2012年京阪之旅(Day 1 – 京都河原町)
今次已经系第四次踏足关西,本黎打算4月头去睇樱花架,不过因为工作关系,被迫提前左十日出发,最终京都赏樱嘅心愿都系冇办法达成,睇怕都系要再去多一次啦。
今次行程只有六日时间,又懒得去plan,所以只打算系京都同大阪hea下,顺便去有马温泉住返晚。 旅程开头两日我地会先系京都住两晚,所以到左关西空港,我地就先坐JR直接去京都啦。
由关西机场去京都嘅JR车飞系1,830円,不过我地今次好豪(其实系一时大意傻仔左),买埋指定席车飞,仲要系最贵果只-Green Car,成2,390円一位架。如果大家下次都系打算由关西空港坐去京都,记住唔洗买指定席车飞,架火车有三卡系留俾普通车飞嘅乘客坐架,系关西空港上车一定会有位坐,唔好浪费金钱啦。
呢架就系我地坐去京都嘅JR,Green Car只有一卡,咁贵座位当然舒服好多啦。
我地今次系京都入住一间新开冇耐嘅酒店,叫Best Western Hotel Kyoto,洒店嘅资料我系呢篇住@京都Best Western Hotel Kyoto嘅文章度好详细介绍左,大家可以参考参考。由于酒店位于河原町,所以去到京都駅之后仲要转地铁先可以去到。
唔知系唔系个天中意玩嘢,好多时去旅行都实有几日落雨,而今日系地铁站行出街个天就即刻落起大雨,搅到本来由地铁站行去酒店只系400米左右嘅路程,行起上黎都有D狼狈。
系酒店Check-in完都已经7点,再加上落雨C湿,所以先系附近揾食。第一餐选择左系酒店附近间一兰拉面食,呢间分店前年黎果阵仲未见有。
食完面出黎发觉把遮唔见左,睇怕都系俾人攞错左啦,把遮系啱啱系FamilyMart买架,只系用左佢几分钟时间咋,咁快就要分手。
由于天公不做美,我地都只可以系附近有瓦遮头嘅步行街行下,主打系药房扫药。上几次黎都已经发觉京都嘅药房一般比大阪平,今次又撞正有一间做紧几日Promo,全店九折,当然先入定货先啦。
讲开药房,顺便都讲一讲每次去日本都每日必饮嘅伊藤园绿茶,500ml支装系便利店一般会卖120~150円,而系药房通常系88円一支,有时仲会平到80円一支,所以每次开始自驾之前,我都必定会去药房入定足够成个自驾行程饮用嘅存货。今次系京都呢间药房,折左之后竟然只系70円一支,系咁耐以来买过最平嘅一次,超抵。
以下就系我地呢两日行左好多次嘅寺町通步行街喇
最近睇仁医,所以对坂本龙马有左少少兴趣,原来坂本龙马遇刺身亡嘅近江屋旅馆,就系位于河原町通,而家变左系……OK便利店,佢门口仲树立左呢个纪念碑。
行到9点几开始有D肚饿添(一兰碗拉面冇加底其实份量只系好少架),最后入左去若狭家食多碗鱼生饭,食饱先至返酒店休息。
Day 1 End…
我10月底出发去大阪6天自游行。住大阪,但想去京都和奈良,著下和服行街食嘢。请问行程有咩好介绍?谢谢你
如果6天行程主要都系去呢三个城市, 建议连续5晚都住大阪同一酒店, 咁样既唔洗搬酒店咁辛苦, 又唔怕要check-in check-out浪费时间. 大阪酒店可以参考我呢篇文章嘅推介:
https://www.travelclassroom.net/2010/09/part-1.html
至于行程, 可以大致咁安排:
day1 – 机场去大阪酒店check-in后在心斋桥附近行(如果住心斋桥), 如果系早机, 可以去大阪城
day2 – 去大阪环球影城, 如果唔去影城, 改去大阪城同梅田
day3 – 奈良, 游览奈良公园、春日大社、东大寺
day4 – 京都, 坐地铁到淀屋桥转坐京阪本线去伏见稻荷大社,再去清水去,然后去祇园、河原町行街,夜晚返回大阪
day4 – 京都, 坐地铁到梅田转坐阪急京都线去岚山游览岚山、天龙寺坐小火车,再坐京福电铁北野线到北野白梅町转巴士去金阁去, 然后坐巴士返回京都駅坐JR回大阪.
day5 – 黑门市场, 坐南海电铁去机场
大阪除了行街shopping、环球影城和大阪城外,并没有太多景点, 反而京都比较多, 如果你想更多时间在京都, 也可以改住京都. 京都酒店可以参考我呢篇文章嘅推介:
https://www.travelclassroom.net/2010/09/part-1_25.html