京阪6天自由行：京都、大阪、有馬溫泉6天精華遊分享
今次已經係第四次踏足關西，本黎打算4月頭去睇櫻花架，不過因為工作關係，被迫提前左十日出發，最終京都賞櫻嘅心願都係冇辦法達成，睇怕都係要再去多一次啦。
今次行程只有六日時間，又懶得去plan，所以只打算係京都同大阪hea下，順便去有馬溫泉住返晚。
以下係今次京阪6天自由行嘅行程：
- Day 1：關西機場去京都，入住河原町酒店
- Day 2：二條城、平安神宮、清水寺夜間參拜
- Day 3：神戶三田Premium Outlet、有馬溫泉
- Day 4：有馬溫泉街、大阪難波、心齋橋
- Day 5：黑門市場、梅田、通天閣
- Day 6：回程
廣告
京阪6天自由行Day 1：關西機場去京都，入住河原町酒店
旅程開頭兩日我地會先係京都住兩晚，所以到左關西空港，我地就先坐JR直接去京都啦。
由關西機場去京都嘅JR車飛係1,830円，不過我地今次好豪(其實係一時大意傻仔左
)，買埋指定席車飛，仲要係最貴果隻-Green Car，成2,390円一位架。如果大家下次都係打算由關西空港坐去京都，記住唔洗買指定席車飛，架火車有三卡係留俾普通車飛嘅乘客坐架，係關西空港上車一定會有位坐，唔好浪費金錢啦。
呢架就係我地坐去京都嘅JR，Green Car只有一卡，咁貴座位當然舒服好多啦。
我地今次係京都入住一間新開冇耐嘅酒店，叫Best Western Hotel Kyoto，而家叫Hotel Vista Premio Kyoto，洒店嘅資料我係呢篇《京都Hotel Vista Premio Kyoto：京都購物區超便利住宿推薦》嘅文章度好詳細介紹左，大家可以參考參考。由於酒店位於河原町，所以去到京都駅之後仲要轉地鐵先可以去到。
↓ 這些文章您可能也有興趣，看完本文後可以繼續閱讀 ↓ |
唔知係唔係個天中意玩嘢，好多時去旅行都實有幾日落雨，而今日係地鐵站行出街個天就即刻落起大雨，攪到本來由地鐵站行去酒店只係400米左右嘅路程，行起上黎都有D狼狽。
係酒店Check-in完都已經7點，再加上落雨C濕，所以先係附近搵食。第一餐選擇左係酒店附近間一蘭拉麵食。
食完麵出黎發覺把遮唔見左
，睇怕都係俾人攞錯左啦，把遮係啱啱係FamilyMart買架，只係用左佢幾分鐘時間咋，咁快就要分手。
由於天公不做美，我地都只可以係附近有瓦遮頭嘅步行街行下，主打係藥房掃藥。上幾次黎都已經發覺京都嘅藥房一般比大阪平，今次又撞正有一間做緊幾日Promo，全店九折，當然先入定貨先啦。
講開藥房，順便都講一講每次去日本都每日必飲嘅伊藤園綠茶，500ml支裝係便利店一般會賣120~150円，而係藥房通常係88円一支，有時仲會平到80円一支，所以每次開始自駕之前，我都必定會去藥房入定足夠成個自駕行程飲用嘅存貨。今次係京都呢間藥房，折左之後竟然只係70円一支，係咁耐以來買過最平嘅一次，超抵。
以下就係我地呢兩日行左好多次嘅寺町通步行街喇
寺町通步行街
寺町通裡面有個錦天滿宮，對正錦市場。
錦天滿宮
最近睇仁醫，所以對坂本龍馬有左少少興趣，原來坂本龍馬遇刺身亡嘅近江屋旅館，就係位於河原町通，而家變左係……OK便利店，佢門口仲樹立左呢個紀念碑。
行到9點幾開始有D肚餓添
(一蘭碗拉麵冇加底其實份量只係好少架)，最後入左去若狹家食多碗魚生飯，食飽先至返酒店休息。
Day 1 End…
京阪6天自由行Day 2：二條城、平安神宮、清水寺夜間參拜
今次旅行冇乜點去plan，第二日順其自然咁訓到自己醒就起身，不過都只係八點半左右，等於我地七點半咋，可能旅行心情唔同啦，身體自己都想早D起身出去玩。
