《2009年圣诞首尔之旅》- 第三天(3) – 南山、明洞

南山系位于明洞南面嘅一座山，而首尔塔就系座落于山上。上南山一般会坐缆车上去，以前由明洞去缆车站需要行一段10几分钟嘅斜路，而家起左一条南山倾斜电梯，可以坐上去缆车站，舒服好多。南山倾斜电梯位于南大门路近隧道口嘅路边，由明洞站行去的话，先向南大门方向行，到到大路口时再转左(南面)，然后直行就会见到架啦，路程大约需时10分钟。

因为系平安夜，上南山嘅人好多，所以排左超过20分钟队先上到缆车。缆车系由山脚去南山公园，如果要上首尔塔，要另外买飞。因为上塔系坐升降机，每次只可以载10几人，所以又要再排15分钟队。

* * * * *

南山公园并唔系好大，我地只系用左两小时就行完，其中有差唔多一半时间用系排队上。落返山脚我地又返去明洞揾地方食晚餐啦。

其实明洞地方好细，撞啱圣诞节人人都黎晒明洞，比起下午更加人山人海，今次真系唔洗自己行，因为其他人会推住你向前。

想揾食饭嘅地方，但系间间都爆晒，最后去左一间叫“凤邹”嘅食酱油粉丝鸡，不过人太多，等左40分钟先有位。“凤邹”似乎又系独孤一味，人人都系叫一碟鸡，睇个样以为唔辣，但其实都系有少少辣。

虽然系平安夜，但系好多舖头都系冇延长营业时间，尤其系百货公司，照样系一早关门，但系条街又系一样咁多人架㖞。十点几之后，连街边小贩都开始收档，所以又系时间返酒店训觉囉。

第三天行程完结