----------

----------

2008年秋季京阪神紅葉+白浜溫泉之旅(第一天)

20081125
澳門 >> 關西空港 >> 大阪格蘭比亞酒店

 
今次係第四次到日本,亦係第二次到關西,選擇再去關西其中一個原因當然係因為澳門有機直飛,比起要拖住行李經香港飛真係方便好多架,另外亦都係由於上次去關西唔係紅葉季節,所以都希望可以再到京都感受一下佢係紅葉襯托底下既美景。

 
由於日元高企,今次去關西比起上次真係貴左唔少,記得上次去關西時仲係兌緊6.7,而今次換錢平均都要8.1,貴左足足20%有多。另外,由於出發時仲係收緊高油價時既燃油附加費,所以燃油附加費連機場稅都比上次貴左一大截,總之加加埋埋今次都算係一次貴價既旅程。

 
今次去旅行冇咁好心機好似以前咁分類計算每日開支,只係粗略計算,8日7夜兩個人洗左大約HK$35,000,主要開支包括:機票(包括燃油附加費、機場稅+酒店(包括溫泉酒店)HK$16,550交通(包括兩日租車費用)HK$3,450吃喝玩樂連購物HK$15,000

 
費話唔多講啦,先黎介紹一下第一日既行程先。

 
其實第一日都冇咩行程可講,因為飛機下午3點鐘先從澳門起飛,所以第一日基本上只係坐飛機。

 
我地大約1點半左右去到機場check-in,問過澳航櫃台人員原來回程機位要做re-confirm架,不過可以即時係澳門機場counter做,就係check-in櫃台對面既counter。好快咁check-in完,又re-confirm好回程機位之後,就入閘去機場貴賓室食下野等上機囉。

 
機場貴賓室,有VISA金卡就入得去,完全免費架

IMG_1436_resize

 
可能係受金融海嘯影響,機場候機室入面冇咩人,呢幾年來真係第一次見到咁既場面喎。

 
冇乜人既機場候機室

IMG_1438_resize

 

飛機好準時係3點起飛,全機除左我地兩個人同埋有一團旅行團之外,其他乘客好似全部都係日本人,難怪機上廣播都以日文為主啦,如果唔係架機咁細,真係以為坐緊全日空。
 

冇咩驚喜既飛機餐

IMG_1443_resize

 

飛左3個鐘多DD飛機係日本時間7點幾就降落關西空港啦,可能同樣受金融海嘯影響,關西空港亦冇咩外國人入境,話咁快就過左海關,攞埋行李就先去JR Counter買嵯峨小火車車飛同埋去姬路城果日既JR West Rail Pass。

 
原來JR West Rail Pass要係買既時候填上使用日期,因為未最後確定會係邊日去姬路城,所以都係決定等去果日先係大阪駅JR Counter買,至於嵯峨小火車車飛,本來打算11月26日 去,點知原來果日星期三小火車休息,所以改為27日先去坐,因為紅葉季節,D座位都差唔多full晒,不過好彩都仲可以買到11:50由嵐山開出既坐位車飛。

 
買完小火車車飛,再買埋JR關空快速車飛,時間都差唔多8點15分,啱啱好趕得切坐8:32班車。原來關空快速真係名不符實,因為架車差不多站站停,唔怪得要用成70分鐘先去到梅田啦,而且架車同普通電車咁,完全冇行李位俾人放大件行李架,只可以將行李喼放係側邊,架車行駛中全程都要用手扶實個喼,以防佢碌走,而且又怕阻住其他人行,真係好唔方便,所以如果各位下次住梅田,建議你最好唔好坐JR,因為坐JR去真係幾麻煩,去到大阪駅仲要拎住行李行好多樓梯先出到去架,所以坐機場巴士會好D,雖然巴士要1,300円,比JR貴少少

 
JR關空快速車飛

IMG_1457_resize
JR關空快速車廂 

IMG_1456_resize

 
捱左70分鐘火車,終於係9點40分到達酒店,比原來預計時間早左。

 
今次係大阪住既酒店係大阪格蘭比亞酒店,就係正JR大阪駅上面,一出JR大阪駅中央口轉右直去就係,間酒店係通過egl book,總共book左六晚,除左中間11月28日 果晚去白浜之外,其他日子都住同一酒店,方便唔洗搬行李。

 
大阪格蘭比亞酒店門口 

酒店

由於今次旅程計劃會去大阪周邊既多個唔同地方,覺得住梅田會比較方便坐車,所以選擇酒店時都集中搵梅田既酒店,不過睇左好多酒店既相片都覺得麻麻,最後都係選擇左格蘭比亞,因為睇相似乎比較干淨企理,可惜入左房真係好失望。間房細本來已經預左,但係原來間酒店已經好舊,地毯同牆身都有好多污漬,個洗手間顏色又太沉,完全冇乜生氣,當時真係好懷念上次住果間Cross Hotel

 
雖然話住梅田會比較方便坐車去其他地方,但其實係大阪選擇住難波至心齋橋一帶會好好多,原因有幾個:第一,難波至心齋橋一帶係shopping熱點,買野方便又熱鬧,如果住附近可以方便買完野放返酒店唔洗攞住行街;第二,難波至心齋橋一帶有好多食店,搵野食方便又多選擇;第三,由機場去難波坐既南海電鐵速度快好多,只需要40分鐘就到,而且車飛只需要890円,真係又平又快,而且車廂入面有位置放大件行李。我們今次住係梅田,但前前後後都去左心齋橋4次咁多,早知住返心齋橋一帶好過啦。

 
位於難波道頓崛橋傍邊既Cross Hotel係小弟係日本第一次住既酒店,間酒店同同級酒店比較真係好唔錯,可惜今次去因為fullbook唔到呢間酒店,另外今次發現其實係難波有間叫Namba Oriental既酒店都唔錯,呢間酒店位於千日前,由南海電鐵難波站行去唔洗5分鐘就到,而且周圍又係有蓋步行街,無論去心齋橋、道頓崛同黑門市場都好近。

 
再講返行程,我地係酒店check-in完就出去食dinner,其實係梅田阪急駅、阪神駅同Hep Five周圍都有好多條小巷有唔少食店,而且到好夜都仲有好多人。

 
第一晚既晚餐就係Hep Five側邊橫街既呢間拉麵店食 

梅田附近拉面店

 
味道唔錯既啦麵,不過日本D雲吞就麻麻 

拉面

 
返酒店前係自動售賣機買左罐栗米(120円),又係酒店餅店買杯布丁做宵夜 

IMG_1492_resize

Related Posts Plugin for WordPress, Blogger...
2008年秋季京阪神紅葉+白浜溫泉之旅(第二天)I - 金閣寺、銀閣寺

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