因為太早，都冇乜食店有開門，又唔想再食多次一蘭拉麵，所以選擇左係酒店後面步行街上間Starbucks食左個簡單早餐就算。
食完之後出發去第一個景點，呢個景點之前三次黎京都未有時間去，所以今次決定點都要去一去，而且呢度D櫻花品種較多，可能有D會早開都未定，講緊嘅係邊度？味就係二條城囉。
京都二條城
由河原町去二條城只需要坐地鐵兩個站就到，一出地鐵站就見到個城。
呢度就係入口
先係門口售票處買張入場券先，盛惠600円。
二條城係起係平地上嘅城堡，所以唔洗行一D好難行嘅石級先至去到，不過由於二條城主殿(本丸御殿)同埋起係上面嘅五層高天守閣係1750年時已經俾大火燒毀，所以係二條城度唔會有雄偉嘅城樓睇。
參觀二條城重點係睇仲保存係度嘅二の丸御殿，由正門入口行冇幾耐就到。
由於係世界歷史遺產，而且建築物全部係木結構，所以進入二の丸御殿需要先除鞋，跟住就可以入去感受下行係木板上發出嘅”依依”聲效果，聽講係特別設計用黎方便察覺外人入侵嘅機關，不過我就覺得同地板鬆左時發出嘅聲咁囉。
二の丸御殿裡面係禁止影相架，所以呢part冇相睇。
參觀完二の丸御殿跟住就入去二の丸庭園。
二の丸庭園裡面呢棵包到實一實嘅係乜？
如果佢係一棵叫蘇鐵嘅植物，已經有好多年歷史，所以要特別小心保護，包實佢係防止係冬天時凍親。以下借用官方網頁兩張相片俾大家了解下：
參觀完二の丸庭園二條城就基本行完啦，因為本丸御殿同天守閣已經燒左，冇嘢睇，只得返一D石墙囉。
正當想走之際，見到……咿，點解護城河邊好似有D櫻花咁嘅物體嘅？
嗱嗱林走過去睇下，原來真係櫻花喎。
雖然唔多，但有總好過冇啦。於是乎就係咁起世影……影影影，真可憐
，下次一定要係盛開果陣再黎睇過。
開左嘅櫻花就只得呢一part仔，其他大部份櫻花都仲未開，只有樹枝俾你睇。
小小地睇完早開嘅櫻花之後，真係走得人啦。到達門口前原來有個小市集，係專為賞櫻而設架，今日係第一日開。
我們又坐低食返碗熱辣辣嘅紅豆湯，再加一串燒小丸子。
跟住就同二條城講bye bye啦。
廣告
平安神宮
離開二條城之後，仲未夠鐘食晏，於是決定去埋另一個之前未去過嘅景點 – 平安神宮。平安神宮位於東山區，只需要由二條城前駅坐地鐵5個站去東山駅，再行10分鐘左右就到架啦。
係東山駅出左地鐵站之後，向右行會見到條叫白川嘅小溪，再沿住白川向北行大約800米左右，大約10分鐘時間就會到達平安神宮架啦。
途中有一排小烏居同一個袖珍神社，見幾得意影低佢。
係白川盡頭，會見到呢個代表平安神宮入口嘅大烏居。
再行多400幾米就到平安神宮啦。
入到神宮只係影左幾張相，個相機竟然自己熄機？
冇電！
入去平安神宮係免費架，不過如果要入埋去內苑，就要俾入場費。我地係門口裝過入去，發現內苑D櫻花完全未開，冇櫻花襯托只係一般日本園林，所以都係唔入去啦。
離開平安神宮嘅時候，已經係中午時份，係時候食飯啦，於是決定返去河原野搵食，順便返酒店為相機叉電。
係平安神宮前面嘅巴士站，有巴士可以去到河原町通，巴士站就係正酒店對面，好方便。不過上次領教過京都巴士迫人嘅慘況，今次都有D驚驚地
，好彩未係放工時間，都仲算OK。
食完嘢先返酒店為部相機叉電，跟手就去左酒店隔離呢間Loft同樓上嘅Uniqlo京都分店shopping。
廣告
清水寺夜間參拜
係河原町通附近行到咁上下，開始出發去清水寺啦。今日係清水寺開放夜間參拜嘅第一日，雖然知道睇到櫻花嘅機會好微，但都要去睇下先心熄。
由於時間尚早，我地先沿住鴨川慢慢行去祇園，不過個天時雨時晴，有D掃興囉。
