路同只需要过一条马路就得。
新宿太子张床,小弟本来一个人住单人房,不过佢都俾左间semi-double我
听好多人讲都话新宿太子几好,点知入左房真系好失望,真系好……细啊。真系未住过咁细间房,相比之下上次公干果间真系大好多,而对上一次系大阪住嘅Cross Hotel虽然平过佢,但都阔落好多,而呢间新宿太子真系超细,想揾个位开喼都有D难度。最失望嘅系佢个冲凉房,一入去仲以为入左飞机上嘅洗手间。不过话时话,佢个冲凉房系成个用胶板倒模造成,入到去感觉就好似系飞机或者火车上嘅洗手间一样,所以每次入亲去企系度都有D以为坐紧飞机同火车,有种摇下摇下嘅感觉。
从酒店望出去嘅街景,条路左边直去新宿駅西口,中间对住斑马线顶层有红色招牌嘅系六歌仙所在嘅大厦
从酒店望出去嘅街景,呢间系由箱根回来之后再check-in时嘅房,呢边对住歌舞伎町,下面条马路系靖国通,因为之前住另一边对住火车轨,一到好静个阵就会听到火车行过嘅声,所以第二次check-in时特登要求住呢边,点知原来都系一样听到,而且呢边向东,朝早好晒,所以建议都系住另一边好D
酒店每层都有一个自动售卖机,同埋免费热水供应机,因为房内冇水煲,只得一个水壶,要自己攞出黎装水
新宿太子算系区内最近地铁站同JR站嘅酒店,不过由落车到行到返酒店门口最少要行800~ 1,000米,每日咁行都几辛苦下。如果坐地铁丸之内线,系新宿三丁目站落车会比系新宿站落车较近酒店。
今次住新宿,发现新宿日日都有人派纸巾(当然系有广告果D啦),所以如果住呢区,基本上系可以唔洗带纸巾去架啦。
酒店check-in之后抖左一阵,就出发去第一站行程,本来计划系去涉谷先,不过见时间早左,于是改左去六本木山先。不过去到六本木山真系有D失望,原来朝日电视台冇乜野睇,而毛利庭园亦都好细,得几棵樱花树,而且夜晚亦唔系太靓,最后上左Mori Tower 52楼展望台睇夜景,不过亦唔系太得,1,500円真系唔值。虽然系咁,不过成个六本木山地区真系俾人感觉好高级下,街边有好多雕塑几有艺术feel。
由Mori Tower 52楼展望台见到嘅东京铁塔
行完六本木山我地再系附近揾左间寿司站食左个晚餐,之后就返酒店冲凉抖抖。半夜去左新宿南口出面嘅车仔档食拉面,不过唔抵食,一碗面得一块肉,仲要收700円。
第一日其实主要都系坐船坐车,就咁就过左。
人气文章:
Klook / Kkday最新优惠码
Agoda最新10%折扣代码
Hotels.com最新折扣代码
Trip.com最新优惠码
永安旅游最新推广码
乐天旅行最新住宿折扣券
乐天旅行最新租车折扣券
日本乐天市场最新优惠券
Klook.com
如果喜欢这篇文章,请点个“赞”吧!