----------

----------

《2009年初秋北海道自駕之旅》- 第五天(2) – 天然温泉 灯の湯 ドーミーインPREMIUM小樽、小樽運河、堺町通

見到海代表就黎到小樽啦

小樽外

 

今次北海道之旅嘅住宿都好滿意,而今晚係小樽住果間係最滿意嘅一間,呢間酒店叫天然温泉 灯の湯 ドーミーインPREMIUM小樽,不過想叫得簡單D都唔知點叫,佢係日本其中一間集團式酒店dormy inn係小樽嘅分店,今年6月先啱啱開張,仲係做緊promote,7,200,好抵

 

可能間酒店太新,所以GPS唔識去,差D又俾佢點左去第二度,好彩一早睇左地圖,知間酒店就係小樽駅對面,所以改為去小樽駅,好易搵到。

 

天然温泉 灯の湯 ドーミーインPREMIUM小樽就位於JR小樽駅對面中央通路口,好方便。

小樽酒店1

 

天然温泉 灯の湯 ドーミーインPREMIUM大堂

小樽酒店2

 

入左門口先係洗手間,而廁所同浴室就係右手邊,睡房要推開前面個門先見到

小樽酒店3

 

睡房內嘅寫字枱同電視機

小樽酒店4

 

張床size比一般大

小樽酒店5

 

房入面個窗望出去就係小樽駅

小樽駅

 

灯の湯 ドーミーインPREMIUM嘅其中一個賣點係係佢二樓有一個大浴場,雖然唔係真正嘅溫泉水,但係裝修好靚好有特色,浸落都好舒服架。

小樽酒店6

 

灯の湯 ドーミーインPREMIUM嘅停車場,係自動泊車果種,即係駛架車入去,熄車之後人出返黎,然後部機會轉走架車果種,泊一晚要1000円。

小樽酒店7

 

天然温泉 灯の湯 ドーミーインPREMIUM樣樣都好,但有一樣就有待改善,就係員工嘅英文水平,成間酒店似乎冇一個人識英文,連單字都唔多識,check-in時想問清楚點攞返架車,但攪左好耐都冇辦法溝通得到。最後唯有由得佢,等取車先算。原來係泊車時職員會用張卡紙寫低你車牌同名,然後自己將卡紙交俾reception,想出車時再向reception攞返張卡,咁就會有人去車場同你整返架車出黎架啦。

 

攪掂check-in之後都接近3點半啦,所以爭取時間即時出去玩。雖然由酒店行去小樽運河都好近,不過有架車係度冇理由唔好好利用。由酒店出車兩分鐘就到小樽運河。

 

小樽運河淺草橋傍嘅小樽運河食堂,係佢側邊有塊空地可以免費泊車架,如果自己開車過去,可以好好利用,不過地方唔係太大,可能旅遊旺季時好難有位

小樽運河1

 

小樽運河淺草橋

小樽運河2

 

小樽運河

小樽運河3

 

其實小樽運河真係冇咩好睇,唔可以用靚字來形容。雖然對大街果邊都仲算企理,但係對碼頭果邊就好似工廠區,灰濛濛,冇咩生氣。

 

行完小樽運河,下一站就去堺町通行街街。堺町通係一條步行街,有好多賣紀念品嘅店鋪,以玻璃製品為主,另外亦有唔少食店同埋賣糕點嘅鋪頭。呢條街雖然細細條又唔長,不過係度行街感覺好舒服。堺町通係可以單向行車架,不過因為行人太多,所以車輛都行得好慢,如果開車黎附近有好多收費停車場。但係如果由小樽運河行過去堺町通都係好近,主要嘅商店集中係小樽浪漫館至童話十字路口一段,大多數店舖都係下午6點左右關門,所以要多D時間行就要趁早啦。

 

呢度就係堺町通

堺町通

 

堺町通上唯一一間街邊即燒海鮮店

堺町通2

 

北菓樓係小樽好出名嘅糕點鋪

北菓樓

 

呢個就係北菓樓最出名嘅樹輪蛋糕妖精之森

妖精之森

 

呢間係小樽另一間出名嘅糕點鋪LeTAO,其實係我地酒店樓下都有一間分店。

LeTAO

 

LeTAO最出名嘅係呢隻芝士蛋糕

芝士蛋糕

 

小樽堺町郵便所

小樽堺町郵便所

 

呢度就係童話十字路口

童話十字路口

 

待續. . . . . .

Related Posts Plugin for WordPress, Blogger...
《2009年初秋北海道自駕之旅》- 第五天(3) - 政壽司、小樽運河、天狗山
《2009年初秋北海道自駕之旅》- 第五天(1) - 洞爺湖Silo展望台、276號國道、Niseko Panorama Line(二世古全景道路)、神仙沼

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