----------

----------

2008年東京春季賞櫻+溫泉之旅(第四天 [1]) – 井之頭公園、吉祥寺、新宿御園

2008329(天晴,氣溫9~17度)

行程:井之頭公園 _ 吉祥寺 _ 新宿御園 _ 明治神宮 _ 原宿 _ 千鳥淵公園 _ 靖國神社

 

今日係成個旅程中去得最多點景嘅一日,我地成個旅程總共去左五個櫻花名所賞櫻花,而今日一日之內就走左三處,真係行到腳都軟,不過三個地方嘅櫻花都真係好靚,就算行到腳痛都值得

 

第一站先去位於吉祥寺嘅井之頭公園,由新宿去吉祥寺,最快同最直接係坐JR中央線,不過要睇清楚有特快同快速之分,特快列車會停三鷹,如果去三鷹之森美術館就啱,不過特快列車唔停吉祥寺架,如果去吉祥寺應該坐快速列車。我地開頭都坐錯左特快,好彩即時發覺,跟住係下一站落車再係同一月台等一陣就有一班快速列車到,完全冇浪費時間

 

由新宿只需要15分鐘時間就到吉祥寺架啦,JR吉祥寺駅只有兩個出口,去井之頭公園由公園口出去,再向住對面嘅0101大廈行去,再轉右係0101大廈傍邊條小路直行就到。井之頭公園嘅櫻花樹圍住井之頭池黎種,個view真係好靚

 

一早就有好多人係井之頭公園內霸位等夜晚賞櫻花

井之頭公園1井之頭公園2

 

係井之頭公園睇櫻花最正就係可以係湖上划艇仔,可以近距離划埋櫻花樹下影相

井之頭公園3井之頭公園5

 

有三種唔同嘅船可以選擇架,唔同船租金唔同,最平係划掌船,租一個鐘都只係600円

井之頭公園7井之頭公園6

 

係船仔度影嘅近鏡

井之頭公園4

 

我地租左一隻要用船掌划嘅船仔,好多年都未玩過呢D野,真係唔係咁識控制,眼見湖面上好多船,而且大多數人都好似我地咁雞手鴨腳,真係幾驚會翻船,我唔識游水架。我地大約划左大半個鐘,兜左一個圈就上返岸啦,再唔上岸怕冇機會,因為划一個圈都已經手軟腳軟,仲攪到成身汗添。不過可以近距離接觸D櫻花,都算值得架

 

划左一個圈船之後真係好肚餓,所以離開井之頭公園之後,就去左旅遊書介紹嘅松坂超人氣牛肉丸買返幾個黎試下。松坂牛肉丸就係正JR吉祥寺駅附近,不過要係JR站嘅另一個出口中央口出去,一出中央口再過斑馬線行前少少,係間M記之前個路口轉左直行一陣就見到架啦。

 

松坂超人氣牛肉丸,一見咁多人排就知係佢啦

牛肉丸1

 

熱辣辣嘅牛肉丸,真係好好味架

牛肉丸2

 

食完牛肉丸都仲未到11點,跟住我地坐返JR中央線返新宿,再由新宿駅新南口行去另一個櫻花名所新宿御園。大約行10分鐘就可以到新宿御園嘅新宿門,不過當日因為人太多,要分階段放人入去。

 

新宿御園嘅新宿門,要買200円門票先入得去

新宿御苑1

 

新宿御園入面有好多大草地,今日星期六所以全部都坐晒人係度野餐

新宿御苑2新宿御苑3

 

新宿御園入面嘅日式庭園

新宿御苑4新宿御苑5

 

新宿御園都真係幾大架,行左起碼個半鐘先行得晒,腳都軟,好彩間中可以坐係草地度抖下。離開新宿御園時我地選擇係另一邊嘅千駄谷門出去,因為由呢邊去原宿比較方便坐JR

 

新宿御園千駄谷門

新宿御苑6

 

出左千駄谷門跟住人群行一段路就去到JR嘅千駄谷駅,由呢度坐中央線一個站去代代木駅,再轉山手線一個站就到原宿。

Related Posts Plugin for WordPress, Blogger...
2008年東京春季賞櫻+溫泉之旅(第四天 [2]) - 原宿、竹下通、明治神宮、千鳥淵公園、靖國神社夜櫻
2008年東京春季賞櫻+溫泉之旅(第三天) - 上野恩賜公園、迪士尼樂園

分享這篇文章:

讚好本Blog Facebook專頁

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