去到祇園啦，先係路邊呢間丹波屋買串燒小丸子食下。
經過花見小路通，因為之前去過三次，今次就唔入去啦。
先入去よーじや買D面油紙，超貴，但唔知點解每次都會買
。
買完面油紙，繼續向清水寺方向進發，首先穿過係四條通盡頭嘅八坂神社。因為都黎過兩三次，所以冇打算係度停留，不過俾圖中果檔牛串燒吸引，就咁買左串燒牛肉粒黎食。
個樣OK，味道麻麻
。
再繼續向前行。
跟住先去八坂神社後面嘅円山公園，為嘅係睇下呢棵櫻花王，係完全未開架，失望
。
死心之後開始轉向高台寺方向，行去清水去啦。係呢樹，遇見幾位藝妓。
黎到高台寺附近，見到有D櫻花喎。
係由高台寺行去清水去嘅三年坂上，有一間”文の助茶屋”，每次黎都要食返碗佢嘅紅豆湯，不過一個set要800円左右，都幾貴
。圖中係兩個set黎架。
食完再上路，又見到有少少櫻花。
終於到達清水寺。因為夜間參拜係下午6點半先開始，去到仲未夠鐘，唯有等下先。
大家睇下門口棵櫻花係咪開得好靚呢，見到仲以為寺入面其他D櫻花都一樣開左，但原來果日成個清水寺就只得門口果棵開左，入面果D完全未開架，俾佢呃左
。
入場前先係門口買張入場券先，夜間入場券要400円，比日間貴成100円。
入得場啦
。
計埋今次，大大話話清水寺都黎過5次，包括兩次夜間參拜，所以都冇打算停留太耐，先影返D相交差。
清水寺大殿係度維修緊，而且地主神社係夜晚係唔開架，所以都冇咩地方好行。
今次主要目的係想睇下有冇夜櫻睇，點知…只睇到打左燈光效果嘅樹枝。
廣告
丸龜製麵
離開清水寺之後，我地行落去東大路通坐巴士返河原町，然後搵地方食晚飯。今朝早搵地方食早餐嘅時候，係河原町通Loft隔離見到有間叫丸龜製麵嘅讚岐烏冬店，當時好想試下，但係佢開11點，當時試唔到，所以決定今晚搵佢做晚餐。
由於小弟見識小，當時唔知原來呢間丸龜製麵係好出名嘅平民食店，今日寫呢篇嘅時候search佢網址，先知原來好多Blog有介紹佢，真係失覺晒。
入到丸龜製麵就好似去左個食堂咁，你需要自己係counter攞個托盤，然後點一碗烏冬。攞左碗烏冬之後，再根據自己喜好自取各式天婦羅，有炸蝦、炸番薯、炸南瓜，樣樣都好好味架
。
烏冬推薦首選咖哩烏冬，另一款牛肉烏冬都好好味，天婦羅就一定要食佢嘅炸番薯同炸南瓜，好甜好好味。
呢餐雖然食得好平，兩個人只係食左1,120円，但就係成個行程之中食得最滿足嘅一餐
。
丸龜製麵係日本各地有好多分店，之後我地再係大阪心齋橋見到一間，又再食多一次
。不過呢間分店係南船場果邊，離道頓堀較遠。
以下係丸龜製麵京都河原町店嘅位置地圖：
呢張係河原町店嘅舖面照片，係第二朝影架。
以下係丸龜製麵大阪心齋橋店嘅位置地圖：
注意：係大阪心齋橋亦有另一間叫はなまる讃岐うどん嘅讚岐烏冬店，不過呢間超難食
，千其唔好入去食啊。我地食過丸龜製麵見咁好味，所以又試埋呢間，點知就出事。
Day 2 End…
京阪6天自由行Day 3：神戶三田Premium Outlet、有馬溫泉
係京都短暫停留兩晚之後，今日要離開京都去有馬溫泉啦。因為去有馬住一晚之後會轉去大阪，所以有大件行李跟身，為免拖住行李坐公共交通工具，我地選擇係呢兩日自駕。
今次又係通過樂天旅行網站黎租車(有興趣知道租車手續嘅朋友可以參考呢篇如何通過日本樂天網租車嘅介紹)，向日產租車店租左最平果個Class – P1，不過都唔平啊，兩日都要成9,975円，冇買免責補償。
由於之後會由有馬溫泉直接去大阪，唔會再返京都，所以租車時選擇左係大阪還車。我地係大阪會住心齋橋道頓堀附近，而最近呢區嘅日產租車店係難波OCAT店，係JR難波駅座building嘅地下負一層。因為大阪同京都相隔唔遠，所以異地還車都唔需要收charge。
