----------

----------

2013年清境、台北自由行 – Day 1 (Part 1):直飛台中

去年(2012年)六月嘅台灣之旅,本來已經計劃左去清境,入住嘅民宿都已經book好左,點知突然遇上雙颱風夾擊台灣,上清境嘅行程被迫取消。今年再接再厲,又係選擇係六月颱風季節上清境。今次好好彩冇颱風,但出發前卻發生大地震,命苦!

2013年清境、台北自由行 – Day 1

 

兩次想去清境都遇著天災,係唔係咁唔想我去啊!本來有諗過再次取消清境行程,因為都擔心有餘震,不過如果今次又取消,以後可能會有心理陰影唔敢再提去清境,所以決定唔理咁多,死就死照去啦。不要告訴別人

 

今次我地坐嘅係復興航空,從澳門直飛台中。因為正值端午節假期,所以機場都好多人出行。

2013年台灣之旅_Day1_01

 

飛機起飛時間係中午12點,check-in完先去M記食個早餐先。

2013年台灣之旅_Day1_02

 

12:00準時出發

2013年台灣之旅_Day1_03

 

飛機餐超難食病厭厭,好彩已經食左早餐打底。

2013年台灣之旅_Day1_04

 

由澳門飛台中只係個半鐘,話咁快就到。台中機場並唔係好多航班進出,所以周圍靜英英,冇咩人。

2013年台灣之旅_Day1_052013年台灣之旅_Day1_07

 

入左境第一時間先去申請個iTaiwan免費WiFi帳戶,申請地點就係位於入境大堂呢個旅遊服務中心,一踏入入境大堂就見到架啦。iTaiwan免費WiFi帳戶今年5月先開始俾遊客申請,不過今次旅程都冇乜點用過,申請左只係攞黎傍下身。

2013年台灣之旅_Day1_06

Reference: 台灣iTaiwan免費Wifi開放遊客申請

 

由台中機場出市區,一係坐的士,一係坐巴士。我地當然選擇坐巴士啦,因為平嗎。巴士站係地面果層,按照指示牌向公車候車區行去就係,唔難搵。

2013年台灣之旅_Day1_08

 

我地今次入住嘅酒店係台中公園智選假日酒店,出發前係台中機場網站check過交通資料,由機場坐150路公車可以直達台中公園總站,行100米就到酒店。

 

台中好多公車都係由統聯客運營運,150路公車都係。公車嘅車費係按段收費,由機場到台中公園總站車費係NT$57。車費係上車嘅時候俾,而且不設找續,如果有悠遊卡亦可以用悠遊卡。不過我地身上冇悠遊卡,又冇散紙,好在係候車室度有巴士司機好好人同我地唱散。

2013年台灣之旅_Day1_092013年台灣之旅_Day1_10

 

巴士前面有位置可以放置行李,都幾方便。雖然係機場上車嘅乘客唔多,但係入到市區之後就會好多人迫上巴士,所以記得搵個好位坐定定啊。

2013年台灣之旅_Day1_112013年台灣之旅_Day1_12

 

從台中機場到台中公園正常應該係大約1小時車程,不過台中市區嘅交通都幾繁忙,所以我們用差唔多個半鐘先到達。

 

巴士嘅終點站係台中公園(雙十路)站,架巴士係呢度停一陣之後就會開返去台中機場。

2013年台灣之旅_Day1_13

 

我地入住嘅台中公園智選假日酒店,距離巴士站只有100米左右,落車之後向住行人天橋方向行,係斑馬線過馬路就係。

2013年台灣之旅_Day1_14

 

今晚停留台中嘅主要目的,係為左第二朝坐南投客運上清境,所以選擇位於南投客運台中總站旁邊嘅台中公園智選假日酒店

2013年台灣之旅_Day1_152013年台灣之旅_Day1_162013年台灣之旅_Day1_17

 

房間面積比預期大,而且好新淨,仲有個大落地玻璃窗對正台中公園,正!

2013年台灣之旅_Day1_182013年台灣之旅_Day1_19

 

>> Day 1 未完,待續……

 

Related posts:

Related Posts Plugin for WordPress, Blogger...
2013年清境、台北自由行 – Day 1 (Part 2):再遊逢甲夜市

分享這篇文章:

讚好本Blog Facebook專頁

One comment

  • lce

    150 路公車是否取消了, 我9月尾到台中, 也是入住智選酒店, 請問有沒有其他巴士呢? 謝謝

發表迴響

你的電子郵件位址並不會被公開。

收到您的留言後,小弟會盡快回覆,您可以Bookmark本篇文章,方便之後回來查看回覆 (注意:由於緩存關係,您在本Blog的留言可能不會即時顯示出來。)。 如果無法在Blog內留言,又或者想更快收到回覆,可到本Blog Facebook專頁留言!

為了阻擋垃圾留言,張貼留言前,請先用阿拉伯數字輸入以下數學算式的答案。(注意:輸入驗證碼前,請先按算式右手邊的Reload按鈕更新數學算式,以免因算式過時而出現驗證碼錯誤的情況。)

分享這篇文章:

讚好本Blog Facebook專頁