《2009年圣诞首尔之旅》- 第四天 – 鹭梁津水产市场

2009年12月25日(星期五)，天阴有雨，气温：around零度

同寻日一样今日又系训到好晏，十一点先离开酒店。今日嘅行程系去位于首尔江南嘅鹭梁津水产市场食海鲜。

由明洞去鹭梁津，可以先坐2号线到首尔站再转1号线，不过因为系首尔站转车要行一大段路，所以我地选择左由明洞坐2号线去忠武路转3号线再转新开嘅9号线，以为可以行少D，点不知转9号线车时一样要行一大段路，路程仲长好多添。

出左地铁站之后并冇明显嘅指示教你点行去鹭梁津水产市场（可能有，不过只系得韩文，有都唔识睇啦。），不过其实去鹭梁津水产市场嘅路好易认，因为市场就系铁路另一边嘅旁边，出左地铁站（如果坐9号线就系鹭梁津站2号出口行上地面），行上天桥再行过铁路对面就到。

鹭梁津水产市场地方都几大，有好多档卖海鲜嘅档贩，不过因为地面湿泣泣，我地只系行左前面一排档口。而由于言语不通，开头问左两档都买唔成，之后有一档识讲一D普通话，终于买左几件海鲜，包括皇帝蟹、螺同埋鲍鱼。因为事隔太耐所以都唔系咁记得用左几多钱，不过印象中记得虽然系平过日本，不过亦唔系想像中咁平。

买好海鲜之后只要攞上二楼嘅食店，就可以交俾食店为你整黎食架啦，收费以人头计算，如果整蟹仲要另外每只计钱，收费方面依稀记得都唔平架。档主教我地去左以下呢间食店，因为佢有个服务员系由东北到韩国打工嘅中国人，可以用普通话沟通。

一入到食店，个老板娘就即时攞左我地袋海鲜，又唔问下我地想点整㖞。睇黎佢地整法可能只系千篇一律，所以都费事问你啦。后来问个中国劳工服务员先知原来鲍鱼会整刺身，皇帝蟹同螺会用水烚熟，仲以为有螺肉刺身食。

可能韩国人嘅煮食技巧唔系咁好，虽然D海鲜几新鲜，但系整出黎味道只系一般，冇预期咁好，不过同呢几日其他几餐相比，呢一餐都已经好满足啦。

* * * * *

食完海鲜离开鹭梁津水产市场嘅时候，发现开始落雨，而且越落仲越密。咁唯有返去明洞乐天百货shopping啦，其实今日都plan左行呢度，因为一来要去乐天百货9楼免税店买雪花秀，二来要去地下乐天超市买草莓返澳门。

因为要去嘅地方都去晒，所以呢日下午将部相机放左系酒店，减轻D负担等shopping时可以轻松D，所以冇影到相，但系就因为咁而错过左拍摄呢晚首尔落第一场雪嘅机会。今次去韩国好期待可以睇到雪景，可惜果几日因为天气回暖，遇唔到落雪，而就系我地临走前呢晚竟然落起雪黎，不过因为时间太短，等唔到佢成地都系雪嘅景色出现，因为我地第二朝晨早就要走啦。

第四天行程完结