2012年京阪之旅(Day 5[上篇] – 一兰拉面：点样填写果张Order纸？)

系旅程嘅第一日我地系京都食左一次一兰拉面，系道顿堀川旁边近太左卫门桥嘅位置亦有一间一兰，呢间分店系24小时营业架，不过中午同晚饭时间就超多人排队，所以我地选择系朝早冇乜人嘅时间去食早餐。

讲开一兰拉面，不如用小小篇幅简单介绍下食面过程啦。下… 其实系唔系怕呢日行程冇咩写，求其写D嘢黎滥竽充数啊？

咁又唔好咁讲，其实如果唔识日文，当中都有D过程几考人架，例如你要系张order纸度选择嘢，唔识日文分分钟圈错，影响碗面嘅味道，我就曾经圈错过，所以先觉得写出黎应该点都会有D参考价值挂。

(2013年更新：今年去日本一兰拉面，发现佢地有中、英文版嘅order纸啦!)

首先，入到一兰一般会系门口位置见到呢部自助售票机。

先系呢部机买左食券先，购买食券嘅步骤：

Step A – 系红框A度入左钱先，入纸币同Coins都可以；

Step B – 按红框B度个掣，买碗面，只得一款，盛惠790円；

Step C – 如果好大食怕一个面唔够，可以按红框C度其中一个掣加底，替玉系加多一个面(160円)，半替玉系加多半个面(100円)；

Step D – 按红框D度个掣，买一只半熟蛋(100円)，超好食一定要买，除非你对食蛋好抗拒；

Step E – 如果好钟意食叉烧，可以按红框E度个掣，加多三块叉烧(150円)；

Step F – 最后，买左嘅食券同找钱会系红框F位置吐出黎。

买好飞之后，有位就可以入去坐低，通常有职员安排。

之后就系做功课时间喇，先系枱面旁边攞起支笔同呢张Order纸(オーダー用纸)，然后按照自己口味系Order纸上圈上自己嘅选择，跟住将之前买嘅食券同埋填好左嘅Order纸一齐递俾里面嘅职员。

之但系，张Order纸净系得日文，都唔知佢噏乜，点圈？

好啦，下面就用我对日文有限嘅认识同食过咁多次嘅经验，简单介绍下呢张Order纸嘅内容啦。

以下系按照Order纸由上至下嘅顺序嘅内部：

1. 味の浓さ = 汤味嘅浓度

左边嘅うす味=较淡嘅味道，右边嘅こい味=较浓嘅味道

2. こってり度 = 叉烧嘅肥瘦度

以叉烧所含嘅卡路里衡量，なし约有445卡路里，越右越肥亦即系越高卡路里

3. にんにく = 蒜

由左至右系走蒜(なし)、少许、标准、1/2片、1片

4. ねぎ = 葱

左边嘅なし=走葱，白ねぎ=白洋葱，青ねぎ=青葱

5. チャーシュー = 叉烧

左边嘅なし=不要，右边嘅あり=要

6. 秘伝のたれ = 秘制辣酱

由左至右系唔要(なし)至X倍辣

7. 麺のかたさ = 面嘅软硬度

由左至右系最硬至最软，个人觉得尾二嘅软硬度最好口感，又或选择基本都OK。

你Order嘅面黎齐之后，职员会放低您面前嘅帘等你可以慢慢食，食完之后自己走人就得架啦。

____________________

食完个面我地就先行去黑门市场睇睇有冇乜嘢买先。

先俾几张道顿堀嘅相大家睇睇先

十零分钟就行到去黑门市场啦，今日黎嘅目的主要系为听朝上机前买生果返去做定资料搜集。

最后买左两种唔同产地嘅草莓返酒店试味先。

To be continued……