2014年環瀨戶內海自駕遊(Day 2) – 嗚門渦之道
六日嘅自駕行程今日開始啦!今日主要係去睇下四國嗚門大橋下面嘅漩渦,呢個景點已經想去好耐,今次終於去到。另外,原訂計劃仲打算去埋淡路島上嘅あわじ花さじき公園睇花,不過可惜呢日落雨,而且仲係日本黃金週假期最後一日,攪到係阪神高速上塞左好耐車,最後唯有取消呢個景點。
今次都係通過Toyota Rent a Car網站租車,租左架Toyota Ractis,用Hertz Gold Plus Rewards有15%折扣,六日租車費34,425yen。
同前兩次一樣今次攞車嘅分店都係Toyota Rent a Car嘅大阪難波分店(大阪 なんばターミナル店),由Cross Hotel行過去大約10幾分鐘,下面係步行路線。
先沿住御堂筋向難波方向行
去到難波本通就行過馬路
行入呢條巷
穿過天橋後再穿過前面條小路行出去大街就會見到
呢間就係豐田租車店難波分店啦
今年開始Toyota Rent a Car幾間大阪分店開始提供免費租用ETC卡嘅服務,包括難波分店,係網上預約租車之後已經用fax預約埋要借ETC卡,所以今次用左ETC卡,計落慳左成萬yen路費。(註:租ETC卡嘅方法可以睇返呢篇《日本租車公司借用ETC卡服務:可以借用ETC卡的租車店 + 如何透過傳真預約借用ETC卡》)
ETC卡同車上嘅ETC卡讀卡器
難波分店算係一間比較大型嘅分店,車輛數目都唔少。
我地租嘅就係呢部Toyota Ractis,可惜唔係有天窗果款。
今次呢部車嘅GPS原來係多語言版,除左日文仲可以選擇中文、英文甚至韓文。
一向都係用開日文GPS,今次就試下用中文版。中文版最大嘅好處係有國語發音嘅語音導航,轉彎同埋離開高速公路前嘅語音提示好有用。而操作介面同地圖上嘅地名亦基本轉左做中文簡體字,都方便左,但其實同日文分別不大。不過有一個小小缺點,就係高速公路上嘅地方名轉左做英文名,係高速公路上嘅時候唔係咁清楚去到邊度。
呢架車嘅泊車後鏡頭會顯示按照當前操作泊車嘅位置,幾好用架。
攞左車先去返酒店附近搵位泊好,跟住先到一蘭食碗拉麵再出發上路。
今日天氣唔係咁好,時雨時晴,再加上係黃金週假期last day,高速公路上排晒長龍,從大阪去神戶本黎半個鐘車程行左差唔多兩粒鐘,打亂原來plan好嘅計劃,唯有取消去あわじ花さじき公園睇花嘅行程,直接去嗚門。
呢條係連接神戶同淡路島嘅明石海峽大橋,每邊都可以三線行車,好闊。
塞左咁耐車搵個休息站食午餐醫左肚先
飯後甜品
食左飯有返力氣,繼續向嗚門進發。呢條就係連接淡路島同四國之間嘅嗚門大橋,橋面冇明石海峽大橋咁寬闊,不過橋下面嘅漩渦係著名景點。
從嗚門北IC離開高速公路
再行一段路兜返去大橋下面嘅渦之道入口
鳴門渦之道附近有幾個停車場,最近景點嘅係位於山丘最上面嘅第一駐車場。([GPS設定參考] 1. 電話號碼:088-687-0222,2. Map Code:406 212 812)
不過第一駐車場已經full左,唯有泊返落下少少嘅第二駐車場。
泊車費一次400yen
由第2駐車場去渦之道入口要由呢條樓梯行上去
上左山丘上面再沿呢度行落去穿過隧道就會見到入口架啦
呢度就係嗚門渦之道入口