因為冇得指定車款，所以事前都唔知會係邊款車，之前租呢個Class一般都會係March，不過今次係另一款，就係下面呢部車啦，日產Note。P1呢間Class通常係1300c.c.車，不過我覺得呢部Note有1500c.c.，因為都幾有力，而佢嘅車廂內籠比March闊落好多。(D相係中途停車休息果陣影架)
同以前一樣攞車時間大約用左半個鐘，Check完車就開車走人。
我地住嘅Best Western Hotel Kyoto係冇停車場架，不過係佢對面(只係相隔唔夠10米)就有個停車場，返到黎先將架車泊係度。
↓ 這些文章您可能也有興趣，看完本文後可以繼續閱讀 ↓ |
神戶三田Premium Outlet
係酒店附近食埋早餐大約10點半左右就開車出發啦。按計劃今日會先去位於有馬溫泉附近嘅神戶三田Premium Outlet，然後再去有馬溫泉。照道理今日嘅時間係相當鬆動架，可以有大把時間係outlet慢慢行，之後仲可以係食晚飯前到有馬溫泉街遊覽，但係……因為自己一個錯誤決定，耽誤左好多時間，最後唯有改動一下行程。
呢張就係今日嘅行車路線圖
由京都去三田，如果行高速公路只需要大約一個鐘鬆D時間就到，我地10:30出發，應該係12點前就可以到達，不過路費要二千幾円。為左慳返呢筆錢，我選擇左唔行高速公路，以為有大把時間，結果去到接近兩點先去到Outlet，用多成兩個鐘。
為左唔影響行Outlet嘅時間，唯有改變一下行程計劃，將原先計劃今日下午遊覽有馬溫泉街嘅行程，改為係聽日上午先去。
其實係日本間間Premium Outlet都差唔多樣，來來去去都係果D舖頭，而且如果唔係撞正有大割引，價錢亦唔算係平。
每間Premium Outlet都例牌有一個大食街，不過食店選擇並唔多。
今次選擇食韓國石頭鍋飯。
落完Order會俾呢舊嘢你，當你個餐準備好可以攞嘅時候佢就會響架啦。
點解冇晒人嘅？原來D人走晒入去避雨，唔係，係遲雪先啱。咁嘅季節仲有雪落，真係奇怪，不過我地返黎之後日本出現左幾日強風雪天氣，京都好似都落左一場大雪，可能呢場雪係前奏。
呢場雪都落得幾大下，大家都即刻走人，我地都跟住走，怕佢再落落去會令到路面濕滑危險，但係一開車走人嘅時候佢又停晒，玩嘢
。
因為一時間太多車走，所以都塞左一陣先走到，今次決定行高速公路，雖然路程唔長，預計大約半個鐘左右就會去到有馬溫泉。點知，上左高速公路行行下佢竟然……塞車！係咪又玩嘢？！
廣告
有馬溫泉
五點半左右終於到達有馬溫泉啦，我地今次住嘅溫泉旅館係有馬温泉 御幸荘 花結び。(酒店嘅詳細介紹請參考呢篇《有馬溫泉住宿推薦：有馬温泉 御幸荘 花結び (有馬溫泉御幸莊)》)
因為將遊覽溫泉街嘅行程改左係聽日上午，所以今日只係留係溫泉旅館度hea下。其實係溫泉旅館都冇咩好做，都係例牌果幾味：浸溫泉+館內行行企企周圍睇下+享受一汨二食包嘅豐富晚餐，之後Enjoy下城市人冇幾何嘅早睡早起。
↓ 這些文章您可能也有興趣，看完本文後可以繼續閱讀 ↓ |
Day 3 End…
京阪6天自由行Day 4：有馬溫泉街、大阪難波、心齋橋
今日一早起身，先去浸多次溫泉，之後就去食早餐。
有馬溫泉街
食完早餐，9點半左右就Check-out走人啦。因為仲要去溫泉街行下，所以將行李放上車度先，架車繼續泊係有馬温泉 御幸荘 花結び個停車場，我地就由小路步行去溫泉街。
圖中藍色線就係我地步行路線。
因為沿途都有景點，所以行行下唔覺好遠，好快就去到溫泉街啦。
行冇幾耐就見到個炭酸泉源公園，應該係其中一個溫泉眼黎架，不過冇咩睇。
再行一段就係一間叫極樂寺嘅寺院
另一個泉眼，不過好似冇出水嘅。
呢個係紀念第一個開發有馬溫泉嘅人 – 行基和尚嘅紀念像
再行
就會見到銀之湯，可以俾錢入去浸溫泉架。
之後就到溫泉寺，呢度應該有櫻花架，不過仲未開囉
。
係溫泉寺旁邊有條石級，行上去就係湯泉神社，冇力行，冇上到去
過左溫泉寺有兩條路，我地行右邊條路，可以去到有馬町嘅一D小舖頭。
之後就會去到有馬玩具博物館同佢出面嘅足湯場
路口左邊係金之湯，同銀之湯一樣，都係可以俾錢入去浸溫泉。
右邊經過呢間好古式古香嘅旅館，穿出去就到大街啦。
大銜上嘅阪急巴士有馬案內所，如果由大阪坐巴士過黎，就係呢度落車。
條街其實好短，只有十間八間手信店。
再過去就係六甲川
有馬溫泉街地方唔大，唔洗個半鐘已經行晒，買埋手信我地就離開有馬溫泉返大阪啦。今次行高速公路，唔洗一個鐘已經去到心齋橋。
去到大阪只係12點幾仲未夠鐘可以Check-in，於是我地先開架車去Hotel Vista Grande Osaka放低行李，間酒店而家叫大阪難波假日酒店。(想睇酒店介紹嘅朋友可以去睇我呢篇《大阪難波假日酒店(Holiday Inn Osaka Namba)：道頓堀旁位置超方便的經濟住宿之選》)
↓ 這些文章您可能也有興趣，看完本文後可以繼續閱讀 ↓ |
然後再係大阪市內兜下，想睇下邊度有櫻花開左，不過兜左幾個地方都唔見有，大阪城、造幣局嘅櫻花通通都仲未開
。算吧，呢兩日大阪主打shopping算啦。
日產租車なんばOCAT店
兜完一輪個天開始有D雨點，所以都係先還左架車再算。還車地點係難波JR駅地下負一層(B1層)嘅日產租車なんばOCAT店，因為間店唔係街舖，要駅入地庫停車場，所以係京都攞車果陣，個職員已經俾左張地圖我，仲好有心機咁教左我點入去，不過聽左都唔係好明
。
行完一次之後覺得其實都唔係好難，下面用圖解方式講解一下，如果你又係咁啱係日產租車，又咁啱係呢間難波OCAT店還車，希望可以幫到你啦。
下圖係難波OCAT周邊嘅街道圖，如果你由千日前通方向駛黎，就應該靠左行(圖中橙色線)，係出入口處按紅色線駛入停車場入口，落到去就係B1層。如果你係由圖中下方駛黎(紫色線)，應該先靠右線行，係中間出入口處轉右過線，按紅色線駛入停車場入口。
下面呢張圖片就係出入口處嘅實景，圖片來自Google Map實景照片嘅截圖。
下面呢張係日產租車俾嘅難波OCAT地下停車場B1層嘅平面圖，入到去可以將車暫時停係紅框位置，最好有個人睇住架車，然後搵個人由玻璃門入去，照箭咀咁行去租車店Counter叫人黎接收架車。
廣告
難波、心齋橋
還左架車我地就沿住地下街行返去難波，途中見到有間鰻魚飯專門店，於是就食左呢個饅魚飯做午餐。
呢日之後嘅行程，全部都係心齋橋行街shopping，所以冇影到相，唯一係影左呢間g.u.，佢係Uniqlo嘅平價版副線，價錢比Uniqlo平4成左右，當然質素會差少少，但係都好抵著。間舖頭就係心齋橋步行街，由戎橋向北行200米左右就會見到。
g.u.心齋橋店位置圖
講開g.u.，不如講埋Uniqlo啦。Uniqlo心齋橋店就係心齋橘步行街大丸百貨北館斜對面，接近長堀通，由戎橋向北行大約600米左右，分店面積唔細，有四層，貨物品種好齊。
Uniqlo心齋橋店位置圖
Day 4 End…
京阪6天自由行Day 5：黑門市場、梅田、通天閣
係旅程嘅第一日我地係京都食左一次一蘭拉麵，係道頓堀川旁邊近太左衛門橋嘅位置亦有一間一蘭，呢間分店係24小時營業架，不過中午同晚飯時間就超多人排隊，所以我地選擇係朝早冇乜人嘅時間去食早餐。