鳴門大橋下面嘅鳴門海峽由於水流同海床高低落差比較大,所以係每日潮漲潮退嘅時候會出現漩渦,要睇漩渦可以坐觀潮船出海近距離觀賞,亦可以到設係鳴門大橋底部嘅鳴門橋遊歩道「渦の道」從高處向下觀看漩渦。
觀看漩渦嘅最佳時間係每日上午滿潮同下午干潮呢兩後時間,不過每日滿潮同干潮嘅時間都不同,計劃行程果陣一定要到官方網站查下先啊。
今日滿潮嘅時間係上午10點幾,已經過左啦,不過好彩仲趕得到干潮時間。
渦の道入口
係呢度買張入場券先
從入口去到可以睇到漩渦嘅地方仲要行一大段路先到架
呢度就係觀賞橋下漩渦嘅地方啦
如果唔畏高,可以係玻璃上面慢慢欣賞下面嘅漩渦。
如果想近距離感受下漩渦嘅威力,可以坐觀潮船,有兩間船公司可以選擇,分別係うずしお汽船同鳴門観光汽船。
如果想影到嗚門大橋全景,可以行上去呢個公園仔。
如果想居高臨下睇晒成個景,就要上去呢個係第一駐車場對面嘅收費展望台。
遊覽完食埋件番薯出發去高松
從鳴門去高松市中心只係80公里,大約1個鐘多D就到,中途係休息站抖一抖。
今晚住係高松市嘅高松大和酒店,酒店座落係丸龜町,好方便,不過我地黎到已經入夜,而且只係住一晚,所以都冇乜係附近點行過。想睇酒店介紹嘅朋友,可以參考返呢篇住@高松大和酒店(Daiwa Roynet Hotel Takamatsu)。
雖然呢度係高松最主要嘅步行街,不過並唔係好似大阪心齋橋,呢度好多舖頭未到七點已經關晒門,Check-in完出到街已經冇咩地方行啦。
今晚晚餐係酒店樓下嘅丸龜町GREEN商場間大戶屋食
飯後餘興節目,就係到商場地下間超市入貨啦。
– Day 2 完 –
返回遊記主目錄 >> 2014年環瀨戶內海自駕遊 – 序章
↓ 在Google地圖上查看今日行車路線和景點 ↓
往年日本關西遊記:
唔知點解打咗幾次MESSAGE都出唔到….
想問係大阪市內出車, 關西機場還車, 要另加費用嗎?
可能係個留言系統錯誤將你個留言分類為要審核的留言, 所以即時顯示不到.
想問是否所有車種都有15% Hertz Gold Plus Rewards折扣? 因我想租P1款車種, 謝。
P1車種沒有折扣.
謝。另想問如在大阪市內出車而在機場還車, 要否額外收費?
不需要
唔知點解打咗幾次MESSAGE都出唔到….
想問係大阪市內出車, 關西機場還車, 要另加費用嗎?
好的,唔該晒!
有咁既可能, 但係未遇過(touch wood), 所以我都唔sure會唔會有問題.
我就怕生意外claim保險時會有問題
通常在預約租車之後租車公司會預先準備好份租車合約, 裡面已經寫左租車人個名, 如果你有兩個人開車, 取車果陣可以叫租車店幫你在合約上註明會有另一個司機, 不過租車店好多時會話唔開都冇問題, 我之前有兩個人開車都冇加, 但唔知如果真係發生意外claim保險時會唔會有問題.
租車一般都唔會限制行車里數.
唔好意思,請問有兩個司機輪流駕車,是不是向網租車時要同佢講 同埋向Toyota租車有無限制一日只可行幾多公里?
THX
Print網上張會員卡出來, 然後裁剪好就可以用了, 不需要有張膠卡.
請問我申請左Hertz Gold Plus Rewards,要同Hertz租一次車佢先會寄張會員咭比我,但我就出發而又不會在香港租車,我print網上嗰張會員咭去Toyota 租車是否會一樣有折呢?