一蘭拉麵
講開一蘭拉麵，不如用小小篇幅簡單介紹下食麵過程啦。下… 其實係唔係怕呢日行程冇咩寫，求其寫D嘢黎濫竽充數啊
？
咁又唔好咁講，其實如果唔識日文，當中都有D過程幾考人架，例如你要係張order紙度選擇嘢，唔識日文分分鐘圈錯，影響碗麵嘅味道，我就曾經圈錯過
，所以先覺得寫出黎應該點都會有D參考價值掛。不過而家一蘭拉麵已經有中、英文版嘅order紙啦，下面講日文order紙果Part可以直接跳過。
首先，入到一蘭一般會係門口位置見到呢部自助售票機。
先係呢部機買左食券先，購買食券嘅步驟：
Step A – 係紅框A度入左錢先，入紙幣同Coins都可以；
Step B – 按紅框B度個掣，買碗麵，只得一款，盛惠790円；
Step C – 如果好大食怕一個麵唔夠，可以按紅框C度其中一個掣加底，替玉係加多一個麵(160円)，半替玉係加多半個麵(100円)；
Step D – 按紅框D度個掣，買一隻半熟蛋(100円)，超好食一定要買，除非你對食蛋好抗拒；
Step E – 如果好鐘意食叉燒，可以按紅框E度個掣，加多三塊叉燒(150円)；
Step F – 最後，買左嘅食券同找錢會係紅框F位置吐出黎。
買好飛之後，有位就可以入去坐低，通常有職員安排。
之後就係做功課時間喇，先係枱面旁邊攞起支筆同呢張Order紙(オーダー用紙)，然後按照自己口味係Order紙上圈上自己嘅選擇，跟住將之前買嘅食券同埋填好左嘅Order紙一齊遞俾裡面嘅職員。
之但係，張Order紙淨係得日文，都唔知佢噏乜，點圈？
好啦，下面就用我對日文有限嘅認識同食過咁多次嘅經驗，簡單介紹下呢張Order紙嘅內容啦。
以下係按照Order紙由上至下嘅順序嘅內部：
1. 味の濃さ = 湯味嘅濃度
左邊嘅うす味=較淡嘅味道，右邊嘅こい味=較濃嘅味道
2. こってり度 = 叉燒嘅肥瘦度
以叉燒所含嘅卡路里衡量，なし約有445卡路里，越右越肥亦即係越高卡路里
3. にんにく = 蒜
由左至右係走蒜(なし)、少許、標準、1/2片、1片
4. ねぎ = 蔥
左邊嘅なし=走蔥，白ねぎ=白洋蔥，青ねぎ=青蔥
5. チャーシュー = 叉燒
左邊嘅なし=不要，右邊嘅あり=要
6. 秘伝のたれ = 秘製辣醬
由左至右係唔要(なし)至X倍辣
7. 麺のかたさ = 麵嘅軟硬度
由左至右係最硬至最軟，個人覺得尾二嘅軟硬度最好口感，又或選擇基本都OK。
你Order嘅麵黎齊之後，職員會放低您面前嘅簾等你可以慢慢食，食完之後自己走人就得架啦。
食完個麵我地就先行去黑門市場睇睇有冇乜嘢買先。
先俾幾張道頓堀嘅相大家睇睇先
廣告
黑門市場
十零分鐘就行到去黑門市場啦，今日黎嘅目的主要係為聽朝上機前買生果返去做定資料搜集。
最後買左兩種唔同產地嘅士多啤梨返酒店試味先。
係黑門市場買左D士多啤梨返酒店試味，試完味抖左一陣，就開始出去行下啦。第一站先去梅田，主要係去大阪駅上面嘅shopping mall – Osaka Station City。不過都只係購物商場一個，對我冇乜吸引力。
梅田
係10樓有一個空日花園 – 風之廣場，聽講好似種左幾棵樓花，不過仲未開囉。
行左一陣之後我地就轉去梅田其他地方行下，首先去左梅田阪急百貨同新阪急酒店之間嘅新梅田食道街門口檔舖頭食章魚丸。間舖就位於食街入口，由大阪駅過左斑馬線就見到，好易搵。
之前黎嘅時候住梅田呢邊，所以發現左呢間好嘢，佢嘅章魚丸好好味架
，食過都冇乜興趣去食道頓堀果D。
通天閣
食完章魚丸跟住係阪急百貨行下，又買左少少手信。之後就轉去另一個未去過嘅地方 – 通天閣。坐地鐵去到動物園前駅落下，行10分鐘左右就到。
通天閣吉祥物
呢區幾乎間間食店都係食炸物，我地是旦搵左間試，不過味道麻麻地。
咁多人排隊唔通有好嘢
？原來係等撘lift上去通天閣。
通天閣附近並唔係咁多舖頭啱行，所以好快行完。
由通天閣沿堺筋向北行大約一公里多D就係難波，而呢段路集中左好多售賣電子產品同動漫產品嘅店，叫做電電城，所以我地亦沿呢條路行返去心齋橋。
行到累坐低食個Donut先
電電城大約去到日本橋3個路口就完，再向北行就冇乜特別嘢睇，所以可以係呢個路口轉左入返去難波嘅步行街。
小弟至愛係日本嘅紅豆湯，雖然道頓堀嘅夫婦善哉並唔算係好味，起碼同京都果D相比差好遠，不過每次都忍唔住要試下試
。
跟住之後嘅行程，又係係心齋橋行街shopping，冇乜特別嘢好寫。
Day 5 End…
廣告
京阪6天自由行Day 6：回程
終於黎到旅程last day，今日只得一個主要任務，就係去黑門市場買D生果、食材帶返去。
做嘢之前先去醫飽肚先，今日嘅搵食目標係Lotteria快餐店，最近酒店嘅係道頓堀戎橋旁邊嘅呢間。
第一次食Lotteria係舊年係福岡，當時天寒地凍，試左佢個半熟蛋漢堡包，初時都驚驚地，但係食落之後真係好正
，回味無窮，所以今次點都要再試多次。
食完早餐就行過去黑門市場買嘢啦，買嘅當然唔少得士多啤梨，早一日已經特登買左D黎試味，所以今日去到就掃左試過好味果隻，另外亦都買左一D日本嘅新鮮食材。俾錢果陣原來收銀果個係兼職嘅中國留學生，佢仲幫我地問左店長關於一D食材嘅整法，真係好好人啊
。
係買門市場買完嘢返酒店就後，都係時間check-out，之後先將行李寄存係酒店，再去心齋橋行下。
今次係日本嘅最後午餐，食左心齋橋呢間烏冬店，因為之前食果間丸龜製麵真係好好味，以為大家都係讚岐烏冬，應該都會好味啦，點知，難食到…
遺憾地食完旅程最難食嘅一餐之後，終於到辛苦嘅時間啦，就係拖行李去難波駅坐南海電鐵去關西空港囉
，步行路線就係咁。
機場冇乜好影，冇相睇。飛機好準時咁係下午4點半左右起飛，返到澳門都係八點左右。去旅行最辛苦係最後回程果陣，所以回程可以唔洗經香港而直接到澳門真係好正架。
全篇完
相關文章：
- 大阪環球影城門票+最新Express Pass(快速通關)+VIP導覽+官網購票教學
- 日本環球影城APP領取哈利波特魔法世界&超級任天堂世界入場整理券攻略
- 大阪光之饗宴：活動內容、時間、地點和交通
- 大阪造幣局櫻花大道入場預約全攻略
- 日本自駕遊全攻略 – 日本租車、保險、行程規劃、費用預算、高速公路Pass詳細介紹
- 日本上網卡(SIM卡)使用情況分享與購買攻略
- 使用Visit Japan Web進行日本入境申報、海關申報和免稅購物詳解
- 大阪酒店推介 – 20間難波、心齋橋精選酒店住宿推薦
- 京都酒店推介：京都駅、河原町40間精選酒店推介
- 日本有馬温泉系列(之一) – 如何安排行程？
- 日本有馬温泉系列(之二) – 如何前往有馬溫泉？
- 日本有馬温泉系列(之三) – 有馬溫泉旅館推介
- 大阪、京都5天自由行提案：第一次去關西旅遊照著走
- 關西紅葉季6天賞楓自由行：規劃、景點與行程分享
- 白浜溫泉兩日一夜泡湯之旅：行程、景點與住宿分享
________
本文網址：https://www.travelclassroom.net/2026/03/kyoto-6days-trip.html
如果喜歡這篇文章，請點個「讚」吧！